F-R-A-U-D

Credit Card သုံးကြသူတွေအတွက် ကိုယ်တိုင် ကြုံခဲ့ရတဲ့ အကြောင်းလေး ဝေမျှလိုက်ပါတယ်…။

မကြာသေးတဲ့ ရက်ပိုင်းအတွင်းက ကိုယ့် DBS Credit Card Bill ထဲမှာ စကာင်္ပူဒေါ်လာ ၃၀၀ ကျော် အပိုပါနေတာ တွေ့လိုက်တယ်။ သုံးထားတဲ့နေရာက Orchid Country Club မှာပါ။ အဲဒီနေရာဟာ ကိုယ်နဲ့ရော ကိုယ့်မိသားစုနဲ့ပါ ဘယ်လိုမှ အဆက်အစပ်မရှိတဲ့ နေရာတခုဖြစ်ပြီး သုံးထားတဲ့ အချိန်ကလည်း စနေနေ့ နေ့လည် ၁၂ နာရီကျော်မှာပါ…။ အဲဒီနေ့ အဲဒီအချိန်မှာ ကိုယ်က မိသားစုနဲ့ အပြင်မှာ ထမင်းစားနေတဲ့ အချိန် ပြီးတော့ အဲဒီ Credit Card ကလည်း ကိုယ်နဲ့ မကွာ ရှိနေတယ်။ အဲဒီကိစ္စကို တနင်္လာနေ့ညမှာ သိပြီး သိသိချင်း ဘဏ်ကို ဖုန်းဆက် အကျိုးအကြောင်း ပြောပြပြီး ကဒ်ကို ပိတ်ခိုင်းလိုက်ပါတယ်။ ဘဏ်က အဲဒီ Orchid Country Club ကို ဆက်သွယ်ပြီး ဘယ်လို ဖြစ်သလဲ အရင်စုံစမ်းပါလို့ ပြောတယ်။

ဒါနဲ့ နောက်တနေ့ မနက်မှာ အဲဒီ Orchid Country Club ကို ဆက်သွယ်ပါတယ်။ Orchid Country Club ရဲ့ Reception ကနေ တဆင့် Account Dept. ကို လွှဲပေးတယ်။ Account Dept. က ဒီစုံစမ်းမှုကို Official ဖြစ်စေဖို့ Email ပို့ ခိုင်းပါတယ်။ နှစ်ရက်အကြာမှာ သူတို့ဆီက စာပြန်လာပါတယ်။ သူတို့ဆီက ပြန်လာတဲ့ မှတ်တမ်း မှတ်ရာတွေအရ J နဲ့စတဲ့ နာမည်၊ စကာင်္ပူ နေရပ်လိပ်စာ အပြည့်အစုံနဲ့ အမျိုးသမီးတယောက် အဲဒီ Orchid Country Club မှာ တညတာ လာရောက် တည်းခိုအပြီးမှာ ကျသင့်ငွေကို ပေးသွားတာပါ။ Hotel တွေရဲ့ ထုံးစံအတိုင်း Check-in လုပ်တဲ့ အချိန်မှာ အဲဒီအမျိုးသမီးရဲ့ ကဒ်ကို Online Transaction နဲ့ Verify လုပ်ထားပါတယ်။ ပြီးတော့ သူ Check-out လုပ်တဲ့ အချိန်မှာမှ ကိုယ့်ကဒ်နံပါတ်နဲ့ ကျသင့်တဲ့ ပိုက်ဆံ ဒေါ်လာ ၃၀၀ ကျော်ကို ယူထားတာပါ။

ဂဏန်း ၁၆ လုံးစီပါတဲ့ Credit Card မှာ တိုက်တိုက်ဆိုင်ဆိုင် သူ့ရဲ့ ကဒ်နံပါတ်နဲ့ ကိုယ့်နံပါတ်နဲ့က နောက်ဆုံး ဂဏန်း သုံးလုံးပဲ ကွာပါတယ်။ ပြဿနာက ဘာလဲဆိုတော့ အဲဒီ ပိုက်ဆံယူတဲ့နေရာက Credit Card ကို Offline Transactions နဲ့ ကဒ်နံပါတ် ၁၆ လုံးကို တလုံးချင်းစီ နှိပ်ပြီး ပိုက်ဆံယူလိုက်တဲ့ ကိစ္စပါပဲ။ အဲဒီလို နံပါတ်တွေ နှိပ်တဲ့အချိန်မှာ နောက်ဆုံးနံပါတ် သုံးလုံး မှားနှိပ်မိတာ လို့ Orchid Country Club ရဲ့ တာဝန်ရှိပုဂ္ဂိုလ်က ရှင်းပြပါတယ်။

ကိုယ့်အတွက်တော့ Credit Card ကို Offline ကနေ နံပါတ်နှိပ်ပြီး ပိုက်ဆံယူတဲ့အဖြစ်ကို ဒါ ပထမဆုံးအကြိမ် ကြားဖူးတာပါ။ ဟိုအမျိုးသမီးကတော့ သူ့ရှေ့ Bill လာချရင် လက်မှတ်ထိုးလိုက်မှာပဲ၊ ကိုယ်တိုင်လည်း ဈေးဝယ်ပြီးရင် ကိုယ့်ရှေ့ကို Bill ရောက်လာရင် နံပါတ်တွေ ဘာတွေ ဘယ်ကြည့်ဖြစ်မှာလဲ၊ ဒီလိုပဲ လက်မှတ်ထိုးပေးလိုက်ကြတာပဲ မဟုတ်လား။ ဒါပေမယ့် ကိုယ့်ကဒ်နံပါတ်နဲ့ သူများလက်မှတ်ကြီးနဲ့ ဖြစ်နေတဲ့ ဒီကိစ္စမှာ Cashier က Payment ကို Offline Transactions နဲ့ ယူတာ ဘာကြောင့်လဲ… ဒါ ရိုးရိုးသားသား ဟုတ်ရဲ့လား လို့ တွေးစရာရှိတယ်။ အဲဒီအချိန်မှာ တာဝန်ကျ Cashier ဘယ်သူလဲ လို့ မေးတော့ အဲဒီပုဂ္ဂိုလ်က နာမည် မပြောပြပါဘူး ပြီးတော့ အဲဒီလို Offline က ယူတာ ထုံးစံပါပဲလို့ ပြောတယ်…။ သူ အဲဒီလို ပြောပေမယ့် စိတ်ထဲမှာ သူတို့ဝန်ထမ်းတွေဖက်က ကာကွယ်ပြီး ပြောတယ်လို့ပဲ ထင်နေမိတယ်။ (Hotel လုပ်ငန်းမှာ အတွေ့အကြုံရှိတဲ့သူများ Check-Out လုပ်ရင် ဒီလို Offline နဲ့ ပိုက်ဆံယူကြတယ်များ ကြားဖူးပါသလား… သိရင် ပြောပြပေးစေချင်ပါတယ်)

ဒီကိစ္စဟာ Fraud Transaction မို့ ရဲတိုင်ပြီး အမှုဖွင့်ချင် ဖွင့်ပါ လို့ Bank က ပြောတယ်။ ရဲတိုင်မယ်ဆို Orchid Country Club က တာဝန်ရှိတဲ့သူတွေ၊ အဲဒီအချိန်မှာ တာဝန်ကျနေတဲ့ Cashier... ပြီးတော့ အဲဒီ J နဲ့ စတဲ့ အမျိုးသမီး... Hotel Reception က CCTV... စာရွက်စာတမ်း အထောက်အထားတွေ… စတာတွေနဲ့အတူ တိုင်လို့ရနိုင်ပါတယ်။ ဒါပေမယ့် ကိုယ်လည်း ဒီအမှုမှာ တချိန်လုံး ကန့်လန့် ကန့်လန့် နဲ့ ပါနေမှာလေ။ Orchid Country Club က သူတို့ အမှားမို့ ဒီ ပိုက်ဆံကို ပြန်ပေးမယ်လို့ ပြောတယ်။ ဒါပေမယ့် Banking တို့ရဲ့ ထုံးစံအတိုင်း ဒီ Bill ကိုတော့ ဆောင်လိုက်ရမယ် သူတို့ ပြန်ပေးမယ့် ပိုက်ဆံကတော့ ရက်ပေါင်း ၆၀ ကျော် ကြာမှ ဝင်မယ်။ ဒီတော့ ကိုယ်တိုင်က ရုံးရောက် ဂါတ်ရောက်နဲ့ အလုပ်ရှုပ် မခံနိုင်တော့တဲ့အတွက် ရဲတိုင်ဖို့ကိစ္စကို လက်လျှော့လိုက်ပါတယ်…။

ဒီနေရာမှာ ပြောချင်တဲ့ အရေးအကြီးဆုံး အချက်ကတော့ Credit Card တခုရဲ့ လုံခြုံမှုပါ။ Credit Card တွေကို ထပ်မပွားနိုင်အောင် Chip တွေ ထည့်လိုက်တာလည်း အားလုံး အသိပဲ။ Credit Card ကို သုံးပြီး Online မှာ တခုခု ဝယ်တော့မယ် ဆိုရင် (၅ ဒေါ်လာ ၁၀ ဒေါ်လာ ကစလို့) ကဒ်နံပါတ် ရိုက်ထည့်ပြီးရင် CCV ဆိုတဲ့ နံပါတ် ၃ လုံးကို ထည့်ကြရတယ်။ ဒီကမှတခါ ပိုပြီး လုံခြုံအောင် Hand Phone ထဲကိုလာတဲ့ OTP (One Time Password) ဒါမှမဟုတ် Bank တွေက ပေးထားတဲ့ IB Message Token လေးတွေကို နှိပ်… ဒီလို အဆင့်ဆင့် ဖြတ်ကျော်ပြီးမှ အသုံးပြုလို့ ရတယ် မဟုတ်လား။ အခုအတိုင်းဆို အဲဒါတွေအားလုံး Rubbish ပဲပေါ့…။

Credit Card တခုကို နံပါတ် ၁၆ လုံး သိရုံနဲ့ ဘယ်နေရာကမဆို Offline ကနေ သုံးလို့ရသလို ဖြစ်မနေပေဘူးလား။ ပြီးတော့ နံပါတ် ၁၆ လုံးကို ရိုက်ချင်သလို (Random) ရိုက်ပြီး ကျရာ နံပါတ်မှာ Offline နဲ့ အလွယ်တကူ ပိုက်ဆံသုံးလိုက်လို့ ရသလို ဖြစ်မနေပေဘူးလား။ တခါ Credit Card နံပါတ် ၁၆ လုံးမှာ ရှေ့ဆုံး ၄ လုံးက Bank Code မို့ ဆင်တူတယ်ထား… ကျန်တဲ့ နံပါတ် ၁၂ လုံးမှာ ၉ လုံး တူပြီး နောက်ဆုံး ၃ လုံးပဲ လွဲတယ်ဆိုတာရော ဖြစ်သင့်သလား...။ မေးခွန်းတွေ အများကြီးပါ။

အခု အဖြစ်အပျက်မှာ သုံးထားတဲ့ ပိုက်ဆံက စင်္ကာပူဒေါ်လာ ၃၀၀ ကျော်ဆိုတော့ သိပ်မနည်းပေမယ့် သိပ်များလှတယ်လို့လည်း မဆိုနိုင်ဘူး။ မပေးမဖြစ် ပေးရတော့မယ်ဆို ပေးနိုင်တဲ့ အခြေအနေမှာ ရှိသေးတယ်…။ ဒါပေမယ့် ဒီ့ထက်များတဲ့ Amount ဆို ဘယ်လိုလုပ်ကြမလဲ။ ပြီးတော့ အခု သုံးတဲ့နေရာက ဒီစင်္ကာပူမှာ… ချက်ချင်း ဖုန်းဆက်လို့ ရတဲ့နေရာ၊ မတတ်သာလို့ လူကိုယ်တိုင် သွားရစေဦးတော့ နာရီဝက်အတွင်း အရောက် သွားနိုင်တဲ့ နေရာ…။ တကယ်လို့များ တခြား တနိုင်ငံ ကိုယ်လက်လှမ်းမမှီတဲ့ နေရာကနေ တကြိမ်ထဲနဲ့ Credit Limit ကုန်အောင် သုံးသွားရင် ဘယ်လိုရှင်းရပါ့မလဲ…။

ပြီးတော့ ဒီပုံအတိုင်းဆိုရင် ကိုယ့် Credit Card က နံပါတ်တွေကို လူမမြင်အောင် သေသေချာချာ သိမ်းထားရတော့မလို ဖြစ်နေပြီပေါ့။ စားသောက်ဆိုင်တွေမှာ ထိုင်ရာက မထပဲ စားပွဲထိုးကို Credit Card လေး လှမ်းပေးပြီး ပိုက်ဆံရှင်းတဲ့ အချိန်တွေမှာရော စိတ်ချရပါတော့မလား။ ဒီခေတ်ကြီးမှာ ဖုန်းတွေတိုင်းမှာ ကင်မရာတွေ ပါနေကြတာ… ကိုယ့် ကဒ်ကို ယူသွားတုန်းမှာ ရှေ့ရော နောက်ပါ ဓါတ်ပုံရိုက်လိုက်ရင် အင်ဖေါ်မေးရှင်း အကုန်ပါသွားပြီ… တပျော်တပါး သုံးပါလေ့ပဲ…။

ပြီးတော့ Bank တွေနဲ့ ပတ်သက်လို့ ပြဿနာတခုခု ဖြစ်ပြီးရင် ပိုက်ဆံ ပြန်ရဖို့က ဟိုးနောက်ဆုံး အဆင့်မှာ… လောလောဆယ်မှာတော့ ဘာညာ မပြောနဲ့ Bill ထဲ ပါလာသမျှ အကုန်ရှင်းပေတော့ပဲ…သူတို့ ဖက်က လုံးဝ လျှော့ပေးတာ မဟုတ်ဘူး…။ (မရှင်းပြန်ရင် အတိုးက တက်လာအုံးမှာ…)

ပြီးခဲ့တဲ့ တပတ်ကတော့ ကိုယ့်အမျိုးသားက အဲဒီ DBS Bank က တာဝန်ရှိသူတယောက်ကို သူတို့ရဲ့ Credit Card လုံခြုံမှုစနစ်အကြောင်း Complaint လုပ်တဲ့ E mail တစောင် ရေးလိုက်တယ်။ ဒီကိစ္စအတွက် ကျိုးကြောင်း ညီညွတ်ပြီး ဆီလျော်တဲ့ ရှင်းလင်းချက်ပေးပါ… မင်း မရှင်းနိုင်ရင် ဒီစာကို ရှင်းပေးနိုင်တဲ့ အထက် လူကြီး (သို့) CEO အထိ တင်ပေးပါလို့ ပြောထားတယ်။ ခုထိတော့ Bill ကလွဲလို့ ဘာမှ ပြန်မလာသေးဘူး။

လောလောဆယ်မှာ ကိုယ့်မှာ ရှိနေတဲ့ အဲဒီ DBS Bank က Credit Card လေးခုကို ပြီးခဲ့တဲ့အပတ်က စလို့ တခုချင်း ဖျက်ပစ်နေပါပြီ။ ဘာလို့ဖျက်တာလဲ ဆိုတဲ့ အမေးကို လုံခြုံရေး စိတ်မချရလို့ လို့ ဖြေလိုက်ပါတယ်။ အားရလောက်စရာ ပါပဲ… သူတို့ဆီက ဘာမှ ရေရာတဲ့ တုန့်ပြန်မှု မရပါဘူး။ စင်္ကာပူနိုင်ငံရဲ့ အထင်ကရ ဘဏ်ကြီးတခုဖြစ်တဲ့ အဲဒီ DBS Bank ဟာ တဆိတ်တော့ တာဝန်မဲ့လွန်းတယ် လို့ ထင်မိတယ်။ ဘယ်မှာလဲ သူတို့ ပြောပြောနေတဲ့ လုံခြုံရေး… ဘာဆို ဘာတခုမှ မလုံခြုံဘူး…။

ကိုယ် ပေါ့ဆလို့၊ ကိုယ့်ကဒ်ပျောက်သွားလို့ မဟုတ်ပဲ အခုလို အသားလွတ်ကြီး ခံလိုက်ရတဲ့ ပြဿနာအတွက် အတော် စိတ်အနှောက်အယှက် ဖြစ်ရပါတယ်…။ ဘာ Credit Card မှ ကိုင်ချင်စိတ် မရှိတော့အောင်ပါပဲ…။ ဒါကြောင့် မိတ်ဆွေ သူငယ်ချင်းတွေကိုလည်း Credit Card နဲ့ ပတ်သက်ရင် သတိထားကြဖို့ အသိပေးချင်လို့ ဒီစာကို ရေးပါတယ်…။