တိုးတိတ်တမ်းတ

ခိုင်စိုးလင်း စီစဉ်တဲ့ သရဲမှတ်တမ်း (Ghost Record) E Book ဒီနေ့ ထွက်ပါပြီ…။
ပါဝင်ရေးသားကြသူများကတော့ ကိုကိုသက်၊ ကိုမျိုး၊ ချစ်ကြည်အေး၊ ခိုင်စိုးလင်း၊ ချိုပိန်းနောင်၊ စစ်ငြိမ်းဒီရေ၊ ဆူးခက်မင်း၊ ညီဇံလှ၊ နှင်းနဲ့မာယာ၊ ပန်ဒိုရာ၊ ဖိုးခွား၊ ဖိုးစိန်၊ မိုးလှိုင်ည၊ မြသွေးနီ၊ မှိုင်း (ဆေး - ၂)၊ သူရဿဝါ၊ သက်ဝေ၊ အော်ဂဲနီ၊ အောင်ဖြိုး သြမြိုင် နဲ့ အမည်မဖေါ်လိုသူ တဦး တို့ ဖြစ်ကြပါတယ်…။

ဒီနေရာ မှာ Download ချပြီး ဖတ်နိုင်ပါတယ်…။ ကိုယ်တိုင်က သရဲနဲ့ ရင်းနှီး ကျွမ်းဝင်မှုမရှိတဲ့ အတွက် သရဲအကြောင်း မပါ ပါအောင် အတော်ကို ကြိုးကြိုးစားစားနဲ့ ရေးထားခဲ့တဲ့ ဝတ္ထုတိုလေးကို ဖတ်ကြည့်ကြပါအုံး…

တိုးတိတ်တမ်းတ

အခန်းတံခါးက အခါများစွာကလိုပင် အလူမီနီယံ အကွက်စိပ်စိပ် တံခါးတထပ်၊ ကျွန်းရောင်လက်နေသော သစ်သားတံခါး တထပ်ဖြင့် တင်းတင်းစေ့ကာ ပိတ်ထားဆဲ…။ အယောင်ယောင် အမှားမှားဖြင့် တံခါးကို ခေါက်လိုက်မိသည်။ သို့သော် မည်သည့်အသံ တစုံတရာမျှ မထွက်လာချေ။ အကျင့်ပါနေသော လက်တို့က စလွယ်သိုင်းလွယ်နေကျ ပိုက်ဆံအိပ် အဖြူရောင်လေး၏ အရှေ့ဖက်ခြမ်းမှာ ထည့်ထားလေ့ရှိသော အိမ်သော့ကို လိုက်စမ်းကာ ရှာနေမိသည်။ သို့သော်လည်း ကိုယ်ပေါ်မှာ မည်သည့် ပိုက်ဆံအိပ် တစုံတရာမျှ ရှိမနေ။ ထိုအခါမှ သူမကိုယ်သူမ သတိတရ ငုံ့ကြည့်မိခဲ့တာ ဖြစ်သည်။ သူမကိုယ်ပေါ်မှာ အဖြူညစ်ညစ် (သို့) မီးခိုးရောင်ဖျော့ဖျော့ဟု ခေါ်ဆိုနိုင်သော ဇာနားတပ် ဂါဝန်ရှည်ရှည်ကို တွေ့ရသည်။ ခြေထောက်မှာတော့ မည်သည့်ဖိနပ် တစုံတရာမျှ မရှိ။ ထူးဆန်းသည်နော်…။ ပိုက်ဆံအိပ်များ၊ ဖိနပ်များကို အလွန်အမင်း နှစ်သက်တတ်သူ သူမဆီမှာ မည်သည့် ပိုက်ဆံအိပ် မည်သည့်ဖိနပ် တစုံတရာမျှ ရှိမနေပါလား…

ထိုစဉ်အချိန်မှာပင် တံခါးနှစ်ထပ်ကို လွန်မြောက်ကာ တဖက်ခြမ်းကို သိမ်မွေ့ညင်သာစွာဖြင့် သူမ ရောက်ရှိသွားခဲ့တာဖြစ်သည်။ အိမ်ထဲကို ရောက်သွားသောအခါ အရာရာသည် မပြောင်းမလဲ… သူ့နေရာနှင့်သူ စနစ်တကျ စီစီရီရီ ရှိနေသည်ကို အံ့သြဖွယ် တွေ့ရသည်။ ဧည့်ခန်းထဲမှ အနက်ရောင် မှန်စားပွဲငယ်ကလေးကို သူမ လက်ဖြင့် အသာအယာ တို့ထိကြည့်လိုက်သည်။ ခါတိုင်း သူမ တရက်တခါ သုတ်သင်နေကျ ဖုနမှုန့်နုနုလေးတွေ တစက်ကလေးမျှ ရှိမနေ…။ တီဗီဖန်သားပြင်… ထို့နောက် အရောင်ထွက်နေသော လယ်သာဆိုဖာ နက်နက်မှောင်မှောင်တွေ… ထူးဆန်းလိုက်တာ… သူမ နေ့စဉ် ရှင်းလင်း သုတ်သင်နေကျ နေရာများမှာ ဖုန်ဆို၍ တစက်ကလေးမျှ ရှိမနေပါလား…။ ဧည့်ခန်းပတ်ပတ်လည်ကို မျက်စိကစားလိုက်ရာ သူမ နေ့စဉ် ထိတွေ့နေကျ ကြည်လင် စိုလက်နေသော ကွန်ပျူတာ မော်နီတာ မှန်သားပြင်၊ ရွှေငါးကလေးများ လူးလာခေါက်တုန့် ပြေးလွှားနေသော အလှမွေး ငါးကန်မှ အမှုန်အမှိုက်ကင်းစင်ကာ တည်ငြိမ်ပြာလဲ့နေသော ရေပြင်ညီ၊ လောလောလတ်လတ် ရေဖျန်းထားပုံရသော ရေစက် ရေမှုန်လေးများ ခိုတွယ်နေဆဲ အိမ်တွင်း အလှစိုက်သစ်ပင်များမှ သစ်ရွက်စိမ်းလဲ့လဲ့တွေ… အိုး… မယုံနိုင်စရာ…။
ထိုအချိန်မှာပဲ သူမ တစုံတခုကို တွေးမိသွားတာဖြစ်သည်။

ကိုကို… အသံတိုးတိုးလေးဖြင့် သူမ ရေရွတ်လိုက်မိသည်…။ တုန့်ပြန်သံ တစုံတရာ ထွက်ပေါ်မလာ…။ ကိုကိုဟာ သည်လိုလူစားတော့ မဟုတ်တန်ရာဟု သူမ ပိုင်ပိုင်နိုင်နိုင်တွေးမိသော အခိုက်အတံ့လေးမှာ အသက်ကို တဝကြီး ရှုသွင်းလိုက်မိသည်။ ထို့နောက် ခြေလှမ်း ခပ်စိတ်စိတ်တို့ဖြင့် မီးဖိုခန်းထဲ ဝင်သွားလိုက်သည်။ သည်အချိန်ဆို ကိုကို ရုံးက ပြန်ရောက်လို့ ရိုက်စ်ကွတ်ကာဖြင့် နှစ်ယောက်စာ ထမင်းချက်နေပြီ ထင်၏။ လတ်လတ်ဆတ်ဆတ် ဟင်းသီးဟင်းရွက်ကြော်တပန်းကန်၊ ကြက်သား (သို့) ငါးအသားလွှာများကို သံလွင်ဆီအနည်းငယ် ကြက်သွန်ဖြူ ငြုတ်ကောင်းများများဖြင့် မီးပူပူမှာ ဟိုဖက် သည်ဖက်လှန်ကာ ကင်သလို ကြော်သလို လုပ်ထားသော ဟင်းတပန်းကန်ကို ထမင်းစားပွဲပေါ် အချိန်မီရောက်စေဖို့ စီစဉ် ချက်ပြုတ်နေပြီ ထင်၏။ ပြီးလျှင်တော့ အဆင်သင့် သုံးဆောင်ပါ ခင်ဗျာ… ဟူသော ရယ်သံတဝက်ဖြင့် သူမကို ထမင်းစား ခေါ်တော့မည် ထင်၏။
ထိုအတွေးတို့ဖြင့် သူမ ရဲတင်းသွားခဲ့တာ…။

မီးဖိုခန်းအဝမှနေ၍ ကိုကို ဟု ခပ်ကျယ်ကျယ်လေး အော်ခေါ်လိုက်မိသည်။ သို့သော် မီးဖိုခန်းမှာလည်း ဘယ်သူမှ ရှိမနေ။ မီးဖိုချောင်သုံးပစ္စည်းများကလည်း သူ့နေရာနှင့်သူ နေသားတကျ၊ သန့်ရှင်းကာ ပြောင်လက် တောက်ပစွာ…။ မနက်စောစော ဘုရားဆွမ်းတော်ကပ်သည့် ဖန်ပန်းကန်ငယ်ကလေးသည်ပင် ဆွမ်းတော်စွန့်ပြီး ဆေးကြောကာ မှောက်ထားဟန်မှာ သူမလက်ရာအတိုင်း ချွတ်စွတ်။ ကိုကိုကြော်နေကျ ကြက်ဥကြော်သည့် ဒယ်အိုးငယ်ကလေးမှာလည်း ကြော်ပြီးလျှင် အသည်းပုံထွက်သော ပုံစံခွက်ကလေးနှင့် အတူ တွဲလျက်သား…။ ကိုကို… ကိုကို… ကိုကို ဘယ်မှာလဲ…။ သူမ မရှိသည့်နောက်မှာ သူမ၏ ခြေရာ လက်ရာများအတိုင်း အိမ်ကို သန့်ရှင်း စင်ကြယ်ကာ တောက်ပနေအောင် ကိုကို့ကို ဘယ်သူကများ လာကူညီနေသလဲကွယ်…။ အတွေးနှင့်အတူ သူမ ခြေထောက်များ ယိုင်နဲ့လာတာ…

သို့သော် ကိုကိုသုံးနေကျ ရေချိုးဆပ်ပြာနံ့နှင့်အတူ ဆေးနံ့ပါသော ခေါင်းလျှော်ရည်နံ့ကို ရလိုက်သော အချိန်လေးမှာ သူမ ခြေလှမ်းများ တည့်မတ် သေချာသွားခဲ့ပြန်သည်။ ကိုကို ရေချိုးနေတာလားဟင်… ရေကျသံများ ကြားယောင်လာသလိုလို… သေချာတယ်… ဒါ ကိုကို ရေချိုးနေတာပဲ…။ အိပ်ခန်းနှင့် တွဲလျက် ရေချိုးခန်းကို သူမ၏ အမိန့်အတိုင်း ခြောက်ခြောက်သွေ့သွေ့ထားကာ အပြင်ရေချိုးခန်းမှာပင် ရေချိုး ခေါင်းလျှော် ကိုယ်လက် သုတ်သင်ရသည့် အခါတိုင်း ရေတောင် ကိုယ်ချိုးချင်တဲ့ဆီမှာ မချိုးရပါလားကွာ ဟု ငြူစူခြင်းကင်းသော ငြီးတွားမှုမျိုးဖြင့် ကိုကို ပြောလေ့ရှိသည်ကို သတိရသွားသောအခါ သူမ အသံထွက် ရယ်မောမိပါသည်။ သို့သော် ရယ်သံအက်အက်ကွဲကွဲက အပြင်ကိုရောက်မလာ… လည်ချောင်းဝမှာပင် ရပ်တန့်သွားသည် ထင်၏။

စေ့ပိတ်ထားသော ရေချိုးခန်းတံခါးကို သူမ အသာဖွဖွ ခေါက်မိသည်။ သို့သော် ဘာသံမှထွက်မလာ… ပိုမိုသေချာစေရန် သူမ ပါးစပ်ကလည်း အသံပြုကာ တံခါးကို ထပ်ခေါက်မိသည်။ သို့သော် သူမနားထဲမှာ ဘာသံမျှ မကြားရ။ စိတ်မရှည်နိုင်တော့သည့်အဆုံး ရေချိုးခန်းတံခါးကို တွန်းဖွင့်လိုက်သည်။ ဟင်… သူမ တွန်းဖွင့်သော်လည်း မပွင့်လာ… သို့သော် သူမကတော့ဖြင့် ရေချိုးခန်းထဲကို ရောက်နေပေပြီ။ သွားတိုက်ဆေး၊ သွားပွတ်တံ၊ မျက်နှာသစ်ဆပ်ပြာ၊ မုတ်ဆိတ်ရိတ်သော ပစ္စည်းကိရိယာစုံ၊ ရေချိုးဆပ်ပြာ၊ ခေါင်းလျှော်ရည် အစစ အရာရာသည် သူ့နေရာနှင့်သူ အံဝင်ခွင်ကျ။ ဘယ်အရာမှ ဖရိုဖရဲဖြစ်မနေ…။
ကိုကိုရေ… ဘယ်ရောက်နေတာလဲ…။

တအိမ်လုံး ဘယ်နားမှာမှ ကိုကိုရှိမနေ။ နောက်ဆုံးမတော့ ကိုကိုရှိနိုင်မည့်နေရာ တနေရာသာ ကျန်တော့သည်…။ ထိုနေရာကတော့ သူမတို့၏ အိပ်ခန်းသာ…

ကိုယ်ကို အသာဖေါ့ ခြေဖျားထောက် လျှောက်လှမ်းရင်း အိပ်ခန်းဆီသို့ ဦးတည်မိသည်။ ဤခြေလှမ်းမျိုးဖြင့် လှမ်းလျှောက်လိုက်တိုင်း သူမကို အနောက်ဖက်မှနေ၍ ဟိတ် ငတက်ပြားကလေး… ဟု ချစ်စနိုး ကျီစယ် နောက်ပြောင်ပြီး လာရောက် ဖက်တွယ် နမ်းရှိုက်တတ်သော ကိုကို့ကို အလွန်တရာ လွမ်းဆွတ်သွားပါသည်။ ယခုလည်း အခါများစွာကလိုပင် အနောက်ကနေ ကိုကို ရောက်လာမလား ဟု သူမ တိတ်တခိုး မျှော်နေမိပါသေးသည်။ သို့သော် ကိုကို ရောက်မလာပါ…။ သည်အချိန်မှာ ကိုကို အိမ်မှာ ရှိကို ရှိနေရမည်… သူမ သေချာသိနေပါသည်။ ညနေစောင်း အချိန်မတော်ကြီး ကိုကို အိပ်များနေသလား… သူမ ပြန်အလာကို စောင့်ရင်း ကိုကို အိပ်ပျော်နေလေပြီလား…။

အတွေးနှင့်အတူ အိပ်ခန်းဝကို အရောက်မှာ အိပ်ခန်းတံခါး ပိတ်ထားသည်ကို တွေ့ရသည်။ ဘုရား… ဘုရား… သူမ အသက်ရှုမှားကာ ရင်တွေ အဆမတန် ခုန်လာခဲ့သည်။ ကိုကို... ဘာဖြစ်လို့ အခန်းတံခါးကို ပိတ်ထားတာပါလိမ့်…။ အရင်ကဆို နှစ်ယောက်တည်းနေသော အိမ်ခန်းလေးပင် ဖြစ်လင့်ကစား သူမက အခန်းတံခါးကို မပိတ်တောင် စေ့ရုံ စေ့ထားမှ နှစ်သက်တတ်သူ… ကိုကိုက ဒါမှ လေဝင်လေထွက် ကောင်းတော့မပေါ့… ဟု ဆိုကာ အခန်းတံခါးကို တဆုံး ဖွင့်ထားတတ်သူ…။ အခုမူ အခန်းတံခါးက ပိတ်လျက်သား… ထူးဆန်းလိုက်တာ…

ကိုကိုရေ…
မောပန်းလှစွာသော မရေမရာ သံသယ အတွေးတချို့နှင့်အတူ သူမ ခြေလှမ်းတွေ ယိမ်းယိုင်ကာ လူက ကတုန်ကယင် ဖြစ်လာလေသည်။ သူမဝတ်ထားသော ဂါဝန်လက်ဖျားမှ နှင်းဆီပွင့်ပုံ ပန်းဇာ ဖြူဖြူလေးကို အကြောင်းမရှိ အကြောင်းရှာ ကိုင်တွယ် ပွတ်သပ်ကြည့်နေရင်း အိပ်ခန်းဝတွင် သူမ ခြေစုံရပ်လျက်သား…။ ထိုစဉ် အကြည့်တချက်က ပြူတင်းပေါက်နှင့် ကပ်လျက်မှ ဘုရားစင်ပေါ်ရှိ သပြေပန်းအိုးကလေးဆီသို့ မထင်မှတ်ပဲ ရောက်သွားခဲ့သည်။

ကြည့်ပါအုံး… စိမ်းစိုလက်နေသော အရွက်နုလေးများဖြင့် ဝေဆာ တင့်တယ်နေသော သပြေပင်ကလေးတွေ… သူမ နောက်ဆုံးတွေ့ခဲ့စဉ်က အရွက်နုကလေးများက ထွက်လု ထွက်ခင်… သို့သော် သူမ မရှိသော ရက်ပိုင်းအတွင်းမှာ အရွက်နုလေးတွေ တော်တော်ကြီးလာပါပေါ့လား…။ ကုန်လွန်ခဲ့သော ရက်တွေကို လက်ချိုးကာ ရေတွက်ကြည့်ချင်သော်လည်း သူမ ရေရေရာရာ မမှတ်မိတော့ချေ။

သူမ အကြည့်တို့ကို ဘုရားစင်မှ လွှဲဖယ်ကာ အိပ်ခန်းတံခါးဆီသို့ ပြန်လည် ဆွဲခေါ်လိုက်သည်။ တံခါးကို အသံမြည်အောင် ခေါက်လိုက်ရမည်လား… အဘယ်သို့ အသံပြုရပေမည်နည်း… သူမ ဝေခွဲမရ…။ အခန်းထဲမှာ ကိုကိုတယောက်တည်းရော ဟုတ်ပါ့မလား။ တခြားသူစိမ်းတယောက်ရော ရှိမနေနိုင်ဘူးလား…။ ထိုအတွေးတို့ နောက်မှာ ခြေထောက်များကို ကောင်းကောင်းထောက်၍ မရချင်တော့… ထို့ကြောင့် အခန်းတံခါးကို ကျောမှီကာ သူမ ထိုင်ချလိုက်ရသည်။

ကိုကိုရေ…
ကိုကိုရေ… ဟူသော ရေရွတ်သံ နောက်တကြိမ်မှာ ရှိုက်ငင်သံတွေအတူကပ်လျက် ပါလာခဲ့သည်။ အို… ကိုကိုများ ကြားသွားလေမည်လား…။ ထိုအသံတွေကို ကိုကိုကြားသွားလျှင် အနှောက်အယှက်များ ဖြစ်သွားလေမည်လား…။ တွေးနေရင်းမှာပင် သူမ ရှိုက်ကြီးတငင် ငိုနေမိကြောင်း သတိပြုမိသည်။ အင်း… အင်း… ကိုကိုက ငိုတာ မကြိုက်ဖူး… ချက်ချင်းပင် သူမ အငိုတိတ်လိုက်သည်။ ကြည်လင်သော စိတ်ထားလေးနှင့် မျက်နှာလေး ပြန်ရအောင် မိနစ်အနည်းငယ် အချိန်ယူလိုက်ရသည်။ ငိုထားသော မျက်နှာနီနီကို ကိုကို တွေ့မသွားစေချင်ပါ။ သို့သော် မျက်နှာကို ကြည့်ကောင်းအောင် ပြုပြင်စရာ ပေါင်ဒါဘူးလေး နှုတ်ခမ်းနီလေးမျှပင် သူမမှာ မပါလာခဲ့…။

ကဲပါလေ… ကိုကိုမေးတော့လည်း ပြောပြလိုက်ရုံပေါ့… ကိုကို့အနားမှာ တခြားမိန်းမ တယောက်ယောက်များ ရောက်နေမလားလို့ တွေးပူရင်း ငိုရသည်ပေါ့… သည်လိုဆိုလျှင်တော့ ကိုကိုက ပူစရာမရှိ ရှာကြံပြီး ပူနေသော အရူးမလေး ဟု ချီးကျူး ထောပနာ ပြုမည်မှာ အသေအချာ။

အခန်းတံခါး လက်ကိုင်ဘုကို အသာလှည့်လိုက်စဉ် အခိုက်အတံ့လေးမှာ ခုနက တည်ငြိမ်သွားသော စိုးရိမ်စိတ်များက တဖန် ပြန်လည်ကြီးစိုး နေရာယူလာကြပြန်သည်။ ဘာပဲ တွေ့တွေ့ ရင်ဆိုင်ရမှာနော်… ပြီးတော့ ကိုယ့်နေရာကို အစားထိုးရက်သူရယ်လို့ မစွတ်စွဲပဲ ကြည်ဖြူပေးရမှာနော်… ကိုကိုစိတ်ချမ်းသာဖို့က ကိုယ့်အတ္တထက် ပိုအရေးကြီးတယ်နော်… ကိုယ့်ကိုယ်ကို တဖွဖွ ဆိုဆုံးမရင်း ဘာမဆို ရင်ဆိုင်မည် ဟူသော ဆုံးဖြတ်ချက်တခုကို ခိုင်ခိုင်မာမာချကာ တံခါး လက်ကိုင်ဘုကို လှည့်ဖွင့်လိုက်သည်။ အို… တံခါးက ပေါ့ပေါ့လေးပဲ…

ဂါဝန်စကလေး လွင့်ကနဲ တချက်အဝှေ့မှာ သူမ အခန်းထဲကို ရောက်သွားသည်…။ အခန်းထဲမှာ မြင်လိုက်ရသော မြင်ကွင်းက သူမရင်ထဲကို စူးစူးရှရှ ဝင်ရောက်ကာ မူးဝေနောက်ကျိလျှက် နေရာမှာ ပုံလျက်သား လဲကျသွားခဲ့သည်။ သို့သော် သူမ၏ ဝိညာဉ်ကတော့ ရုပ်ရှင် အနှေးပြကွက်များထဲကလို လှလှပပ နိုးထကာ ဂါဝန်စလေး တလွင့်လွင့်ဖြင့် ကိုကိုရှိရာဆီကို တလှမ်းချင်း လှမ်းသွားပြီး ကိုကို့ နောက်ကျောကို ညင်သာစွာ ဖက်တွယ်လိုက်မိသည်။

ကိုကိုလား… ကိုကိုကတော့ သူမရဲ့ အထိအတွေ့ကို ဘာမှ မခံစားရသူတယောက်လို…။ အိပ်ရာဘေးမှ စာကြည့်စားပွဲတွင် ထိုင်ကာ စားပွဲပေါ်တွင် ထောင်ထားသော သူမတို့ ချစ်သူဖြစ်ကာစနေ့ရက်တွေက တယောက်နဲ့တယောက် မျက်နှာချင်းဆိုင် ခပ်ခွာခွာ ရပ်ရင်း၊ တယောက်ရဲ့ လက်ချောင်းတွေကို တယောက်က လှမ်းယူ ဆုတ်ကိုင်လို့၊ တယောက်ရဲ့ မျက်ဝန်းတွေထဲမှာ တယောက်က တယောက်ကို ဖွေရှာလို့၊ ကြည်ရွှင် ရယ်မောနေကြသော အနည်းငယ် ဟောင်းနွမ်းနေပြီဖြစ်သော မှန်ဘောင်လေးထဲမှ ဓါတ်ပုံကို မျက်တောင်မခတ် ငေးကြည့်နေခဲ့သည်လေ…။ ကိုကို့ နောက်ကျောကို ပါးဖြင့်မှီအပ်ကာ အသံမထွက်ပဲ သူမ ကြိတ်ရှိုက်ငင်နေခဲ့မိသည်။ ကိုကို့ကို အထင်လွဲချင်ချင် သံသယများဖြင့် ပူလောင်ခဲ့ရသော အချိန်များအတွက် သူမ အထပ်ထပ် တောင်းပန်ရင်း ငိုပြီးရင်း ငို… ငိုရတာကိုပဲ အရသာ တွေ့နေခဲ့သည်…။

သူမတို့ ဓါတ်ပုံကို စူးစူးစိုက်စိုက် ငေးကြည့်နေသော ကိုကို့ မျက်လုံးတွေ နီရဲနေမည်လား… ကိုကို မျက်ရည်ကျနေမည်လား… ကိုကို ပြုံးနေမည်လား… ကိုကို မဲ့နေမည်လား… စသော ကိုကို့မျက်နှာပေါ်မှ ခံစားချက်များကို သူမ ဖွေရှာကြည့်ရန် စိုးစဉ်းမျှ မလိုအပ်တော့ကြောင်းကို တချက်တချက် စည်းချက် မညီညာစွာ လှုပ်ခါသွားသော ကိုကို့ကျောပြင်မှ တဆင့်သော်လည်းကောင်း၊ လည်ပင်းတလျှောက် တင်းမာလာသော သွေးပြန်ကြောများ၏ လှုပ်ရှားမှုများမှ သော်လည်းကောင်း သူမ အသေအချာ ခံစားသိရှိနေခဲ့ပြီဖြစ်သည်။

ကိုကို…
သူမ မရှိသော နေ့ရက်တွေအတွက် ကိုကို့ကို သူမ စိတ်ချလိုက်တော့မည်…။
ကိုကို စိတ်ချမ်းသာဖို့… ကိုကို့ ဘဝမှာ ဆက်လက် နေပျော်ဖို့ သူမ အဝေးမှသာ ဆုတောင်းပေးတော့မည်။ သံသယ စူးစူးများ၊ မယုံသင်္ကာ စိုးရိမ်စိတ်များဖြင့် ကိုကို့အပါးကို သူမ နောက်တကြိမ် ချဉ်းကပ်ရန် ကြိုးစားတော့မည် မဟုတ်ပါ။ ကိုကို့ကျောပြင်ကို နောက်ဆုံးအကြိမ်အဖြစ် အသာအယာ ရှိုက်နမ်းအပြီးမှာ ဘာကိုမှ မချည်နှောင် မတွယ်တာနေတော့ပဲ ဝါဂွမ်းလေးတစလို တိုးတိတ်စွာ သူမ လွင့်မျောသွားခဲ့သည်…
နှုတ်ဆက်ခဲ့တယ် နော်… … ကိုကို…