Friday, June 10, 2016

မကြည်လင်တာတွေ မှောင်ရိပ်ထဲ သိပ်ခဲ့ကွယ်

မနက်ခင်းတစ်ခုရဲ့ နေရောင်ခြည်တန်းဟာ လေပြေတချို့တလေကို အဖေါ်ပြုလို့ အိပ်ခန်းပြတင်းကနေ ကန့်လန့်ဖြတ် တိုးဝင်လာတယ်။ ခန်းဆီးစ ထူထူကို အောက်ခြေက ထိန်းထားတဲ့ သစ်သားတန်းရဲ့ အရိပ်၊ ခန်းဆီးကို အတင်အချလုပ်ဖို့ ဆွဲရတဲ့ ကြိုးစနှစ်ခုရဲ့ အရိပ်တွေဟာ နေရောင်ခြည်ရဲ့ အကူအညီနဲ့ နံရံပေါ်မှာ အင်္ဂလိပ်စာလုံး အေ ပုံသဏ္ဍာန်ဆန်ဆန် တည်ဖွဲ့နေကြတာ တွေ့ရတယ်။ ကြည့်စမ်း… မျဉ်းပြိုင်နှစ်ကြောင်းဟာ နံရံပေါ်က အရိပ်ထဲမှာ ခဏလေးဖြစ်ဖြစ်တော့ ဆုံနိုင်တာပဲ။

မျက်စိနှစ်လုံး ဖွင့်ဖွင့်ခြင်း မြင်ရတဲ့ အဲဒီ မြင်ကွင်းဟာ စိတ်ကို ကြည်လင်စေတယ်။ ပြီးတော့ ဥသြတစ်ကောင်ရဲ့ ခပ်သွက်သွက် အော်သံကို ကြားရတယ်။ တစ်ကြိမ်နဲ့ရပ်မသွားပဲ ဥသြဟာ ဥသြ ဥသြလို့ ဆက်ကာ ဆက်ကာ အော်နေတယ်။ သူဟာ နွေဥသြလား၊ ဒီနေ့ဟာ မတ်လရဲ့ နေ့စွဲတစ်ခုဆိုတာ သတိထားမိတော့ နွေဦးဟာ နောက်တစ်ခေါက် ရောက်လာပြန်ပြီပဲ လို့ တွေးမိတယ်။ အချိန်မှန်တဲ့ နွေဦး။ ဥသြကရော နွေဦးပေါက်မို့ အချိန်မှန် အော်မြည်တာလား။ ကြားနေရတဲ့ ဥသြသံဟာ ချိုသာတယ်လို့ ခံစားရသလား။ မလိမ်မညာတမ်း ပြီးတော့ အားမနာတမ်း ပြောရမယ်ဆို သိပ်တော့ မချိုသာလှပါဘူး။ နောက်တော့ ဥသြသံ တိတ်သွားတယ်။ ဒါပေမဲ့ ဘာငှက်လို့ ရေရေရာရာ မပြောနိုင်တဲ့ ငှက်သံ တစ်မျိုးကို ကြားရပြန်တယ်။ အိပ်ခန်းနဲ့ အနီးဆုံးသစ်ပင်မှာ အဝါရောင် ပန်းတွေ ပွင့်နေပြန်ပြီ။ ပန်းပွင့်တွေကြောင့်လား၊ ထူသိပ်နေတဲ့ အရွက်ဖါးဖါးတွေ ကြောင့်လား မသိ… အဲဒီ သစ်ပင်မှာ ငှက်တွေ အင်မတန် ပျော်ကြတာကို သတိထားမိတယ်။ တွေးနေရင်းမှာ ငှက်အော်သံတွေကို အဆက်မပြတ်ကြားလာရတယ်။ အော်နေတဲ့ ငှက်ကလေးအကြောင်းကို စာထဲ ထည့်ရေးချင်ပေမယ့် ဘာငှက်လို့ အမည်မဖေါ်နိုင်တာကို တွေးမိတော့ စိတ်နည်းနည်း နောက်သွားတယ်။ ထားပါလေ… ကိုယ်ဟာ ဘဝမှာ ငှက်ကလေးတစ်ကောင်ကို ချစ်ဖူးပေမဲ့ ကျန်တဲ့ ငှက်တွေကို သိမှ မသိတာ၊ အော်သံကြားရုံနဲ့ ဘာငှက်မှန်း အမည်မဖေါ်တတ်တာ ဆန်းသလား။ ပြီးတော့ ကိုယ်ဟာ ငှက်မှုရေးရာ ကျွမ်းကျင်သူတစ်ယောက်လည်း ဟုတ်မှ မဟုတ်တာပဲ။ ကိုယ်ချစ်ဖူးတဲ့ ငှက်ကလေးဟာ အပွင့်တွေ မဝေဆာ၊ အရိပ်လည်းမရှိတဲ့ ကိုယ့်အနားမှာ မပျော်နိုင်တဲ့အကြောင်းကို အစဖေါ်ပြီး ပြန်မတွေးချင်ပါဘူး။ အတွေးကို ဖြတ်ပြီး ခုနက ကြည်လင်လက်စ စိတ်ကလေးကို အမြန်ပြန်ခေါ်ရတယ်။ အဲဒီစိတ်ကလေး တစ်နေ့တာလုံး ဆက်လက်ကြည်လင်ဖို့ ဘာတွေများ လိုအပ်ပါလိမ့်။ ဒီနေ့ တစ်နေ့တာ လုပ်ရမဲ့ လုပ်ငန်းဆောင်တာတွေကြားထဲမှာ စိတ်နှလုံးကို ကြည်လင်ရွှင်ပြစရာ တခုတလေမှ ပါဝင်ရဲ့လား။ သိပ်တော့ မသေချာလှ။ မသေချာရင် သေချာတာ တစ်ခုခုကို ရှာဖွေရမှာပေါ့။ တနေ့တာ အချိန်နှစ်ဆယ့်လေးနာရီမှာ ကိုယ့်စိတ်ကို ကြည်လင်စေမယ့် အချိန်လေး နည်းနည်းတော့ လိုအပ်တယ် ဆိုရင် စိတ်လိုလက်ရ သဘောတူကြမယ် မဟုတ်လား။

အိပ်ယာကထပြီး တကိုယ်ရေသန့်ရှင်းရေးနဲ့အတူ လုပ်စရာရှိတာတွေကို ခပ်သွက်သွက်လေး လှုပ်ရှားလိုက်တယ်။ ထမင်းစားပွဲပေါ်က ဗန်းလေးထဲမှာ ထပ်ထားတဲ့ လေးထောင့်စပ်စပ် ပေါင်မုန့်ချပ်တွေကို ငြီးငွေ့စိတ်နဲ့ တချက် လှမ်းကြည့်တယ်။ ငှက်ကလေးတွေဟာ ပေါင်မုန့်အစလေးတွေ စားတတ်ကြသလား။ ဆက်ကြည့်နေရင် စိတ်နောက်လာမှာစိုးတာနဲ့ ပေါင်မုန့်တွေကို ကျောခိုင်းလိုက်တယ်။ နို့ပူပူတစ်ခွက်ကို ကွေကာအုပ်နည်းနည်းနဲ့ စပျစ်သီးခြောက် နည်းနည်းထည့်ပြီး မွှေလိုက်တယ်။ ဖြူညစ်ညစ် ကွေကာအုတ်ပန်းကန်ကို ငရုတ်ကောင်းများများပါတဲ့ မုန့်ဟင်းခါးတစ်ပန်းကန်နဲ့ အစားထိုး မြင်ယောင်ကြည့်ရင်း နောက်ကျိအံ့ဆဲဆဲစိတ်ကို ပြန်လည်ကြည်လင်စေရတယ်။ စားပြီးတော့ အခန်းထဲကို နောက်တစ်ခေါက်ပြန်ဝင်၊ Opium လို့ အမည်ရတဲ့ ရေမွှေးပုလင်းကို ယူဆွတ်လိုက်တယ်။ ဘာပဲပြောပြော ရေမွှေးရဲ့ အနံ့သင်းသင်းဟာ စိတ်ကို ကြည်လင်စေတာ အမှန်ပဲ။ ဒါနဲ့ နေပါဦး… Opium ဆိုတာ ဘိန်း ပေါ့။ ဘိန်းဆိုတာ မူးရစ် ရီဝေပြီး စွဲလမ်းစေတဲ့ အရာတစ်ခု မဟုတ်လား။ ဒါကြောင့်မို့ အဲဒီရေမွှေးကို မက်မက်မောမော စွဲလမ်းနေမိတာလား။ ဒီရေမွှေးကို စွဲလမ်းတာနဲ့ ငှက်ကလေးကို စွဲလမ်းတာကရော အတူတူပဲလား။ ဘဝမှာ တစုံတခု ဒါမှမဟုတ် တစုံတယောက်ကို စွဲလမ်းတပ်မက်နေရတာဟာ နည်းနည်းတော့ စိတ်နောက်စရာ မကောင်းဘူးလား။ ဟော… စိတ်နောက်တဲ့အကြောင်း ပါလာပြန်ပြီ။ နှစ်ခြိုက်စရာရေမွှေးနံ့ကို ရှူရှိုက်ရင်း၊ ချစ်ရတဲ့ ငှက်ကလေးအကြောင်းကို တွေးရင်း နောက်ကျိတဲ့ စိတ်ကို ပြန်လည် ကြည်လင်စေလိုက်တယ်။ မွှေးရနံ့ကတော့ ကိုယ်နဲ့ ထပ်ချပ်မကွာ ရီဝေလို့။ အခန်းဝက စားပွဲခုံပုလေးပေါ် အသင့်ချထားတဲ့ ပိုက်ဆံအိတ်ထဲမှာ လိုအပ်တဲ့ ပစ္စည်းပစ္စယ စုံ မစုံ တချက်စစ်ပြီး ဝတ်နေကျ မီးခိုးရောင် ပါးရှည်ရှည် အနွေးထည်နဲ့ ကားသော့ကိုယူရင်း အိမ်အပြင်ကို ထွက်ခဲ့တယ်။

ကားဖြည်းဖြည်းမောင်းနော် ဆိုတဲ့ မေမေ့ရဲ့အသံဟာ သံပန်းတံခါးအကွက်တွေထဲကနေ အပြင်ကို မပျက်မကွက်… ပြီးတော့ ကြင်ကြင်နာနာ တိုးထွက်လာတယ်။ ဟုတ်ကဲ့ပါ မေမေလို့ ဒရောသောပါး တုန့်ပြန်သံ၊ ဒေါက်အချွန်နဲ့ ရှူးဖိနပ်က အသံခပ်အုပ်အုပ်၊ ခေါ်ထားတဲ့ ဓါတ်လှေခါးက သူ ရောက်ရှိကြောင်း တတီတီ အချက်ပေးသံ၊ အမိုးနီနီနဲ့ လျှောက်လမ်းကလေး၊ ကောင်းသောမနက်ခင်းပါလို့ ကြောင်ဘာသာဗေဒနဲ့ နှုတ်ဆက်လေ့ရှိတဲ့ မိညောင်နဲ့ ဖိုးကျား၊ သန့်ရှင်းရေးအလုပ်သမားလေးရဲ့ လက်ကိုင်ဖုန်းက လူမျိုးခြားသီချင်းသံ မြူးကြွကြွ၊ ကျန်းမာရေးအတွက် လေ့ကျင့်ခန်းလုပ်နေတဲ့ အမျိုးသမီးကြီး တစ်စု၊ ပန်းပွင့်ဖြူဖြူတွေ ကြွေကျလေ့ရှိတဲ့ သစ်ပင်ခပ်ရွယ်ရွယ်တွေ တန်းစီနေတဲ့ ကားရပ်နားရာကွင်းပြင်ကျယ်… အားလုံးဟာ သူ့နေရာနဲ့သူ အစီအစဉ်တကျ၊ ပြီးတော့ နေသားတကျ။ ဒါဟာ ရက်သတ္တတပတ်မှာ ငါးရက်ရှိတဲ့ အလုပ်လုပ်ရက်တိုင်းအတွက် ဆင်တူ မနက်ခင်းတွေပဲ။ ကြည့်နေရင်းမှာ အဝါရောင် ကျောင်းကြိုကားတစ်စီး လမ်းမက ဖြတ်သွားတယ်။ သေချာတယ် နာရီကြည့်စရာ မလိုဘူး၊ ဒါဟာ ရှစ်နာရီ ဆယ်မိနစ်ပဲ။ စိတ်ထဲမှာ အဲဒီ အဆင်တူ၊ အသွေးတူ၊ အချိန်တူ မနက်ခင်းတွေကို ငြီးငွေ့စိတ်က ဖျတ်ကနဲ။ ဘယ်လောက် မကြည်လင်ချင်စရာကောင်းပါလိမ့်။ ချက်ချင်းပဲ ခေါင်းကို ခါရင်း မကြည်လင်တာတွေကို ဖယ်ထုတ်နိုင်အောင် ကြိုးစားရတယ်။

ကားကို အေးအေးဆေးဆေး မောင်းထွက်လာခဲ့တယ်။ ကက်ဆက်ထဲမှာ ရှိနေတဲ့ သီချင်းစီဒီဟာ ကြည်လင်စရာ သီချင်းတွေကို တစ်ပုဒ်ချင်း ရွေးကူးထားတဲ့ စီဒီတစ်ချပ် ဖြစ်မယ်လို့ ယူဆရင်း ခလုပ်ကိုနှိပ်လိုက်တော့ “တစ်ပွင့်ထဲပွင့်တဲ့ အမြင့်ပန်းကို ပန်ဆင်ချင်လာ တတ်တဲ့ တစ်နေ့ကျရင် မင်းကမ္ဘာဟာ တဖြည်းဖြည်း ရှုပ်ထွေးလို့လာမယ်…” တဲ့။ အင်မတန် ချစ်စရာကောင်းတဲ့ သီချင်းလေး။ တေးဂီတဟာ လူတစ်ယောက်ရဲ့ စိတ်နှလုံးကို အလွန်တရာ နူးညံ့ပျော့ပြောင်းပြီး ကြည်လင်စေတယ်တဲ့။ သိပ်မှန်တာပဲ။ အနည်းဆုံး ကိုယ်လို စိတ်အနည်ထလွယ်၊ နောက်ကျိလွယ်တဲ့ လူတစ်ယောက်အတွက်တော့ မှန်တာ သေချာတယ်။ ကားလမ်းတလျှောက်မှာ ကြုံရတဲ့ စိတ်မကြည်လင်စရာတချို့တလေကို သီချင်းတွေအားကိုးနဲ့ ကြည်လင်စေလိုက်တယ်။ ကားကြီး ကားငယ် အသွယ်သွယ်နဲ့ပြည့်နေတဲ့ အမြန်မောင်းလမ်းမကျယ်မှာ ငှက်ကလေး တစ်ကောင်တစ်လေမှ ပျံသန်းသွားတာ မတွေ့ရဘူး။ ဘာပဲဖြစ်ဖြစ်… မကြည်လင်စရာတွေကို သတိမပြုမိအောင် လျှစ်လျှူရှုရင်း ဖြတ်သန်းနိုင်ခဲ့တာကတော့ ဝမ်းသာစရာပဲ။

အလုပ်ခန်းထဲက မရပ်မနား ရွေ့လျားနေတဲ့ နာရီလက်တံတွေထဲမှာ ကြည်လင်စရာက နည်းနည်းနဲ့ မကြည်လင်စရာ များများတွေ အထပ်လိုက် အပုံလိုက် ရောနှောလို့။ တကယ်တော့လည်း ဒါဟာ ပုံမှန်နေရက်တွေအတွက် ပုံမှန် အနေထားတွေပါပဲလို့ စိတ်ကို ဖြေတွေးရတယ်။ လုပ်စရာရှိတာတွေ အတန်အသင့်ပြီးသွားတော့မှ ပုခုံးနဲ့ ဇက်က အကြောတွေ တင်းမာ နာကျင်နေတတ်တာအတွက် ဆရာဝန်က လေ့ကျင့်ခန်းလုပ်ခိုင်းထားတာ သတိရတယ်။ ခေါင်းကို ဘယ် ညာ အထက် အောက် လှုပ်ရှားလိုက်တယ်။ အညောင်းတော့ ပြေသား။ မကြည်လင်စရာတွေထဲက ကြည်လင်စရာ တစ်ချက်ပေါ့။ အဲဒီနောက်မှာတော့ နေ့လည်စာ စားဖို့ အချိန်။ ပါးသည်ထက် ပါးအောင် လွှာထားတဲ့ ငါးအသားချပ်လေးတွေနဲ့ မုန်ညင်းစိမ်းအရွက်နည်းနည်းကို ရောပြုတ်ထားတဲ့ ငါးပြုတ်ကို စားတယ်။ စားသောက်ဆိုင်တန်းထဲက လေအေးပေးစက်ရဲ့ အေးစက်စက် အငွေ့အသက်ကို မကြိုက်တဲ့အတွက် ပါးပါးလှီးထားတဲ့ အနီရောင်ငရုတ်သီး အပိုင်းအစ လေး ငါးခု ကို ငါးပြုတ်ထဲ ထည့်ရသေးတယ်။ အင်မတန်ပူစပ်တဲ့ ငရုတ်သီးတွေ။ ပြီးတော့ သောက်နေကျ အန်ကယ်ကြီးဆိုင်က ကော်ဖီတစ်ခွက် ဝယ်သောက်တယ်။ နေ့လည်စာဟာ စိတ်ကြည်လင် ကျေနပ်စရာပါပဲ။

အပြန်လမ်းမှာ မြက်ခင်းစိမ်းတွေ ထူသိပ်နေတဲ့ ကွင်းပြင်ကျယ်တစ်ခုကို ဖြတ်ရတယ်။ ခေါင်းမော့လိုက်တဲ့အချိန်မှာ သိပ်လှတဲ့ တိမ်တွေနဲ့ မျက်နှာချင်းဆိုင် ဝင်တိုးပါလေရော။ အင်မတန်ကြည်လင်စရာကောင်းတဲ့ အခိုက်အတံ့လေးပဲ။ “တိမ်တွေက လှလိုက်တာ ကိုယ့်မှာ တရားနဲ့ ဖြေရတယ်” ဆိုတဲ့ ကဗျာတစ်စ ခေါင်းထဲ ရောက်လာတော့ တစ်ယောက်တည်း ပြုံးကာရယ်ကာနဲ့ ကြည်လင်လို့။ ရှေ့ကိုဆက်လျှောက်လာရင်း မြက်ခင်းစပ်တနေရာက မြင်ကွင်းဟာ ကိုယ့်ခြေလှမ်းတွေကို ဆောင့်ဆွဲလိုက်သလို တုံ့သွားစေတာ။ ကြည့်ပါဦး... လူတရပ်ကျော်တဲ့ အစိမ်းရောင် တိုင်အကောက်ကလေးတွေ အစီအရီ။ ဒါတွေဟာ ငှက်လှောင်အိမ်တွေကို ချိတ်ဆွဲတဲ့ တိုင်တွေပဲ။ စိတ်ဟာ ချက်ခြင်းပဲ မသက်မသာဖြစ်သွားတယ်။ ဒီနိုင်ငံမှာ အသက်အရွယ်နည်းနည်းရပြီး အားလပ်ချိန်လည်း ရှိကြသူတချို့ဟာ ဝါသနာအရ အလှမွေးငှက်တွေကို လှောင်အိမ်တွေနဲ့ မွေးထားတတ်ကြတယ်။ ပြီးတော့ တစ်နေ့ တစ်ခါ ဒါမှမဟုတ် ရက်ခြား ဆိုသလို လှောင်အိမ်လေးတွေကို သယ်ယူလာပြီး ခုနက မြင်ရတဲ့ တိုင်လေးတွေမှာ ချိတ်ဆွဲ ပြသလေ့ရှိကြတယ်။ ပြီးတော့ ငှက်ဝါသနာရှင် အချင်းချင်း ငှက်တွေအကြောင်း ဗဟုသုတပဲဖြစ်ဖြစ်၊ အပျင်းပြေပဲဖြစ်ဖြစ် စကားပြောကြ၊ တခြားရောက်တတ်ရာရာ စကားတွေ ပြောကြ၊ အတွေးအမြင်ခြင်း ဖလှယ်ရင်း အချိန်ဖြုန်းတတ်ကြတယ် ဆိုပါတော့။ သူတို့အပြောအရတော့ ငှက်တွေကလည်း သူတို့ အချင်းချင်း တစ်ကောင်နဲ့ တစ်ကောင်၊ လှောင်အိမ်တစ်ခုနဲ့ တစ်ခုလှမ်းပြီး စကားတွေ ပြောကြတယ်တဲ့။ အင်းလေ… ကောင်းတဲ့ဖက်က လှည့်တွေးရင်တော့ သူတို့ပြောတာလည်း ဟုတ်တာပါပဲ။ ကိုယ့်မှာသာ ငှက်ကလေးကို ချစ်သလောက် လှောင်အိမ်တွေကို အမုန်းကြီး မုန်းတီးတဲ့ ရောဂါ ရှိတာကိုး။ ကိုယ်ချစ်တဲ့ငှက်ကလေးကို လှောင်အိမ်ငယ်ထဲမှာ အုပ်လှောင်ထားလိုတဲ့စိတ်မျိုး စိုးစဉ်းမှ ကိုယ့်မှာ မရှိရိုးအမှန်ပါ။ ဒါကြောင့်လည်း ငှက်ကလေးနဲ့ ကိုယ်ဟာ အဝေးကြီး ဝေးနေခဲ့ကြတာ မဟုတ်လား။ ခပ်ဝေးဝေးကို ချော်ထွက်သွားတဲ့ စိတ်အတွေးတွေကို ပြန်လည်တည့်မတ်ယူပေမယ့် သိပ်တော့ အဆင်မပြေလှဘူး။ လှောင်အိမ်ထဲကနေ ကျီကျီကျာကျာနဲ့ အော်နေတဲ့ ငှက်သံတွေသာ နားထဲမှာ ပဲ့တင်ထပ်လာတယ်။ ငှက်ကလေးရေ… ကိုယ့်ရဲ့ ငှက်ကလေးရေ… အဝေးကို ပျံသွားတဲ့ ကိုယ်ချစ်တဲ့ ငှက်ကလေးကို သိပ်လွမ်းလာတာ။ ညီညာတိပနေတဲ့ မြက်ခင်းစိမ်းတွေနဲ့ သိပ်လှတဲ့ တိမ်တွေလည်း မကယ်နိုင်တော့ဘူး။ ဖြစ်ချင်တော့ ရုံးတံခါးဝကို ရောက်တဲ့ အချိန်နဲ့ ရုတ်တရက် သည်းသည်းမည်းမည်း မိုးရွာချလိုက်တဲ့ အချိန်နဲ့ ငှက်ကလေးရေ… လို့ သတိတရ ရေရွတ်မိတဲ့ အချိန်နဲ့ တစ်ချိန်တည်းပဲ။ ကိုယ့်စိတ်တွေ ရုတ်ချည်း အနည်ထလာအောင် ဘယ်သူ ဖန်တီးလိုက်တာပါလိမ့်။

အလုပ်စားပွဲမှာ အနက်ရောင်ပိန်းပိန်းပဲရှိနေသေးတဲ့ မော်နီတာကို မျက်နှာချင်းဆိုင်လို့ ငူငူငေါင်ငေါင်နဲ့ ထိုင်နေမိတာ တစ်နာရီလောက်ကြာမယ် ထင်တယ်။ တစက်ကလေးမှ ပြန်လည်ကြည်လင်လာချင်ဟန်မတူတဲ့ စိတ်တွေကို တစ်ခုခုနဲ့ အာရုံပြောင်းမှ ရတော့မယ်။ မျက်စိတကမ်းအကွာမှာ ရှိနေတဲ့ သတင်းစာပေါ်ကို အကြည့်ရောက်သွားတယ်။ အဲဒီမှာ အပြာရောင်စာလုံးထူထူတွေနဲ့ ရေးထားတဲ့ စာအုပ်ဆိုင်ကြီး တစ်ဆိုင်ရဲ့ နာမည်ကို တွေ့လိုက်တယ်။ ဆိုင်ကြော်ငြာလား၊ စာအုပ်တွေ ဈေးလျှော့တဲ့ ကြော်ငြာလား၊ ဆိုင်နေရာ ပြောင်းမလို့ ကြော်ငြာတာလား၊ ဒါမှမဟုတ် ဆိုင်ပိတ်တော့မယ့် အကြောင်း ရေးထားတဲ့ သတင်းလား ဘာမှ သဲသဲကွဲကွဲ မသိသေးတဲ့အချိန်မှာ စိတ်ကတော့ အဲဒီစာအုပ်ဆိုင်ကြီးထဲကို ရောက်နေနှင့်ပြီ။ အခန်းတံခါးကို အသံမမြည်အောင် သတိထားပြီး ပိတ်ရင်း အလုပ်ခန်းကို ကျောခိုင်းလိုက်တယ်။

စီစီရီရီ ထပ်ထားတဲ့ စာအုပ်စင်တွေကြားမှာ စောစောက နောက်ကျိ ညစ်ညူးနေခဲ့တဲ့ စိတ်အစဉ်ဟာ ယူပစ်သလို ပျောက်သွားကြတာ အင်မတန်ထူးဆန်းတာပဲ။ စာအုပ်ဆိုင်ထဲမှာ ကိုယ်နှစ်သက်တဲ့ စာအုပ်တွေကို စိမ်ပြေနပြေ တစ်အုပ်ချင်း ရွေးချယ်နေရတဲ့ ခံစားမှုလောက် စိတ်ကို ကြည်လင်စေတာ၊ စိတ်ကို ကျေနပ်မှုရစေတာ ရှိပါဦးမလား။ ကိုယ်နှစ်သက်နိုင်မယ့် စာတစ်အုပ်ကို ရွေးယူပြီး မျက်နှာဖုံးပန်းချီကို အဓိပ္ဗါယ်ဖေါ် ကြည့်လိုက်၊ နောက်ကျောဖုံးပေါ်က မှတ်ချက်လေးတွေ ဒါမှမဟုတ် ဝတ္ထုရဲ့ ကျောရိုး အကျဉ်းရေးထားတဲ့ စာကြောင်းလေးတွေကို ဖတ်လိုက်၊ အတွင်းက စာတစ်မျက်နှာ နှစ်မျက်နှာကို အမြည်းဖတ်လိုက်၊ ခဏ ပြန်ချထားပြီး နောက်တစ်အုပ် ကောက်ကိုင်လိုက်၊ ခုနကလိုပဲ အစဉ်အတိုင်း လုပ်လိုက်၊ ကြိုက်တယ်ကွာ ဝယ်မယ် ဆိုပြီး လက်ထဲ ပွေ့ထားလိုက်နဲ့။ အရာရာကို မေ့ထားနိုင်တဲ့ အချိန်တွေပါပဲ။

နောက် စာအုပ်တန်း တစ်တန်းဆီကို ဆက်လျှောက်သွားခိုက် တနေ့က အင်တာနက်မှာကြော်ငြာထားတဲ့ စာအုပ်တစ်အုပ်ကို သတိရသွားတယ်။ ဖုန်းထဲမှာ အဲဒီစာအုပ် မျက်နှာဖုံး ဓါတ်ပုံလေး သိမ်းထားမိတာ ပြန်ရှာရမယ်။ အိတ်ထဲက ဖုန်းကို ကပျာကယာထုတ် ဓါတ်ပုံတွေထဲမှာ မှတ်ထားတဲ့ စာအုပ်မျက်နှာဖုံးကို ပြန်ရှာ။ စာရေးဆရာတွေ နာမည် အက္ခရာစဉ်နဲ့ စီတန်းထားတဲ့ စာအုပ်တွေကို တစ်အုပ်ချင်းစီ ခပ်ဖွဖွ တို့ ထိ သွားရင်း ကိုယ်လိုချင်တဲ့ စာအုပ်ကိုရှာ။ တွေ့သွားတော့ ခုနကလိုပဲ အမြည်းဖတ်၊ တစ်မျက်နှာ နှစ်မျက်နှာ သုံးမျက်နှာအထိ စိတ်ပါလက်ပါ ကိုယ့်ကိုဆွဲဆောင်လာပြန်တော့ ထိုင်စရာနေရာလေး တစ်ခုကို ရှာပြီး စိတ်အေးလက်အေး ထိုင်ဖတ်၊ ကိုယ့်ကမ္ဘာဟာ တိတ်ဆိတ်၊ စိတ်ထဲမှာ ရှုပ်ထွေးနောက်ကျိစရာ ဘာဆို ဘာမှ မသိတော့၊ ကိုယ်မုန်းတဲ့ နာရီလက်တံတွေ၊ လှောင်အိမ်တွေနဲ့ စိတ်မကြည်လင်စရာတွေလည်း မရှိတော့၊ နောက်ဆုံး ကိုယ့်အာရုံထဲမှာ ချစ်ရတဲ့ ငှက်ကလေးပါ မရှိတော့။ အအေးငွေ့တွေရိုက်နေတဲ့ မှန်နံရံရယ်၊ မီးခိုးရောင် ကော်ဇောခင်းရယ် စာအုပ်ထဲက စာကြောင်းတွေရယ်သာ ကြီးစိုး။ ဖတ်လို့ အတော်လေးကျေနပ်အားရသွားပြန်တော့ ခါးကို ဆန့်လို့ အညောင်းဖြေ။ စာအုပ်တန်းတွေ ဆီကို နောက်တစ်ခေါက် ထပ်သွား။ ဆိုင်ပိတ်ချိန်မှ အိမ်ပြန်ရင် မေမေဆူမှာ… ဟင့်အင်း မဟုတ်သေးပါဘူး မဆူပါဘူး မေမေက မျှော်နေမှာပါ။

လက်ထဲ မနိုင်မနင်း ပွေ့ပိုက်ထားတဲ့ စာအုပ်တွေကို ငွေရှင်းကောင်တာပေါ် ချလိုက်ချိန်မှာ ပြီးပြည့်စုံတဲ့ ခံစားမှုမျိုးဟာ ကြည်လင်စရာ။ စာအုပ်တွေ ထည့်ထားတဲ့ အဝတ်အိတ်ထူထူရဲ့ လေးလံမှုဟာ ကိုယ့်အတွက်တော့ ငှက်မွှေးလေးတမျှ ပေါ့ပါးလို့။ ဟော… ငှက်မွှေးလေး တဲ့… အဲဒီအချိန်မှာပဲ ကိုယ့်ရဲ့ ငှက်ကလေးကို ပြန်သတိရသွားတာ။ သတိရစိတ်နဲ့ ကြည်လင်ချင်ပါတယ် ငှက်ကလေးရေ။ ကိုယ် မင်းကို ချစ်တယ်။

စာအုပ်ဆိုင်က ပြန်ထွက်လာတော့ အိမ်မပြန်လမ်းမကြီးပေါ်မှာ နီယွန်မီးတိုင်တွေ လင်းနေပြီ။ ကိုယ့်အိမ်ကလေးထဲမှာရော အဝါရောင် မီးပွင့်လေးတွေ လင်းလက်နေရောပေါ့။ အိမ်တံခါးဝကို ရောက်တော့ ဖေဖေက ခွာသံကြားတယ်ဟေ့လို့ ထုံးစံအတိုင်း ပြောပြီး မေမေကတော့ ညစာ မုန့်ဟင်းခါး ချက်ထားတယ်တဲ့။ မုန့်ဟင်းခါး… မနက်တိုင်း ကိုယ်တောင့်တမိပြီး စိတ်ကို စွဲလမ်းစေတဲ့ အရာတွေထဲက တစ်ခု။ ဒီလိုဆိုတော့ ကြည်လင်လက်စ စိတ်အစဉ်ဟာ ဆက် ဆက်ပြီးသာ ကြည်လင်ဖို့ပဲပေါ့။ ရေမြန်မြန်ချိုးလိုက်တယ်။ မုန့်ဟင်းခါးကို မုန့်ဖတ်နည်းနည်း အီကြာကွေးနည်းနည်းပေါ်မှာ ဟင်းရည်များများ ဆမ်းပြီးစားလိုက်တယ်။ ဝယ်လာတဲ့ စာအုပ်တွေ ဖတ်ချင်လှပြီ။ ကိုယ့်ရဲ့ အိပ်ခန်းထဲက စာကြည့်မီးတိုင်လေးကို ဖွင့်လိုက်တယ်။ အိပ်ခန်းပြတင်းကနေ တိုးဝင်လာတတ်တဲ့ ငှက်အော်သံ ကျီကျီကျာကျာတွေ မကြားရတော့ဘူး။ သူတို့ အိပ်ကုန်ကြရောပေါ့။ ခုနက ဝယ်လာတဲ့ စာအုပ်တွေကို တယုတယ ပြန်ကြည့်ရင်း ဒီညအတွက် ဖတ်စရာ ရွေးချယ်။ အခုတော့လည်း စိတ်ဟာ ဘယ်တုန်းကမှ ဘယ်လိုမှ မနောက်ကျိခဲ့ဖူးတဲ့ အသစ်စက်စက် ရေတစ်ဖန်ခွက်လို၊ မွေးကင်းစ ကလေးငယ်လေးရဲ့ နုညက်ကြည်လင်တဲ့ ဖဝါးပြင်လေးလို၊ ရေကြည်သောက်လျှင် မြင်ရမလောက်ပင် လို့ တင်စားကြရတဲ့ မိန်းမပျိုလေးရဲ့ လည်တိုင်ကျော့လို။ မကြည်လင်စေတာတွေကို ဖယ်ထားပြီး ကြိုးစားကြည်လင်စေခဲ့တဲ့ တစ်နေ့တာကို နှစ်သက် ကျေနပ်လို့။

ဖတ်လက်စ စာအုပ် တဝက်မကျိုးခင်မှာ ဘယ်ရီသီးနံ့ သင်းမွှေးတဲ့ ဖယောင်းတိုင်အနီက မီးတောက်ကို ငေးကြည့်ရင်း မျက်လုံးတွေက မှေးစင်းလာခဲ့တယ်။ နှာခေါင်းထဲမှာ Opium ရေမွှေးနံ့ရလာတယ်။ မနက်ကဝတ်သွားတဲ့ ဝတ်စုံလည်း အခန်းထဲမှာ ချိတ်ဆွဲမထား၊ လောလောဆယ် ကိုယ့်ကိုယ်ပေါ်မှာလည်း တစ်စက်ကလေးမှ ဆွတ်ဖြန်းမထားပါပဲနဲ့… စွဲလမ်းမှုဟာ အထင်အရှား… ပြီးတော့ ရီဝေဝေ။ ပြတင်းတံခါးကနေ အပြင်ဖက်ကို လှမ်းကြည့်တော့ ကောင်းကင်ပေါ်မှာ ကြယ်တစ်ပွင့်တစ်လေကိုမှ မတွေ့ရဘူး။ ရီဝေလက်စမကုန်တဲ့ အတွေးထဲမှာ ကြယ်ပုံတွေကို စက္ကူဖြူတစ်ရွက်ပေါ်မှာ ဆွဲ၊ ကပ်ကြေးနဲ့ညှပ်ပြီး နက်ပြာရောင် ကောင်းကင်ကြီးမှာ သွားကပ်ပေးဖို့ စဉ်းစားတယ်။ အမျိုးအစားကောင်းတဲ့ ကော်ပုလင်းလေး တစ်လုံးတော့ ယူသွားဖို့ လိုအပ်မှာပေါ့။ သစ်ပင်တွေကတော့ လေတိုးလို့ ထင်ပါရဲ့ ဘယ်ယိမ်းညာနွဲ့ လှုပ်ရှား ကခုန်လို့။ သိုးတွေကို ရေတွက်မဲ့အစား အနားက ပန်းစိုက်အိုးထဲက နှင်းဆီပွင့်ဖတ်တွေကို ရေတွက်တယ်။ ပွင့်ဖတ် စုစုပေါင်း ၁၆၈ ခု။ ထောင့်ချွန်ငါးခုနဲ့ ငွေမင်ရောင် ကြယ်ပွင့်တွေ တစ်ခုချင်းစီ ညှပ်ရင်း ကော်နဲ့ လိုက်ကပ်ရင်း မျက်လုံးဟာ ပိုပိုပြီး မှေးစင်းလာ။ ကောင်းသောညပါ ငှက်ကလေးရေလို့ နှုတ်ဆက်ချိန်မှာ အိပ်ရာဝင်တေးသွားဆီက ငြိမ့်ငြောင်းတဲ့ သီချင်းသံကို ကြားရတယ်။

မကြည်လင်တာတွေ မှောင်ရိပ်ထဲ သိပ်ခဲ့ကွယ်… မကြာခင်ဆိုရင် မိုးလင်း နိုးထတော့မယ် တဲ့။

သက်ဝေ
(၀၃ မတ်လ ၂၀၁၆)


- ၂၀၁၆ ဇွန်လ ထုတ် မိုးမခ မဂ္ဂဇင်းတွင် ဖေါ်ပြပြီးဖြစ်သည်။

2 comments:

  1. ကုိုယ်က ငှက်ချစ်သူမို့ 
    ဒီစာလေးကုိုထူးထူးခြားခြားပုိုနှစ်သက်မိတယ်။
    Good job!!
    အုိုင်အိုရာ

    ReplyDelete
  2. ညှိုးနွမ်းနေတဲ့ စိတ်ကလေး လန်းဆန်းသွားပြီ မသက်ရေ ကျေးဇူးကမ္ဘာ ♥♥♥

    ReplyDelete

အမှတ်တရ ရေးခဲ့ပါ...