စိတ် အကိုက်ခံရခြင်း

သူတို့ကို သတိထားမိသည်မှာ အတော်လေး ကြာခဲ့ပြီ။ ကြာဆို ဒီအိမ်ကို ပြောင်းလာကာစထဲကပင် ဖြစ်သည်။ အရင်အိမ်မှာတုန်းက သူတို့တွေကို တခါတလေတောင် မတွေ့ခဲ့ရဖူးပါ။ သည်အိမ်ကို ပြောင်းလာပြီးနောက် ရက်အနည်းငယ်အကြာမှာ အိမ်အဝင်ဝနားတွင် လှုပ်လှုပ်ရွရွနှင့် စီတန်း လှည့်လည်သွားလာနေသော သူတို့တွေကို မမျှော်လင့်ပဲ တွေ့လိုက်ရသည်။

သူတို့သည် တဦးချင်း တယောက်ချင်း၏ အရွယ်အစားအားဖြင့် သေးကွေးသလောက် စုပေါင်းလိုက်လျှင် ခွန်အား ကြီးထွားလာကြသူများ ဖြစ်သည်။ မြင်ရ တွေ့ရသလောက် အချင်းချင်း စည်းလုံး ညီညွတ်မှု ရှိကြသည်။ ဇွဲ လုံ့လ ဝီရိယ ရှိကြသည်။ သူတို့သည် တနေရာမှ တနေရာသို့ ညီညီညာညာ စီတန်းသွားလာတတ်ကြသည်။ တဦး တယောက်၏ ခေါင်းဆောင်မှုကို အများစုက ကျေကျေနပ်နပ် လက်ခံ ကျင့်သုံးသည် (ဟု ထင်ရသည်)။ တယောက် အားနှင့် မရသည်ကို စုပေါင်းအားနှင့် ဆောင်ရွက်တတ်ကြသည်။

ကိုယ်သည် အင်းဆက်ဆိုလျှင် မည်သည့် အင်းဆက်မျိုးကိုမဆို သေမတတ် ကြောက်ရွံ့သူတယောက် ဖြစ်သည်။ သို့သော် သည်အသေး အကွေးကောင်လေးများကိုတော့ ကြောက်သော်လည်း သူတို့၏ အရွယ်အစားကိုကြည့်ရင်း သနား ကြင်နာသော စိတ်ကလေး အနည်းငယ် ဝင်လာသောကြောင့် အရမ်းကာရော မနှိမ်နင်းချင်။ သည်အတိုင်းသာ ကြည့်နေလိုက်မိသည်။ လွန်လွန်ကဲကဲတွေ ဖြစ်မလာလျှင် တော်လှပြီဟု တွေးထားသည်။ သူတို့ကို စေ့စေ့စပ်စပ် ငုံ့ကြည့်ပြီး နင်တို့ ဒီအိမ်မှာ နေချင်ရင် ကောင်းကောင်းနေ လိမ်လိမ်မာမာနေကြ၊ ငါ့ကို ဒုက္ခမပေးကြရင် နင်တို့ကိုလဲ ငါ ဘာမှ မလုပ်ဘူး ဟူ၍ စိတ်ထဲကနေ ခပ်တိုးတိုး ပြောမိသည်။

သူတို့… သူတို့…
သူတို့ ဆိုသည်မှာ အရောင် နီကျင်ကျင်နှင့် ပုရွက်ဆိတ်ကလေးများ ဖြစ်ကြသည်။

သို့သော် သူတို့သည် ကိုယ့်ပြောစကားကို နဲနဲမှ အလေးမထား၊ နားမထောင်ကြပါ။ သူတို့သည် တအိမ်လုံး နေရာအနှံ့ လျှောက်သွားကြသည်။ ထမင်းစားပွဲနားသို့လဲ လာကြသည်။ မီးဖိုအနားမှာလဲ ဘာပဲ ချထား ချထား ရစ်သီ ရစ်သီ လုပ်တတ်ကြသည်။ အဆိုးဆုံးကတော့ ကိုယ်စားနေကျ သကြားလုံးများ ချောကလက်များ ထည့်ထားသောဗူးနှင့် အာလူးကြော်ထုပ်များကို အပိုင်စီးကြခြင်းပင်။ သူတို့ကို မနှစ်သက်သော ကိုယ်သည် ကိုယ်ထိလက်ရောက် နှိမ်နင်းရန်လဲ အမှန်တကယ် သတ္တိမရှိခဲ့ပါ။ ပြီးတော့ အစုလိုက် အပြုံလိုက် သေကြေပျက်စီးကြခြင်းကိုလဲ နဲနဲမှ မလိုလားသောကြောင့် အတတ်နိုင်ဆုံး ရှောင်ကွင်း ဖယ်ရှားကာ သည်းခံနေခဲ့သည်။ သူတို့ကို ကိုယ်ပေးခဲ့သော အပြင်းဆုံး အပြစ်ဒါဏ်မှာ လေနှင့် မှုတ်ထုတ် ဖယ်ရှားခြင်းမျှသာ။

သို့သော် ညနေခင်းတခုမှာ သူတို့အားလုံးကို နာကျည်းမုန်းတီးမိပြီး မေတ္တာထားမရစေသော အကြောင်းတခု ပေါ်လာခဲ့သည်။ ထိုနေ့က သူငယ်ချင်းတယောက်နှင့် ဖုန်းပြောအပြီးမှာ ဖုန်းကို ထမင်းစားပွဲပေါ်တွင် ချထားခဲ့မိသည်။ အနားမှာ စားလက်စ ကျောက်ကျော တပန်းကန်လဲ ရှိနေသေးသည်။ တိုတိုပြောရလျှင် ထိုကျောက်ကျောကို သူတို့ လာစားကြသည်။ သည်လောက်နှင့်ဆို ကိုယ် ခွင့်လွှတ်နိုင်ပါသေးသည်။ သို့သော် ထိုမှတဆင့် ကိုယ်မသိလိုက်ခင်မှာ ကျောက်ကျောပန်းကန်အနီးမှာ ချထားသော ဖုန်းကို လာတက်ပြီး လေ့လာကြသည်။ အဆိုးဆုံးက နောက်တကြိမ် ဖုန်းမြည်လာသောကြောင့် ထိုဖုန်းကို နားဖြင့်ကပ်ကာ ပြောအပြီးမှာ… ... ...

ဖုန်းနံပါတ် မှားခေါ်ခြင်း ဖြစ်သောကြောင့် စုစုပေါင်း တမိနစ်ပြည့်အောင် မပြောဖြစ်လိုက်ပါ။ သို့သော် ဖုန်းချအပြီး နားထဲမှာ တစီစီ မြည်သံတွေ ကြားနေရသလိုလို... ယားကျိကျိ ဖြစ်လာသလိုလို...။ အား…. တစုံတခုသော အသိကြောင့် မှန်ရှေ့သို့ အမြန်ပြေးကြည့်လိုက်ရာ ကိုယ့် နားရွက် အနီး အနားတဝိုက်မှာ သူတို့တွေကို တွေ့လိုက်ရလေသည်။ တချို့က နားရွက် အဝမှာ… ဒါဆို သေချာနေပြီ… သူတို့တွေထဲက တချို့က နားရွက်ထဲသို့ ဝင်သွားသည်မှာ သေချာနေပြီ။

ထိုတခဏမှာ နားထဲမှ အသံမျိုးစုံ ကြားလာရတာ… တဒုန်းဒုန်းနဲ့ လှမ်းလျှောက်နေသော ခြေသံတွေ၊ အားရပါးရ ရယ်မောသံတွေ၊ ခိုးခိုးခစ်ခစ် ခပ်ကျိတ်ကျိတ် ရယ်မောသံတွေ၊ တခါတခါမှာ ကျယ်ကျယ်လောင်လောင် အော်ဟစ်လိုက်သော အသံတွေ၊ တခုခုကို လွှဖြင့် ပွတ်တိုက်ဆွဲနေသလို တဂျစ်ဂျစ် မြည်သံတွေ၊ တခုခုကို လှုပ်ခါယမ်းနေသော ကလောက် ကလောက် မြည်သံတွေ၊ ပစ္စည်းတွေကို တရွတ်တိုက် တွန်းရွှေ့သံတွေ၊ ပြီးတော့ တစစ်စစ် ကိုက်ခဲလာသလိုလို ခံစားမှုတခု… သေချာနေပါပြီ။ သူတို့တွေ နားထဲက တခုခုကိုတော့ ကိုက်ဖြတ်နေကြပြီ။ နားစည်ကို ကိုက်ဖြတ်နေကြတာလား… ဒါဆို မကြာခင် ကိုယ် နားမကြားသူတယောက် ဖြစ်သွားနိုင်သည်။ နားစည်မှာ အပေါက်သေးသေးလေး ဖြစ်သွားရင်တောင် အကြားအာရုံတွေက ၂၀ ကနေ ၃၀ ရာခိုင်နှုန်း လျော့ကျသွားတတ်သတဲ့။ ပြီးတော့ နားထဲမှာ ရှိနေတဲ့ သဘာဝကပေးထားတဲ့ ပစ္စည်းတွေလဲ သူတို့တွေ ဟိုရွှေ့သည်ပြောင်းလုပ်နေတာ အခုလောက်ဆို နေရာထိုင်ခင်း အထားအသိုတွေ မှားယွင်းကုန်လောက်ပြီ ထင်ပါရဲ့…။

ထိုမျှနှင့် မပြီး… မီးခိုးကြွက်လျှောက် ဆက်ကာ ဆက်ကာ စဉ်းစားမိသည်။ ထိုသတ္တဝါလေးတွေသည် နားထဲမှ တဆင့် ဦးနှောက်ဆီသို့ ဆက်လက်ကူးသန်း သွားနေကြပြီလား… ပိန်ပါး သေးကွေးကာ ပေါ့ပါးလှသော သူတို့တွေသည် သွေးကြောတွေ အာရုံကြောတွေ နာ့ဗ်ကြောတွေမှတဆင့် နေရာအနှံ့အပြားကို ဥဒဟို ကူးသန်း သွားလာနေကြလောက်ပြီ…။ ဘုရား… ဘုရား… ခေါင်းနဘမ်းတွေ အတော်ကြီးလာသည်။ ချက်ချင်းပဲ ခေါင်းတွေက တစစ်စစ် ထိုးကိုက်လာကြသည်။ ထိုအရာကို ကြည့်ခြင်းအားဖြင့် သူတို့တွေ ကိုယ့်ခေါင်းထဲ ဦးနှောက်ထဲ ရောက်ကုန်ကြတာ သေချာသလောက် ရှိနေပြီ။ ကြောက်အား လန့်အားနှင့် မျက်စေ့ကို စုံမှိတ်ချလိုက်သည်။ အဲဒီအချိန်မှာပဲ မျက်စေ့ထဲမှာလဲ ခိုးလိုးခုလုနှင့်… ထိုအခါ မရဲတရဲနှင့် မျက်စေ့ကိုဖွင့်… ကြည့်မှန်ရှေ့ကိုသွား…။ အားးးးး ကိုယ့်မျက်စေ့ဘေးနားမှာ တရွရွသွားနေသော အသေးကောင် တကောင်… သူက ဘယ်ကနေ ဘယ်လို ရောက်လာတာလဲ…။ သေချာတာကတော့ နားထဲမှ ဝင်ပြီး မျက်စေ့ထဲမှ ပြန်ထွက်လာခြင်းပဲ ဖြစ်ရမည်။ သွားပြီ… သွားပြီ…။ သူတို့တွေ လုပ်နေပုံနှင့် ကိုယ့်ဘဝတော့ ရစရာမရှိ၊ တတိတိနှင့် ဆုံးပါးတော့မည်။ အလွယ်တကူ အသက်မပျောက်နိုင်သော်လည်း အနည်းဆုံး အကြားအာရုံ အမြင်အာရုံတွေ ချို့ယွင်းကာ လူစဉ်မမှီ ဖြစ်သွားနိုင်သည်ပဲ။

စောစောက ပြာလဲ့လဲ့ ညနေခင်းသည် ယခုအခါ မှောင်မိုက်သော ညအဖြစ်သို့ အသွင် ကူးပြောင်းသွားပြီ။ မကြာခင် ကိုယ့်ဆီမှာလဲ အလားတူ မှောင်မိုက်သော အပြောင်းအလဲ ဖြစ်သွားနိုင်သည်။ ဧည့်ခန်းထဲမှ ဆိုဖါပေါ်တွင် မလှုပ်မယှက် ထိုင်နေရင်း တခုခုကို တိတ်တဆိတ် စောင့်ဆိုင်းနေမိသည်။ တယောက်တည်း ဤသို့ ငြိမ်တွေနေသည်မှာ အချိန်အားဖြင့် မည်ရွေ့မည်မျှ ကြာသွားသည် မသိ…။ ကိုယ် သိလိုက်သောအချိန်မှာ မျက်စေ့ကို ဖွင့်ကြည့်လိုက်သောအခါ အပြင်ဖက်တွင် နေရောင်တွေ အလင်းရောင်တွေ နှင့် မိုးစင်စင်လင်းနေပြီ။

ကိုယ် အိပ်ပျော်သွားတာပါလား…။ မအိပ်ခင်က အဖြစ်အပျက်ကို ချက်ချင်း သတိရသွားသည်။ သတိရရချင်း နား အကြားအာရုံကို သတိထားမိသည်။ အခန်းထဲမှ ရေဒီယိုသံ ခပ်တိုးသဲ့သဲ့ကို ကြားနေရသည်ပဲ။ စူးစူးစိုက်စိုက် နားထောင်ကြည့်မိသည်… တိုးသဲ့သော်လည်း ပီပီသသ ကြားနေရသည်က ကိုယ်အလွန်နှစ်သက်သော Celine Dion ၏ Because you Loved me သီချင်းသံ…။ ပြီးတော့ အိမ်အပြင်ဖက်ကို လှမ်းကြည့်လိုက်သောအခါ တိမ်ပြာပြာတွေကြားမှာ ဟိုဟို ဒီဒီ လူးလာ ပျံသန်းနေကြသော အရောင်စုံ ငှက်ငယ်ပိစိလေးများကို တွေ့လိုက်ရသည်။ သည်သို့ဆိုလျှင် ကိုယ့်ရဲ့ အကြားအာရုံ အမြင်အာရုံတွေ ပုံမှန်အတိုင်း ရှိနေသေးသည်ပဲ။ ကိုယ် ဝမ်းသာသွားသည်မှာ ဆိုဖွယ်ရာ မရှိ။

သည့်နောက်တွင်မတော့ မနက်ခင်း၏ လတ်ဆတ်သော လေကို တဝကြီး ရှုရှိုက်ကာ မရောက်ဖူးသော နေရာ အသစ်တခုကို ရောက်နေသူတယောက်ပမာ တအိမ်လုံး ဟိုလျှောက် သည်လျှောက် နေရာအနှံ့ လျှောက်ကြည့်မိသည်။ ဘယ်နေရာမှာများ သူတို့တွေကို တွေ့ရအုံးမလဲဟု မရဲတရဲ ရှာဖွေကြည့်မိသေးသည်။ သည်တခါ သူတို့တွေကို တွေ့လိုက်လျှင် အရင်ကလို မသိကျိုးကျွန်ပြုကာ လက်ပိုက် ကြည့်နေမိမည်လား… သို့မဟုတ် ကိုယ်ထိလက်ရောက် တခုခု လုပ်ဖြစ်မည်လား… သိပ်တော့ မသေချာလှပါ။ သေချာတာတခုကတော့ အရွယ်အစား သေးငယ်သော်လည်း အစွမ်းထက်လှသော သူတို့တွေကို ကိုယ် အရင်ကထက် ပို၍ ကြောက်ရွံ့သွားခြင်းပင် ဖြစ်သည်။ အမှန်ကတော့ သူတို့တွေသည် ကိုယ့်အသားကို ကိုက်သွားခြင်း မဟုတ်၊ ကိုယ့်စိတ်ကို ကိုက်သွားခြင်းသာ…။ အသားကို ကိုက်လိုက်လျှင် တခဏသာ နာကျင်မည်ဖြစ်သော်လည်း စိတ်ကို ကိုက်သွားသောအခါ အချိန် အတော်ကြာကြာအထိ ခံစား နာကျင်နေအုံးမှာ ဖြစ်သည်။

မည်သို့ပင်ဖြစ်စေ ညနေဈေးသွားဝယ်ရန် ရေးမှတ်ထားသည့် ဈေးစာရင်းထဲတွင် ပုရွက်ဆိတ် နိုင်သော ဆေးဗူး တဗူးကို နောက်တိုး စာရင်းအဖြစ် ဖြည့်စွက် ရေးသားထား လိုက်မိသည်။ အနည်းဆုံးတော့ အရေးကြုံလျှင် သုံးနိုင်ရင် အဆင်သင့် ဆောင်ထားသော် မမှားနိုင် ဟု ထင်မြင်ယူဆ မိပါသည်။



မှတ်ချက်။ ။ ဤပိုစ့်အတွက် ပုရွက်ဆိတ်ပုံလေး ချက်ချင်းရေးဆွဲပေးခဲ့သော ပန်ပန့်ကို ချစ်ခင်စွာ ကျေးဇူးတင်ရှိကြောင်း မှတ်တမ်းတင်ထားပါသည်။

အတူတူ ဖတ်စရာ - ခြားနားခြင်း