ကိုယ်တွင်းမှာ လည်ပတ်နေသော သွေးတွေ အစဉ် လတ်ဆတ် နွေးထွေးနေဆဲ… အချိန်နာရီတွေ ရာသီတွေ ဘယ်လိုပြောင်းပါစေ ဘယ်သောအခါမှ အေးစက်သွားလိမ့်မည် မဟုတ်ပါ။ အရာရာတိုင်းမှာ အဆုံးသတ်တွေ ရှိနေသည်မှာ မှန်ကန်သော်လည်း အပြစ်ကင်းစင်သော ချစ်ခြင်းများကတော့ ဘယ်သောအခါမှ အဆုံးသတ်သွားလိမ့်မည် မဟုတ်ပါ။ ကိုယ်စီဘဝတွေ အဆုံးမသတ်သေးသ၍ စစ်မှန်သော ချစ်ခြင်းမေတ္တာတွေကလဲ အဆုံးသတ်လို့ ဘယ်လိုရနိုင်မှာလဲ...
အတူတူဆိုရင်… ဟု တွေးတောခဲ့ကြသော မျှော်လင့်ခဲ့ကြသော အချိန်တွေ ကြာသည်ထက် ကြာလာခဲ့ပြီ…။ မျှော်လင့်ရင်း ရင်ခုန်ရင်း အိပ်မက် မက်ရင်း၊ တွေငေး လွမ်းမောရင်း အချိန်တွေ တဖြေးဖြေး ကုန်လာခဲ့ပြီ။ အခုဆိုလျှင် ကိုယ့် ပတ်ဝန်းကျင်မှာ အအေးဓါတ်တွေ ကြီးစိုးလာခဲ့ပြီ…။ ရေခဲအောင် အေးသော၊ ကိုယ် မုန်းတီးလှသော ဆောင်းရာသီကို နောက်တကြိမ် ရောက်ခဲ့ပြန်ပြီ…။ ချစ်သူ အနားမှာ ရှိမနေနိုင်သောအချိန်တွေမှာ ကိုယ်အမုန်းဆုံးရာသီမှာ ဆောင်းရာသီဖြစ်သည်။ အရင်နှစ် ဆောင်းရာသီတုန်းက ချစ်သူရှိရာနေရာမှာ ဆောင်းခိုမည်ဟု တွေးစီစဉ်ခဲ့ဖူးသည်။ သို့သော် ကမ်းလင့်သော လက်တစုံကို ကိုယ် ထွေးပွေ့ခွင့် မကြုံခဲ့ပါ။ မေတ္တာစစ်မှန်လျှင် ဆုံဆည်းကြသည် ဆိုပဲ… ထိုသို့ဆိုလျှင် ကိုယ်တို့နှစ်ယောက် မေတ္တာတွေများ မစစ်မှန်ခဲ့ကြလေရော့သလားဟုပင် သံသယတွေ ဝင်ခဲ့ဖူးသည်။ ကိုယ်တို့နှစ်ယောက်စလုံး တကယ် ကံမကောင်းခဲ့ကြပါ…။
လွန်ခဲ့သော ရက်အနည်းငယ်က သူမနှင့် ဖုန်းပြောဖြစ်တော့ သည်မှာ ဆောင်းဝင်စပြုလာပြီဟု မှတ်မှတ်ရရ ပြောပြဖြစ်သေးသည်။ သူမအတွက် ဆောင်းဦးပေါက်မြင်ကွင်းတွေကို အရင်နှစ်တွေကလို ဓါတ်ပုံရိုက်ပြီး မပြရသေး… သည်ရက်တွေမှာ အလုပ်တွေ များလှသည်။ အလုပ်တွေပိ၍ ရက်အနည်းငယ် စကားမပြောဖြစ်ကြသောအခါ “ဆောင်းရာသီ၏ အအေးဓါတ်ကြောင့် ကိုကို့နှလုံးသားတွေ အေးစက်သွားပြီလား…” ဟု သူမက ခပ်တိုးတိုး မေးလာခဲ့သည်။ သူမ၏ အမေး အဆုံးမှာ ဖိစီးမှုမျိုးစုံဖြင့် ကြွေကျလုမတတ် ပါးလျနေသာ ကိုယ့်နှလုံးသားတွေ ဖျတ်ကနဲ ကွဲအက်သွားသလို ခံစားလိုက်ရသည်။ မေးရက်လေခြင်းဟု သူမကို စိတ်မခုရက်ပါ။ သူလဲ မေးချင်ပေမပေါ့…
သည်နေရာ၏ ရာသီဥတု အနေအထားအရ ဆောင်းဦးပေါက်မှာ သစ်ပင်တွေ သစ်ရွက်တွေ အရောင်ပြောင်းတတ်ကြသည်။ ဆောင်းဦးပေါက်မှာ သစ်ရွက်တချို့ ကြွေကျကြသည်။ မြင်မြင်လေရာမှာ အရောင်ပြောင်းနေသော သစ်ရွက်တွေကို တွေ့တော့ သူမလေးကိုပဲ သတိရမိသည်။ အနေဝေးနေချိန်တွေမှာ ဆောင်းဦးပေါက်က သစ်ပင်တွေလို သူမ၏ နှလုံးသားတွေ အရောင်ပြောင်းသွားလေမလား စိုးထိတ်မိပြန်သည်။ ဆောင်းဦးပေါက်က ရွက်ကြွေတွေကို တွေ့တော့လဲ အနေဝေးနေစဉ် သူမ၏ နှလုံးသားတွေ ခြောက်သွေ့ကာ ကြွေနွမ်းသွားကြမှာကို စိုးထိတ်မိပြန်သည်။ ထိုအကြောင်းကို သူကနှင့် စကားစပ်၍ ပြောဖြစ်တော့ “မစိုးရိမ်ပါနှင့် စိတ်ချလက်ချနေပါ…” ဟု ချစ်စဖွယ် အားပေးစကား ပြောခဲ့သေးသည်။
ချမ်းချမ်းစီးစီးမနက်ခင်းတခုမှာ သူမနှင့် စကားပြောဖြစ်တော့ "တွေ့ဖို့ အချိန်တွေကို စောင့်နေရသည်မှာ ကြာလှပြီ… ဆက်မစောင့်ချင်တော့ဘူး… ကိုယ့်အနားကို လာခဲ့ပါတော့…" ဟု မချင့်မရဲ ပြောလိုက်မိသည်။ စကားအဆုံးမှာ တဖက်မှ အသံတိတ်သွားပြန်တော့လဲ ဆန္ဒအလျောက် မဆင်မခြင် ပြောလိုက်မိသော ကိုယ့်စကားတခွန်းကြောင့် သူမ စိတ်ထိခိုက်သွားလေသလား တိတ်တိတ်ကလေး ရှိုက်ငင်နေလေသလားဟု သနား နောင်တ ကြီးစွာရ ရပြန်သည်။
တမိနစ် တစက္ကန့်လေးမျှ ရပ်တန့်မနေသော အချိန်နာရီတွေနှင့် ပြောင်းလဲလာသော အသက်အရွယ်တွေကြောင့် လက်ရှိအခြေအနေအပေါ်တွင် အားငယ်စိတ်တွေနှင့်အတူ စိတ်ဓါတ်တွေက ဟိုး အောက်ဆုံးနားအထိ ကျလု ကျခင်။ တချို့ရက်တွေမှာ အလွမ်းစိတ်တွေ စိတ်ပြေလို ပြေငြား ရီဝေရစ်မူးစေသောအရာတွေနှင့် မိတ်ဆွေဖွဲ့မိသလို တချို့ရက်သော နေ့ရက်တွေမှာတော့ အဝေးပြေးလမ်းမကြီးများပေါ်တွင် ကားကို အရှိန်ပြင်းပြင်းမောင်းကာ လူတွေနှင့် ဝေးရာကို ပြေးထွက်သွားမိသည်။ လမ်းဘေးတလျှောက် မျက်စေ့တဆုံး မြင်နေရသော သူမ နှစ်သက်သော တောင်တန်းညိုညိုတွေ သစ်တောစိမ်းစိမ်းတွေနှင့် တိမ်လိပ်ဖြူဖြူတွေကို တိုင်တည်ရင်း အလွမ်းတွေကို ဝေမျှရသည်။
တခါတခါမှာ ဝန်းကျင်တခုလုံး ဘာမှ မမြင်ရတော့လောက်အောင် ဆေးလိပ်မီးခိုးတွေ မှုတ်ထုတ်မိပြန်သည်။ ဆေးလိပ်တွေ အများကြီး မသောက်ပါနဲ့ ကိုကို… ဟု ပြောတတ်သော သူမအသံကို ကြားယောင်လာချိန်မှာတော့ နာကျင်ရစ်ဝဲလာသော မျက်ရည်များသည် ဆေးလိပ်မီးခိုးကြောင့်ပင် ဖြစ်သည်ဟု ကိုယ့်ကိုယ်ကိုယ် အားပေး လိမ်ညာမိပြန်သည်။ အနေဝေးသော ဘဝတွေသည် ခါးသီးလွန်းလှသည်ပဲ…။
ကောင်းကင်မှာ ကြယ်တွေစုံသော ညတညမှာ ချစ်သူကို သတိရရင်း မပီပြင်လှသော ကဗျာလေး တပုဒ် ရေးခြစ်ပြီး ချစ်သောသူဆီ အရောက်ပို့ခဲ့မိသေးသည်။ ခေါင်းစဉ်ကိုတော့ ဂျစ်ပစီရဲ့ ကြယ်ကြွေည ဟု အလွယ်တကူ ပေးလိုက်သည်။
အနားမှာ မင်းသာရှိခဲ့ရင်ပေါ့
ကမ္ဘာလွှမ်းတော့မယ့် မိုးသည်းတွေကိုလဲ
စိတ်ထဲ ကြည်ကြည်လင်လင်
မင်းရဲ့ ခင်မင်မေတ္တာတွေပဲ သွန်းနေသလိုလို…
မိုးထဲ တိုးဝင်နေတဲ့ တောင်တန်းတွေကိုလဲ
ငရဲလမ်းလို ငြိုငြင်နေရာက
တိမ်တွေထဲရောက်မှ
မင်းနဲ့ နမ်းကြမယ်လို့ တွေးလိုတွေး…
စူးရှရှ ဝံပုလွေ အူသံကြား
တခါတခါ လာပုတ်တတ်တဲ့ ဝက်ဝံစုံတွဲတို့နဲ့လည်း
ရိက္ခာတချို့ ခွဲဝေမျှ
ကိုယ်တို့အိမ် လာလည်ကြတဲ့ သူငယ်ချင်းတွေလိုလို…
ချစ်သူရယ်…
တယ်လီဖုန်းလေးသာ တချက် ဆက်လိုက်စမ်းပါ
ဒီမြောက်ကျွန်းမှာ လွင့်နေတဲ့ ခရီးသွားတယောက်က
လာသမျှ အန္တရာယ်တွေ အကုန်လုံး
ခေါင်းဖမ်းအုံးလိုက်ရင်း
မင်းအတွက် ရင်ခုန်တေးသွားမြမြ
ကြက်သီးတွေခအောင် ကိုယ်ဆိုပြလိုက်မယ်…။
ထိုကဗျာလေးကို သူမ ဖတ်နေချိန်နှင့် တချိန်တည်းမှာ ကိုယ်တိုင်လဲ ထိုကဗျာကို တခေါက် ပြန်ရွတ်မိသည်။ ကဗျာလေးကို ဖတ်နေချိန်မှာ သူမက မျက်ရည်ကျနေခဲ့သည်ဟု ပြောလာတော့ အတော်အံ့သြသွားသည်…။ ဘာကြောင့်ဆို ကိုယ်လဲ ထိုအချိန်က မျက်ရည်ကျနေခဲ့သည်လေ…။ အနေဝေးသော်လည်း ခံစားမှု တူညီနိုင်သော နှလုံးသားတွေကြောင့် ဝမ်းနည်းမှုတွေကြားမှ အတန်ငယ် စိတ်သက်သာရာရခဲ့ပြန်သည်။
အိပ်မရသော ညတွေမှာ အတွေးတွေက ဟိုရောက် သည်ရောက်…။ ကိုယ်ချစ်သောသူ ဆုံးပါးသွားတာရယ် အသက်ရှင်နေပါလျက်နဲ့ကိုယ်ချစ်တဲ့လူက တခြားသူနဲ့ပျော်နေတာကို တွေ့ရတာရယ် နှစ်ဦးသား စိတ်တူ ကိုယ်တူ ချစ်ပြီး နီးစပ်ခွင့်မရတာရယ် ဘယ်ဟာက ခံစားရတာ ပိုသက်သာမလဲ ဟု…။ အမှန်ကတော့ ဘယ်ဟာမှ မသက်သာလှပါ…။ သို့သော်လည်း ဝေးခြင်း နီးခြင်းတွေသည် ခိုင်မြဲသော ချစ်ခြင်းတခုအတွက် အထူးတလည် အရေးကြီးလှသည် မဟုတ်… နှလုံးသားခြင်း နီးကပ် နွေးထွေးနေဖို့သာ အရေးကြီးသည်ဟု တွေးလိုက်တော့ ရင်ထဲက အပူမီးတွေ အနည်းငယ် သက်သာသွားခဲ့သည်။ လက်ရှိ အနေအထားမှာ နှစ်ယောက်စလုံးက အတူတူဆုံနိုင်ချိန်တွေအတွက် ရင်ခုန်သံတွေ နွေးထွေးရင်း မျှော်လင့်နေခြင်းတွေ ရပ်တန့်မသွားသေးတာကိုက ခိုင်မြဲသော ချစ်ခြင်းတခု၏ ပြယုဒ်ပင်…။ လောကကြီးတွင် လှပသော ချစ်ခြင်းဖွဲ့ ဇာတ်လမ်းများအားလုံးသည် ရိုးရိုးစင်းစင်းလေးများ မဟုတ်ကြသည်မှာ သိပ်ကို သေချာပါသည်…။
တနေ့နေ့မှာတော့ အလွမ်းတွေရဲ့ အဝေးမှာ အတူတူဆုံနိုင်ကောင်းရဲ့ဟု မျှော်လင့်ရင်း ရင်ခုန်ရင်း မဆုံးသော အိပ်မက်ရှည်များကို အကြိမ်ကြိမ် အခါခါ မက်နေရင်း….
မှတ်ချက် ။ ။ လွန်ခဲ့တဲ့ တနှစ်ကျော်ကျော်လောက်က ရေးခဲ့ဖူးတဲ့ အတူတူဆိုရင် ပိုစ့်ရဲ့ နောက်ဆက်တွဲပါ…။ အတူတူ တဆက်တည်း ဖတ်လို့ရသလို သပ်သပ်စီ ခွဲဖတ်ရင်လဲ ရလောက်မယ်ထင်ပါရဲ့…။ အဲဒီ အတူတူဆိုရင် ပိုစ့်ထဲက သူငယ်ချင်းကို သတိတရ မေးပြီး သူတို့ရဲ့ လက်ရှိ အခြေအနေလေးကို ဆက်ရေးပေးဖို့ ပြောလာတဲ့ ညီမငယ် နှစ်ယောက်ရှိပါတယ်…။ သူတို့နှစ်ယောက်နဲ့ စကားပြောဖြစ်ပြီး သူတို့ရဲ့ တိုက်တွန်း အားပေးမှုနဲ့ ဒီပိုစ့်ကို ရေးဖြစ်ပါတယ်…။ စာထဲက တချို့စကားလုံးတွေအတွက် အဲဒီညီမနှစ်ယောက်ကို ကျေးဇူးတင်ပြီး ကဗျာလေးအတွက်တော့ မိတ်ဆွေ ကဗျာဆရာကို ကျေးဇူးတင်ပါတယ်…။ ပြီးတော့ သတိတရနဲ့ မေးလာတဲ့ ညီမ နှစ်ယောက်စလုံးကို သူငယ်ချင်းက ကျေးဇူးတင်ကြောင်း ပြောပေးပါ တဲ့…
