Tuesday, November 20, 2018

တိမ်တိုက်ကြားက နားတစ်စုံ

(၁)

ကမ်းစပ်မှာ ခြေစုံရပ်ရင်းက ကျွန်တော်ဟာ ပင်လယ်ကိုကြည့်ဖို့၊ ပင်လယ်နဲ့ စကားစမြည်ပြောဆိုဖို့ ရောက်လာခဲ့တာပါလို့ လှမ်းပြောလိုက်တယ်။ ပြောသာပြောလိုက်တယ် တကယ့်တကယ်မှာ အသံက အသံအဖြစ်နဲ့ အပြင်ကို ထွက်မလာဘူး။ လည်ချောင်းတစ်ချက်ရှင်းလိုက်ပြီး နောက်တစ်ကြိမ် ပြောလိုက်တယ်။ ပြောတယ်လို့ သေချာအောင် ပါးစပ်လှုပ်ပေမယ့် အသံက လိုက်ထွက်မလာဘူး။ ဒါပေမယ့်လည်း လောလောဆယ်မှာ ကျွန်တော့်ရဲ့ အသံမပါတဲ့ စကားကိုပဲ ပင်လယ်ဟာ နားလည်သလိုဟန်နဲ့ လေတစ်ချက် ချွန်လိုက်တယ်။ ကျွန်တော် သိတယ်၊ ပင်လယ်ဟာ အလိုက်သိတယ်၊ အရာရာကို နားလည်တတ်တယ်၊ ခေါင်းတော့ ညိတ်မပြတတ်ဘူး ဒါပေမယ့် လေချွန်တတ်တယ်။ သူ လေချွန်တော့ ငြိမ်သက်နေတဲ့ ရေပြင်ဟာ လှုပ်လှုပ်ရှားရှားဖြစ်ပြီး ရေပြာတွေ နေရာရွေ့သွားတာကို အထူးအဆန်းလို ငေးစိုက်ကြည့်နေမိသေးတယ်။ တံတားအောက်က ဖြတ်စီးသွားတဲ့ ရေဆိုတာ သူတို့တွေလား။ မြစ်တစ်ခုမှာ ရေနှစ်ခါ ချိုးလို့မရနိုင်ဘူး ဆိုတာကရော ဒီလိုရေမျိုးတွေပဲလား။ ကမ်းစပ်က အုန်းပင်လို ပင်လယ်ကဗွီးလို အပင်တွေ ယိမ်းထိုးကခုန်နေတာ ညီညီညာညာ၊ အဲဒီအချိန်မှာ ဗန်ဒါလား ဗာဒံလား နာမည်မှန်မသိတဲ့ အပင်က အရွက်ခပ်ဝိုင်းဝိုင်းတွေ ကြွေကျလာတာ တွေ့ရတယ်။ အကျင့်ပါနေတဲ့အတိုင်း လည်ချောင်း (ထပ်) ရှင်းပြီး ပင်လယ်ကို စကားပြောဖို့ ကြိုးစား အားယူရပြန်တယ်။ ဘယ်အကြောင်းအရာကနေ စပြောရရင် ကောင်းမလဲ...

ဘယ်အကြောင်းအရာကနေ စပြောရရင်ကောင်းမလဲလို့ စဉ်းစားနေတုန်းမှာ နောက်ကျောဖက် ကားလမ်းမပေါ်က ကားတစ်စီး အရှိန်ပြင်းပြင်းနဲ့ ဖြတ်မောင်းသွားတယ်။ ကားရဲ့ စက်သံမှာကို အလျင်စလိုဟန်တွေ အများကြီးစွက်နေခဲ့တာ သတိပြုမိတယ်။ ဒါပေမယ့် မကြာခင်မှာ ကားစက်သံက တိကနဲ ရပ်သွားတယ်။ တကယ်ဆို အရာရာဟာ တဖြည်းဖြည်းဝေးရင် မှိန်ဖျော့ တိုးတိတ်ရင်းကမှ ကွယ်ပျောက်သွားရမှာမျိုး မဟုတ်ဘူးလား၊ ဒီနေရာမှာ ကိုယ့်အတွေးကို ကိုယ် ပြန်သဘောကျရပြန်တယ်၊ ကဗျာဆရာတွေ သုံးလေ့ရှိတဲ့ အသုံးအနှုန်းမျိုးပဲနော်... တဖြည်းဖြည်းဝေးရင် မှိန်ဖျော့တိုးတိတ်ရင်း ကွယ်ပျောက်သွားရမှာ မဟုတ်ဘူးလား တဲ့။ အခုကတော့ မလှမ်းမကမ်း မနီးမဝေးနေရာမှာတင် တိကနဲ ရပ်သွားရတဲ့အဖြစ်။

မနေနိုင်လို့ လှည့်ကြည့်လိုက်တော့ ကားက ပုံစံဟောင်းဟောင်းပဲ အရောင်က ဆေးပြယ်နေတဲ့ မွဲခြောက်ခြောက် နီညိုရောင် (တစ်ချိန်ကတော့ တော်တော်တောက်ပကောင်း တောက်ပခဲ့ပါလိမ့်မယ်) ကိုယ်ထည်က ခပ်ပြားပြား ရှည်ရှည်၊ ဘာကားအမျိုးအစားမှန်း မသိဘူး။ ကြည့်နေတုန်းမှာ ကားမောင်းသူဖက်က တံခါးတစ်ချပ်ပွင့်လာတယ်။ လူတစ်ယောက်... ကွဲကွဲပြားပြားပြောရရင် အမျိုးသားတစ်ယောက် ဆင်းလာတယ်။ ကားတံခါးကို ပြန်မပိတ်ပဲ ခြေလှမ်းသွက်သွက် လှမ်းလာပုံကလည်း တဆိတ်တော့ အလျင်စလိုဟန် တွေ ပါနေတာပါပဲ။ သူက ကျွန်တော်ရပ်နေတဲ့နေရာကို တန်းတန်းမတ်မတ် လျှောက်လာနေတယ်။ ရှပ်အင်္ကျီ ဖြူဝါဝါနဲ့ ကာကီရောင် ဘောင်းဘီ ကို ဝတ်ထားတယ်။ လူပုံက ပိန်ပိန်ရှည်ရှည်ပဲ။ ဝေးနေတာကြာင့်ရော ဦးထုပ်ကို ခပ်စိုက်စိုက် ဆောင်းထားတာကြောင့်ရော သူ့မျက်နှာကိုတော့ သေသေချာချာ မမြင်ရဘူး။ ဒါပေမယ် သေချာတာက သူ့ကို ကျွန်တော် မသိဘူး။ ကျွန်တော့မှာ သူ့လိုပုံစံနဲ့ မိတ်ဆွေ မရှိဘူး။ ပြီးတော့ ဒီလိုကားမျိုးမောင်းတဲ့ မိတ်ဆွေ မရှိဘူး။ တကယ်တော့ ကျွန်တော့ မိတ်ဆွေစာရင်းဟာ လက်ချိုးရေလို့ ရအောင်နည်းပါးပါတယ်။ အဲဒီအကြောင်းတွေ ခဏထားလိုက်ဦးစို့... ဆက်ပြောရင် စကားပြောစရာ မိတ်ဆွေမရှိလို့၊ အသံမထွက်တော့လို့၊ ကိုယ့်အသံ ကိုယ် ပြန်မမှတ်မိတော့လို့ ပင်လယ်နဲ့ လာစကားပြောရတယ်တွေ ဘာတွေ အကျယ်အကျယ် ဖြစ်ကုန်လိမ့်မယ်။ လောလောဆယ်တော့ ကျွန်တော့်ဆီ ဦးတည်ပြီး လျှောက်လာနေတဲ့လူအကြောင်းပဲ ဆက်ပြောရအောင်။

(၂)
သူက ခပ်သွက်သွက်ခြေလှမ်းတွေနဲ့အတူ ကျွန်တော့်ဆီ ဦးတည်ပြီး လျှောက်လာနေရင်းက လက်နှစ်ဖက်ကို လေထဲမှာ ဝှေ့ယမ်းလိုက်တာ တွေ့ရတယ်။ သူ့ဟန်ပန်က အနှစ်နှစ် အလလကွဲကွာနေတဲ့ အသိမိတ်ဆွေ တစ်ယောက်ယောက်ကို တွေ့လို့ အားရဝမ်းသာ လှမ်းပြီး လက်ပြလိုက်တဲ့ ဟန်ပန်မျိုး။ ခက်နေတာက ကျွန်တော်က သူ့ကို မသိဘူး။ ဒီတော့ သူ ကျွန်တော့်ကို လက်ပြနေတာ ဘယ်နည်းနဲ့မှ မဖြစ်နိုင်ဘူးလို့ ယူဆတယ်။ ဒါပေမယ့် သူ့ကြည့်ရတာ တကယ့်ကို တရင်းတနှီးနဲ့၊ ကျွန်တော် ကြံရာမရဖြစ်ပြီး အနောက်ဖက်ကို ယောင်ယမ်း လှည့်ကြည့်နေမိသေးတယ်။ ကျွန်တော့်ကို ကျော်ပြီး နောက်ကျောဖက်မှာ လက်ပြနှုတ်ဆက်စရာ တစုံတစ်ယောက်များ ရှိနေမလားလို့ပါ။ ဒါပေမယ့် ဖြစ်ချင်တော့ ကျွန်တော့်ရဲ့ ရှေ့နောက် ဘေးဘီဝဲယာမှာ ဘယ်သူမှ ရှိမနေဘူး။ အရိပ်မရှိတဲ့ ဟောဒီ ပင်လယ်ကမ်းစပ်တစ်လျောက်မှာ ရပ်နေသူဆိုလို့ ကျွန်တော် တစ်ယောက်တည်းဗျာ၊ ဆိုတော့ သူ လက်ပြနေသူဟာလည်း ကျွန်တော်ပဲလို့ သေချာလိုက်ရတယ်။ ခက်တာက ကျွန်တော် သူ့ကို မသိဘူး။

တဖြည်းဖြည်းနဲ့ သူက ကျွန်တော့်အနားကို နီးလာနေပြီ။ "ဟေ့လူ… ခင်ဗျာကို ကျွန်တော် မသိဘူးဗျ” လို့ ခပ်မြန်မြန် ပြောပစ်လိုက်ချင်တယ်၊ အသံထွက်ပြောဖို့ အားယူလိုက်တော့ “ဟေ့…” ဆိုတဲ့ မပီမသ ခြောက်ကပ်ကပ်အသံတစ်မျိုးက လည်ချောင်းဝကို အရင်ဆုံး ရောက်လာတယ်။ နောက်တစ်ခွန်း… “ဟေ့လူ…” ဆိုတဲ့ အသံ ကျွန်တော့်ဆီက ထွက်လာတဲ့ အချိန်မှာပဲ သူက ခပ်သွက်သွက်ခြေလှမ်းတွေနဲ့အတူ ကျွန်တော်နဲ့ နှစ်ပေလောက်အကွာကို ရောက်နေခဲ့ပြီ်။ အနားကို ရောက်ရောက်ချင်း “ဒီနေ့ နေသိပ်ပူတယ်… နေပူကြီးထဲမှာ ခင်ဗျား ဘာရပ်လုပ်နေတာလဲ၊ ဘာတွေ လိုက်ရှာနေတာလဲ" လို့ သူက မေးခွန်းထုတ်တယ်။ ကျွန်တော်မှာတော့ တအံ့တသြနဲ့ သူ့ကိုကြည့်ရင်း “ခင်ဗျားကို ကျွန်တော် မသိဘူး” လို့ ပြောထွက်ဖို့ ကြိုးစားနေရတုန်း။ အဲဒီအချိန်မှာပဲ သူက နောက်တစ်ခွန်း ထပ်မေးတယ် “ခင်ဗျား တစ်ခုခု ရှာနေတာ မဟုတ်လား” တဲ့။ သူစကားပြောတဲ့ အသံက တော်တော်နားထောင်လုိ့ကောင်းတယ်၊ ကြည်လင်ပြီး အသံချိုတယ်။ သီချင်းဆိုရင် အင်မတန် လူကြိုက်များ အောင်မြင်မယ့် အသံမျိုးပဲ လို့ စိတ်ထဲကနေ ကြိတ်ပြီး မှတ်ချက်ချမိသေးတယ်။

ကျွန်တော့်မှာ သူ့အမေးကို ဖြေစရာ စကားမရှိဘူး။ ဒါနဲ့ သူ့ကိုတစ်လှည့်၊ လမ်းလယ်ခေါင်မှာ တံခါးဖွင့်ရင်း ရပ်ထားခဲ့တဲ့ ကားကိုတစ်လှည့် ကြည့်ရင်း “ခင်ဗျားကို ကျွန်တော် မသိဘူး” လို့ ပြောလိုက်တယ်။ ကျွန်တော့အသံက တိုးလို့လား ဒါမှမဟုတ် မသဲကွဲလို့လား မသိ၊ သူက ဘာမှ လှုပ်လှုပ်ရှားရှား ဖြစ်ဟန်မပြဘူး။ ပင်လယ်ဖက်ကို မျက်နှာမူပြီး ငေးကြည့်နေရင်းက "ဟိုးမှာ တွေ့လား တိမ်တွေ… အဲဒီတိမ်တွေဆီ အလည်သွားမလို့ ကောင်းကင်ပေါ်တက်ရအောင် လှေခါးတစ်စင်း လိုက်ရှာနေတာဗျ..." လို့ ပြောတယ်။ ရုတ်တရက် ကျွန်တော် လန့်သွားတယ်။ လန့်ဆို သူ့အသံကလည်း လိုတာထက် နည်းနည်းပို ကျယ်နေတာကိုး။ တစ်ဆက်တည်းမှာပဲ "လှေခါးရရင် ဘယ်မှာမှီထားရမလဲ ဒါမှမဟုတ် ဘာနဲ့ ထောက်ရမလဲဆိုတာပါ ထည့်စဉ်းစားရမယ် မှီစရာ တစ်ခုခု ဒါမှမဟုတ် ထောက်စရာ ဒေါက်တစ်ခုတော့ မရှိမဖြစ် လိုအပ်နေတယ်" လို့ သူ့ဟာသူ ပြောသလိုလို ကိုယ့်ကို မေးသလိုလိုနဲ့ ဆက်ပြောပြန်တယ်။ ဖြစ်ရလေ… ကောင်းကင်ပေါ်ရောက်အောင် တက်ဖို့ လှေခါးအတွက် ထောက်ထားစရာ အမှီအတွယ်တစ်ခု လိုက်ရှာနေသတဲ့။ သူ့ကို "ဒီမှာ… ဒီမှာ… ခင်ဗျား အေ ပုံသဏ္ဍာန် လှေခါးမျိုး တွေ့ဖူးသလား..." လို့ မေးလိုက်တယ်။ အေ ပုံသဏ္ဍာန် လှေခါးဆိုတာ တစ်ဖက်နဲ့ တစ်ဖက် မျှခြေညီအောင် ပြန်ထိန်းထားပြီး မှီတွယ်စရာ မလိုအပ်၊ သူ့ဟာသူ ရပ်တည်နိုင်တဲ့လှေခါးမျိုး။ သူက ခေါင်းယမ်းပြတယ်။ သူ့ကမ္ဘာမှာ အဲဒီလှေခါးမျိုး မရှိဘူး တဲ့။ သူ့စကားကိုကြားရတာ အံ့သြပြီး ရယ်ချင်ပေမဲ့ သူ့ကမ္ဘာ ဆိုတဲ့ အသုံးအနှုန်းကို မမျှော်လင့်ပဲ နှစ်သက်သွားတာကြောင့် မရယ်ဖြစ်တော့ဘူး။ သူ့ကမ္ဘာ တဲ့… ဒါဆို ကျွန်တော့်ကမ္ဘာကရော ဘယ်လိုများပါလိမ့်။

တစ်ချိန်တည်းမှာ ခေါင်းကို သုံးရာ့ခြောက်ဆယ် ဒီဂရီ ချာလပတ်လည်နေအောင် ဟိုမော့ ဒီမော့လုပ်နေတဲ့ သူ့ကို ကြည့်ရင်း ခင်မင်နှစ်လိုစိတ်ဝင်လာတယ်။ သူ့ကို မိတ်ဆွေဖွဲ့ချင်၊ စကားစမြည် ပြောချင်စိတ်ပေါ်လာတာကြောင့် “ဒါဆိုရင် ခင်ဗျားကို အေ ပုံသဏ္ဍာန် လှေခါးကူရှာပေးမယ်...” လို့ ပြောလိုက်တယ်။ ကျွန်တော့်အသံက ရှောရှောရှူရှူ သွက်သွက်လက်လက်ပဲ၊ ကိုယ့်ကိုယ်ကိုယ်တောင် ပြန်ပြီး အံ့အားသင့်နေမိသေးတယ်။ သူက ပြန်ပြောတယ်... ဒုက္ခမရှာပါနဲ့ဗျာ ကျွန်တော်က ကျွန်တော့်ကြောင့် ဘယ်သူ့မှ တာဝန်မပိုစေချင်ဘူး တဲ့။ တော်တော်လာတဲ့သူ...

ပြီးတော့ ဘာမပြောညာမပြော၊ သူ့ရဲ့ ညာဖက်လက်ကို ကျွန်တော့ဆီ ဟန်ပါပါနဲ့ ဆန့်တန်းပေးတယ်။ ဟာ... တယ်ဟုတ်ပါလား လို့ တွေးပြီး ရယ်ချင်စိတ်တစ်ဝက်နဲ့ လက်ဆွဲနှုတ်ဆက်လိုက်ရတယ်။ ရုတ်တရက်ဆိုတော့ သူ့ဆီက ဒီလိုအပြုအမူမျိုးကို မျှော်လင့်မထားဘူးလေ။ ဒါပေမဲ့ သူ လက်ကမ်းပေးပုံက သိပ်တော့ အဆင်ပြေပြေ ချောချောမွေ့မွေ့ မရှိလှဘူး။ အလေ့အကျင့်မရှိသလို၊ ကြိုးစားပြီး ကျင့်ယူထားရသလိုမျိုး၊ ထောင့်တောင့်တောင့်နဲ့။ ဒါပေမယ့် သူ့မျက်နှာကတော့ ဘာမှမထူးဆန်းလေဟန်၊ အေးအေးဆေးဆေး သက်တောင့်သက်သာပါပဲ။ တကယ့်ပွဲကြီးလမ်းကြီးတွေမှာ ယဉ်ကျေးဖွယ်ရာ နှုတ်ဆက်သလို ကျုပ်နာမည် ဘယ်သူပါ ဘယ်ဝါပါ ဆိုတာမျိုးတော့ သူ မပြောဘူး။ သူမပြောတော့ ကိုယ်လည်း မပြောရုံပေါ့။ ဒီလိုနဲ့ လက်ကို နှစ်ချက် သုံးချက် လှုပ်ယမ်းပြီး (ဟန်ဆောင်မှု ကင်းကင်းနဲ့) နှုတ်ဆက်လိုက်ကြတယ်။ အဲဒီကစပြီး သူနဲ့ ကျွန်တော် ရိုးရိုးရှင်းရှင်း မိတ်ဆွေအဖြစ်ကို ရောက်သွားကြတာပဲ။

(၃)
သူနဲ့ ကျွန်တော်ရဲ့ မိတ်ဆွေ ဘဝဟာ ပျော်စရာကောင်းတယ်။ သူလည်း ပျော်တယ်လို့ နှစ်ခါ သုံးခါမက ပြောဘူးတယ်။ သူ ဘာကြောင့်ပျော်တယ်ဆိုတာ ကျွန်တော် မသေချာဘူး။ ကျွန်တော်ကတော့ ကိုယ့်အသံ ကိုယ်ပြန်ကြားရလို့ ပျော်တာပါ။ အရင်ကလို သစ်ပင်တွေ သစ်ရွက်တွေ၊ မြက်ခင်းတွေနဲ့ ပင်လယ်ကို သွားပြီး စကားပြောကျင့်စရာ မလိုတော့ဘူးဆိုတာ ကျွန်တော့်အတွက်တော့ ပျော်စရာတစ်ခု မဟုတ်လား။ သူက ပင်လယ်ကို ချစ်တယ် ဒါပမယ့် ရေထဲမဆင်းချင်ဘူး၊ အဝတ်တွေရေစိုတာ သူ မကြိုက်ဘူး။ တိမ်တွေဆီ အလည်အပတ်သွားဖို့ကိစ္စကိုတော့ မကြာခဏ ပြောဖြစ်ကြတယ်။ တိမ်တွေပေါ်ကို တက်စရာ လှေခါးရှာကြဦးမလား လို့မေးရင် ခေါင်းကို တဆတ်ဆတ်ညိတ်ရင်း ဟက်ဟက်ပက်ပက် ရယ်နေတတ်တယ်။ သူက ပြောသေးတယ်၊ အဲဒီနေ့က ကျွန်တော့်ကို သူအဲဒီလိုပြောလိုက်တော့ ကျွန်တော် အံ့အားသင့်နေတဲ့ မျက်နှာဟာ သိပ်ရယ်စရာကောင်းသတဲ့။ နေနှင့်ဦးပေါ့ ကိုယ့်လူရာ… ကျုပ်ကလည်း ခင်ဗျား လှေခါးအတွက် ထောက်စရာ မှီစရာရှာတယ်ဆိုတာကို သိပ်ရယ်ချင်တာပါပဲ။ 

ကျွန်တော်တို့ ပထမဆုံး မိတ်ဆွေဖြစ်ခဲ့ရတဲ့နေရာ - ပင်လယ်ကမ်းစပ်မှာ စနေနေ့တိုင်း ဆုံလေ့ရှိကြတယ်။ ပြီးရင်တော့ သူ့ရဲ့ စက်သံကြမ်းကြမ်းနဲ့ ကားဟောင်းကြီးကိုမောင်းပြီး လူတွေနဲ့ဝေးဝေး ပန်းခြံတစ်ခုထဲက ရေကန်ကြီးဘေး အရိပ်ကောင်းတဲ့ သစ်ပင်အောက်မှာ သွားထိုင်ကြတယ်၊ တစ်ခါ တစ်ခါ ဝိုင်အနီတွေ သောက်ကြတယ်။ ကျွန်တော်က ဝက်ပေါင်ခြောက်နဲ့ ဒိန်ခဲတွေ ဝယ်သွားတယ်။ သူကတော့ အာလူးချောင်းကြော်နဲ့ ကြက်ကြော်တွေ ယူလာတတ်တယ်။ စာအုပ်တွေလည်း သူ့ကားထဲမှာ တော်တော်များများ ပါလာတတ်တယ်။ အများအားဖြင့်ကတော့ နံရံအမြင့်ကြီးတွေအကြောင်း၊ တံတိုင်းတွေအကြောင်းနဲ့ လှေခါးတွေအကြောင်း ရေးထားတဲ့ စာအုပ်မျိုး၊ စာနည်းနည်း ပုံများများနဲ့ စာအုပ်ထူထူတွေ။ ကျွန်တော်ကတော့ သူ့ကို အင်ဂျင်နီယာလို့ ထင်နေတာပဲ၊ မေးတော့ မမေးဖြစ်ဘူး။ သူကလည်း ကျွန်တော့ကို ဘာမှ မမေးဘူး။ တစ်ရက်ကတော့ ကျွန်တော့လက်ထဲကိုင်လာတဲ့ ကဗျာစာအုပ်ပါးလေးကို သူယူကြည့်တယ်၊ ပြီးတော့ ကဗျာတွေ ရေးရ ဖတ်ရတာ ဘယ့်နှယ့်နေသလဲဗျ လို့ မေးတယ်။ ကျွန်တော်ဘာမှ ပြန်မပြောရသေးခင်မှာပဲ သူက ကဗျာတိုလေးတွေ ကြိုက်တယ် ဥပမာ မောင်ပန်းမွှေးပေါ့ဗျာ… တဲ့။ ခဏနေတော့ ကျွန်တော်တို့နှစ်ယောက် “မောင်ပန်းမွှေး ပို့စကဒ်ထဲက ကဗျာလေးတွေ ကူးရေးမယ်…” ဆိုတဲ့ ကိုင်ဇာရဲ့သီချင်းကို လက်ခုပ်တီးပြီး အတူတူ ဆိုကြတယ်၊ သီချင်းဆုံးတော့ တစ်ယောက်မျက်နှာ တစ်ယောက်ကြည့်ပြီး ရယ်မောလိုက်ကြတယ်။ သူ့မျက်နှာမှာ ဘာမှ ထူးထူးခြားခြား အရိပ်အယောင်တွေ ရှာမရပေမယ့် ကျွန်တော်ကတော့ ပျော်နေတယ် ဆိုတာ သေချာပါတယ်။ မိတ်ဆွေတစ်ယောက်နဲ့အတူ သဘာဝနဲ့ မလှမ်းမကမ်းမှာ ထိုင်ကြတယ်။ ဟိုရောက် ဒီရောက် စကားတွေပြောရတယ်၊ ဝိုင်အတူ သောက်ရင်း ရီဝေရတယ်၊ စာလေး ကဗျာလေး ဖတ်ကြတယ် တစ်ခါတစ်ခါ သီချင်းဆိုကြတယ်၊ ဒါဆို ဘဝဟာ အတန်အသင့်တော့ ပြည့်စုံပြီး နေပျော်စရာပဲ မဟုတ်လား။ 

ကျွန်တော်တို့နှစ်ယောက်ဟာ ကိုယ်စီဘဝတွေအကြောင်း မပြောကြဘူး၊ လွမ်းတဲ့ ဆွေးတဲ့အကြောင်းတွေ မပြောကြဘူး၊ အသည်းကွဲဖူးသလားလို့ မမေးကြဘူး၊ လက်ရှိ ကမ္ဘာ့နိုင်ငံရေးအကြောင်း မပြောဘူး။ ကိုးကွယ်ယုံကြည်တဲ့ ဘာသာရေးအကြောင်း မဆွေးနွေးဘူး။ ဘာစီးပွားရေးလုပ်သလဲဆိုတာ မဆွေးနွေးတဲ့အပြင် ဝင်ငွေအကြောင်းလည်း ဘယ်သူမှ စကားမစကြဘူး။ မိုးရွာတဲ့နေ့တွေရောက်ရင်တော့ ထိုင်နေကျ သစ်ပင်အောက်မှာ မိုးမလုံတော့တာမို့ နေရာပြောင်းရတယ်၊ အဲဒီအခါကျရင်တော့ ရာသီဥတုအကြောင်း မဖြစ်မနေ ပြောဖြစ်တယ်။ ဒါလည်း ကြီးကျယ်ခန်းနားတာ ဘာတစ်ခုမှ မပါဘူး၊ ပေါ့ပေါ့ပါးပါးပါ၊ ကမ္ဘာကြီး ပူနွေးလာတာ အိုဇုန်းလွှာ ပေါက်လို့ ဆိုတဲ့ အချက်နဲ့ ရာသီဥတုတွေ ဆိုးဆိုးရွားရွား ဖေါက်ပြန်ရွေ့လျားလာတာကိုတော့ နှစ်ယောက်စလုံး လက်ခံကြတယ်။ လှေခါးရရင် အိုဇုန်းလွှာကို သွားဖာကြရင်ကောင်းမယ်ဗျ လို့ ကျွန်တော်ပြောတော့ သူ ခေါင်းည်ိတ်တယ်၊ လှေခါးရှာပြီး တိမ်တွေဆီသွားဖို့အရေးဟာ သူ့ရဲ့ အတွေးထဲ အတည်အခန့် နေရာယူထားတယ်ဆိုတာ ကျွန်တော် သိတာပေါ့။ တစ်ခါက ကမ္ဘာပေါ်မှာ လှေခါးထစ်တွေ အများဆုံးရှိတဲ့နေရာဟာ ဘယ်နေရာဖြစ်မလဲ လို့ သူ မေးဖူးတယ်၊ ကျွန်တော်ဖတ်နေကျ စာအုပ်ထဲမှာတော့ မရှိဘူး၊ စာကြည့်တိုက်မှာ သွားရှာပေးမယ်လို့ ပြောတော့ သူကျေနပ်သွားတယ်။ သူက တော်တော်အမြင့်ကြိုက်တဲ့သူပဲ၊ သူမက်နေကျ အိပ်မက်တွေထဲမှာ မရေမတွက်နိုင်တဲ့ လှေခါးထစ်တွေကို တက်ရတယ်၊ တောင်ကုန်းမတ်မတ်တွေကို တွယ်ကုတ်ပြီး တက်သွားရတယ် ပြီးတော့ တိမ်တွေဆီကို ရောက်သွားတယ် ဆိုတာမျိုးတွေ ပြောပြတတ်တယ်။ အဲဒါ ကျွန်တော်တို့ ကမ္ဘာပဲ။ 

(၄)
ဒီနေ့ စနေနေ့။ ကျွန်တော်တို့ ဆုံနေကျနေရာကို ဟိုးအရင်စနေကလည်း သူ ရောက်မလာဘူး။ ပြီးခဲ့တဲ့ စနေကလည်း သူရောက်မလာဘူး။ အခု ဒီစနေမှာလည်း ညနေစောင်းလို့ နေလုံးကြီး ပင်လယ်ထဲကို ငုတ်လျှိးသွားတဲ့အထိ သူရောက်မလာခဲ့ဘူး။ ဒါပါနဲ့ဆို စနေသုံးပတ်ရှိသွားပြီဆိုတော့ ကျွန်တော် နေမထိ ထိုင်မသာ ဖြစ်လာတယ်။ ခက်ပုံခက်နည်းက ကျွန်တော် သူနေတဲ့နေရာတို့ ဖုန်းနံပါတ်တို့ကို မေးမထားမိဘူး၊ ဒီတော့ သူ့ကို ဘယ်မှာ လိုက်ရှာရမှန်း၊ ဘယ်လို ဆက်သွယ်ရမှန်း မသိဘူး။ ယုတ်စွအဆုံး သူမောင်းလာတဲ့ နီညိုရောင် ကားရဲ့ နံပါတ်ကိုတောင် ကျွန်တော် သတိမပြုမိဘူး မှတ်မထားမိဘူး။ ဆုံနေကျ စနေနေ့တိုင်း တော်ဝင်ပန်းဥယျာဉ်ထဲက သစ်ပင်ကြီးအောက်မှာပဲ သွားစောင့်နေမိတယ်။ ဒီလိုနဲ့ ရက်သတ္တ လေးပတ်မြောက်တဲ့နေ့မှာ ဖတ်လက်စ နေ့စဉ်သတင်းစာတစ်စောင်ကို ကိုင်ရင်း ကျွန်တော်တို့ ဆုံနေကျ သစ်ပင်အောက်ကို ရောက်သွားတယ်။ စောင့်ရမှာက ကျွန်တော့အလုပ်ပဲ မဟုတ်လား။ မိုးမခပင်ကြီးတစ်ပင်အောက်က ခုံတန်းလျားလေးမှာ ထိုင်ပြီး သူ့ကို စောင့်နေရင်း လက်ထဲမှာ ကိုင်လာတဲ့ သတင်းစာထဲက ကားကြော်ငြာတွေကို တွေ့ရတော့ တစ်ခု သတိရသွားတယ်။ သူ့ကား စက်တစ်ခုခုချို့ယွင်းနေလို့လား လို့ အတွေးရောက်တယ်။ ဒါနဲ့ ကျွန်တော်တို့နေရာနဲ့ မနီးမဝေးမှာရှိတဲ့ ကားဟောင်း ကားသစ်တွေ ပြုပြင် ရောင်းဝယ် ဖေါက်ကားရာမှာ နာမည်ကြီးလှတဲ့ နေရာတစ်ခုကို ရောက်အောင်သွားတယ်။ မျက်စိတစ်ဆုံးကျယ်လွင့်တဲ့ မြေကွက်လပ်ကြီးထဲမှာ ကားတွေ ကားတွေ နည်းတာမဟုတ်ဘူး… အဲဒီ ထောင်ချီနေအောင် များပြားလှတဲ့ အရွယ်စုံ အရောင်စုံ အမျိုးအစားစုံလင်လှတဲ့ ကားတွေထဲမှာ နီညိုရောင် ပြားပြားရှည်ရှည် ကားတစ်စင်းကို လိုက်ရှာနေမိတယ်။ သူနဲ့ပတ်သက်ရင် ကျွန်တော်သိသမျှက အဲဒီကားနီညိုရောင်ပဲ မဟုတ်လား။ 

ကျွန်တော် ထင်တဲ့အတိုင်းပါပဲ။ တမျှော်တခေါ်မြင်နေရတဲ့ ကားဟောင်းတွေအများကြီးထဲမှာ ဆေးပြယ်နေတဲ့ မွဲခြောက်ခြောက် နီညိုရောင်ကားကို ကျွန်တော်တွေ့နေရပြီ။ သေသေချာချာကြည့်တော့ ကားရဲ့ ခေါင်းပိုင်းဟာ ပိန်လိန်ရှုံ့တွနေတယ်။ မီးလုံးတွေကလည်း ကွဲလို့။ ကားရဲ့ အရှေ့မှန်ကလည်း မရှိတော့ဘူး။ ရုတ်တရက် အတွေးတစ်ခု ခေါင်းထဲ ဖြတ်ပြေးသွားတယ်။ ဒါပေမယ့် အတွေးကို ချက်ချင်းဖျောက်ပြီး ဖွ ဖွ လွဲပါစေ ဖယ်ပါစေ… လို့ ခပ်တိုးတိုး ရွတ်လိုက်မိတယ်။ အဲဒီတုန်းမှာ စက်ဆီတွေ ပေကျံနေတဲ့ ဝတ်စုံကိုယ်စီနဲ့ လူတစ်စု အနားက ဖြတ်သွားတာတွေ့လို့ ဟိုကား နီညိုကို ညွှန်ပြပြီး သိချင်တာကို မြန်မြန်မေးရတယ်။ သူတို့ထဲက တစ်ယောက်က ခပ်လှမ်းလှမ်းမှာ မြင်နေရတဲ့ ဂိုထောင်ကို မေးဆတ်ပြတယ်။ အဲဒီမှာ သွားမေးပါတဲ့။ ကျွန်တော်လည်း ထူပူနေတော့ ကျေးဇူးတင်စကားကိုတောင် ကသောကမျော ပြောပြီး ဂိုထောင်ရှိရာကို သုတ်ခြေတင်လာခဲ့တယ်။ ဂိုထောင်ထဲမှာရှိတဲ့ လူနှစ်ယောက်ကို အကျိုးအကြောင်းပြောပြတော့ သူတို့က စာအုပ်တစ်အုပ် ထိုးပေးတယ် အဲဒီအထဲမှာ ရှာကြည့်ပါ တဲ့။ ကားပုံနဲ့ ကားပိုင်ရှင်ပုံတွေကို နေ့စွဲအလိုက် စာရင်းသွင်းထားတယ်။ ကျွန်တော့်ဆီကို သူရောက်မလာတဲ့ စနေနေ့ကို နောက်ပြန် ပြန်တွက်ကြည့်ပြီး အဲဒီရက်အပိုင်းအခြားကို ရှာရတယ်။ တွေ့ပါပြီ… သူမှ သူ အစစ်။ ဓါတ်ပုံထဲမှာ သူက ထုံးစံအတိုင်း မထီတရီအပြုံးနဲ့။ ပုံအောက်က စာထဲမှာတော့ ကျွန်တော်တို့ ချိန်းတဲ့နေရာကို သူ ရောက်မလာခဲ့တဲ့ ပထမဆုံး စနေနေ့ နေ့စွဲကို ရေးထားတယ်။ ပြီးတော့… အမြန်လမ်းမကြီး နံပါတ် အေ (၄၀) ၊ ထွက်ပေါက်အမှတ် (၂၂) ၊ ကားမတော်တဆ၊ နေရာတွင် ချက်ချင်း ကွယ်လွန် တဲ့။ စာကြောင်းတိုလေးတွေ… အဲဒီစာကြောင်းတိုလေးတွေဟာ ကျွန်တော့်အတွက်တော့ ဖတ်လို့ မဆုံးနိုင်အောင် တရှည်တလျားနဲ့မို့ အထပ်ထပ်ဖတ်ရင်း မယုံနိုင်စရာ ရင်ဘတ်ထဲမှာ စူးအောင့် နာကျင်မှုကို ခံစားရတယ်။ ဒါ ပင်လယ်ကို ရောက်ဖို့ မောင်းလာရတဲ့ လမ်းမကြီးပဲ။ ထွက်ပေါက်နံပါတ် (၂၂) က ထွက်လိုက်ပြီး ဆယ်မိနစ်လောက် ဆက်မောင်းလိုက်ရင် ပင်လယ်ကမ်းစပ်ကို ရောက်တယ်လေ။ ခင်ဗျား ဗျာ… ဆယ်မိနစ်လောက်လေး လိုတော့တာ ဘာဖြစ်လို့ ရောက်အောင် မောင်းမလာနိုင်ခဲ့တာလဲ လို့ တတွတ်တွတ် ရေရွတ်နေမိတယ်။ ဒါပေမယ့် အသံက အပြင်ကို ထွက်မလာခဲ့ဘူး။ စာအုပ်ကို ဘယ်လို ချထားခဲ့သလဲ၊ ဂိုထောင်ထဲက လူတွေ ဘာဖြစ်ကျန်ခဲ့သလဲ၊ ဂိုထောင်အပြင်ကို ဘယ်လိုခြေလှမ်းတွေနဲ့ ရောက်လာခဲ့သလဲ ကျွန်တော် မသိတော့ဘူး၊ ဘာဆို ဘာမှ မသိတော့ဘူး။ 

သိတဲ့အချိန်မှာ ကျွန်တော်တို့နှစ်ယောက် ဆုံနေကျ ပင်လယ်ကမ်းစပ်နားကို ရောက်နေခဲ့ပြီ။ လှိုင်းတွေက ကမ်းစပ်ကို အဆက်မပြတ် ရိုက်ခတ်နေကြတယ်။ လေအေးအေးလေးက ညင်ညင်သာသာတိုက်လို့။ သာယာတဲ့ ညနေခင်းတစ်ခုပါ၊။ ကောင်းကင်ပေါ်ကို မော့ကြည့်တော့ တိမ်တွေက ကျွန်တော့ကို ပြုံးပြနေသလိုပဲ။ ဟိုလူက သူချစ်တဲ့ တိမ်တွေဆီကို လှေခါးရှာစရာမလိုပဲ ရောက်သွားပြီဆိုတာ သေချာပါတယ်။ အခု သူ တိမ်တွေကြားကနေ ကျွန်တော့ကို ပြုံုးပြနေတယ်။ ဟေ့လူ… ခင်ဗျားက ကောင်းကင်မှာနေရင် ကျုပ်က ပင်လယ်မှာ နေမှာပေါ့ဗျ လို့ လှမ်းပြောလိုက်တယ်။ အသံကတော့ အပြင်ရောက်မလာခဲ့ဘူး။ စကားအဆုံးမှာ တိမ်တိုက်တွေက နားလည်သလို ပျော်ရွှင်ဟန်နဲ့ ဖြေးဖြေးလေး ဟိုဖက် ဒီဖက် ယိမ်းထိုး ကခုန်လို့။ အဲဒီအချိန်မှာ “သိပ်ဆွေးကြောင်း တို့ သိသွားအောင် စာရွက်ပေါ် ရေစက်ချကွယ်…” ဆိုတဲ့ သီချင်းကို လက်ခုပ်တီးပြီး အတူတူဆိုရင်း ဟက်ဟက်ပက်ပက် ရယ်မောခဲ့ဖူးတာကို ရုတ်တရက် သတိရသွားတယ်။ အခုကတော့ ရေစက်တွေ ဘာတွေ ချနေစရာ မလိုပါဘူး။ အဆက်မပြတ်ကျနေတဲ့ မျက်ရည်စက်တွေက လက်ထဲမှာ ကိုင်ထားတဲ့ သတင်းစာရဲ့ စာမျက်နှာတွေပေါ်မှာ သူ့အလိုလို စိုစွတ်နေခဲ့တာပါ။

(၅)
အဲဒီနောက်ပိုင်းမှာ ကျွန်တော်လည်း အသံထွက်ဖို့ကို လုံးဝနီးပါး မေ့လျော့သူတစ်ယောက် ဖြစ်သွားခဲ့တယ်။ ဒါပေမယ့် မိသားစုရဲ့ စီစဉ်တိုက်တွန်းမှုနဲ့ မနက်ဖြန် ကျွန်တော် ဆရာဝန်တစ်ယောက်နဲ့ သွားတွေ့ရမယ်။ လက်ထဲမှာ အဆင်သင့်ရှိနေတဲ့ လိပ်စာကဒ်ပြားကို ငုံ့ကြည့်လိုက်တယ်။ ဆရာဝန်နာမည်ရဲ့ အောက်မှာ ရေးထားတဲ့ စာကြောင်းက နား နှာခေါင်း လည်ချောင်း နဲ့ အသံလမ်းကြောင်းဆိုင်ရာ အထူးကု သမားတော်ကြီးတဲ့။ ကျွန်တော် နည်းနည်းပြုံးမိတယ်၊ ကျွန်တော့်မှာ အရင်က မိတ်ဆွေတစ်ယောက်ရှိခဲ့ဖူးတဲ့အကြောင်း၊ သူဟာ အထူးကု သမားတော်တစ်ယောက် မဟုတ်ပေမယ့် ကျွန်တော် အသံထွက်လာအောင် ကုသနိုင်စွမ်းရှိတဲ့အကြောင်း၊ ဒီလို ဂုဏ်ထူး ဘွဲ့ထူးတွေနဲ့ ပညာတွေ မရှိပေမယ့် သူနဲ့တွေ့ရင် ကျွန်တော် အလိုလို အသံထွက်တဲ့အကြောင်းနဲ့အတူ အခုဆိုရင် သူဟာ လှေခါးမလိုပဲနဲ့ တိမ်တွေပေါ်ကို ရောက်အောင် တက်သွားနိုင်တဲ့သူတစ်ယောက် ဖြစ်တယ် ဆိုတဲ့အကြောင်းတွေ ပြောပြလိုက်ရင် ကောင်းမလား ဆိုတာကိုတော့ ကျွန်တော် စဉ်းစားနေတုန်းပဲ။ 

သက်ဝေ
(၂၄ စက်တင်ဘာ ၂၀၁၈)

- ၂၀၁၈ ဒီဇင်ဘာလထုတ် Idea Magazine တွင် ဖေါ်ပြပြီးဖြစ်သည်။

No comments:

Post a Comment

အမှတ်တရ ရေးခဲ့ပါ...