Wednesday, October 5, 2016

မိညောင်တို့နဲ့ တညနေ

မနေ့ ညနေက လမ်းလျှောက်ဖို့ တိုက်အောက်ကို ဆင်းတော့ မြောင်းဖုံး တစ်ခုနဲ့ တစ်ခုအကြား ဟ နေတဲ့ နေရာမှာ ခေါင်းလေးတွေ ပြူတစ် ပြူတစ်လုပ်ရင်း ထိုင်နေကြတဲ့ ကြောင်ကလေး နှစ်ကောင်ကို တွေ့တယ်။ သူတို့ဟာ လူသွားစကြံန်လေးပေါ်က လူသွားလူလာကို အကဲခတ်သလို မျက်နှာလေးတွေ မော့ပြီး စူးစူးစမ်းစမ်း လှမ်းကြည့်နေကြတယ်။ ကိုယ်နဲ့ သူတို့နဲ့ အကြည့်ချင်းဆုံတော့ အော်သံ တိုးတိုးလေးတွေ ထွက်လာတယ်။ လှမ်းလက်စ ခြေလှမ်းကို အသာ တုံ့ပြီး သူတို့ကို ရပ်ကြည့်လိုက်တော့ သူတို့အသံတွေက ပိုကျယ်လာတယ်။ ကြည့်ရတာ သူတို့တွေမှာ ပြောစရာ အတော်များများ ရှိနေပုံပဲ။ သေသေချာချာ လေးလေးနက်နက် မျက်နှာပေးလေးတွေနဲ့ တစ်ခွန်းပြီး တစ်ခွန်း လှမ်းပြောနေကြတာ။ ခက်တာက သူတို့ ဘာပြောနေတာလဲဆိုတာ ကိုယ်က ရုတ်တရက် နားမလည်ဘူး။ ဒါနဲ့ နေရာမှာ ခြေစုံရပ်ပြီး သူတို့ကို ခပ်ကြောင်ကြောင် ကြည့်နေလိုက်မိတယ်။ ကြောင်တွေကို ခပ်ကြောင်ကြောင် ပြန်ကြည့်တတ်ဖို့ဆိုတာ သိပ်လွယ်တဲ့ ကိစ္စတစ်ခုတော့ မဟုတ်ပေဘူး။ ထားပါလေ… အဲဒီ ခပ်ကြောင်ကြောင်အကြည့်ဆိုတာကို နောက်တော့မှ ဆက်ရှင်းမယ်။ အခုတော့ ကြောင်နှစ်ကောင်အကြောင်းပဲ ဆက်ပါဦးမယ်။

ပြောရရင်တော့ ကိုယ်က အဲဒီလို အကြောင်သား ရပ်ကြည့်နေလိုက်တာမှာ သူတို့အတွက် အကွက်ကောင်း ရသွားတော့တာပဲ။ နားထောင်မယ့်သူ ရှိနေပြီဆိုပြီးတော့ သူ့ထက်ငါ အပြိုင်အဆိုင် စကားတွေ လှမ်းပြောတော့တာ ကျွက်ကျွက်ကို (သို့မဟုတ်) ညောင်ညောင်ကို ညံလို့။ တစ်ကောင်ရဲ့ စကား မဆုံးသေးဘူး၊ နောက်တစ်ကောင်က အတင်း ဝင်လုပြီး ပြောတယ်။ သူ့ကိစ္စကသာ ပိုအရေးကြီးနေတယ် ဆိုတဲ့ မျက်နှာပေးမျိုးနဲ့ စကားတွေ အဆက်မပြတ် အလုအယက် လှမ်းပြောနေကြတာ။ တစ်ကောင်က ပြောလို့ မဆုံးခင်မှာ နောက်တစ်ကောင်ကလည်း တမင်ကြိုးစားပြီး မြှင့်ထားရတဲ့လေသံမျိုးနဲ့ အတင်းဝင်ပြောပြန်တယ်။ တစ်ကောင်နဲ့ တစ်ကောင် အပြိုင်အဆိုင် ပြောရင်း ပြောရင်း ဘယ်လောက်များ အရှိန်တက်လာကြသလဲဆို သူတို့ ခေါင်းလေးတွေဟာ မြောင်းထဲကနေ မော့ပြီး တိုးတိုးထွက်လာကြတာ လည်ပင်းလေးတွေကို ရှည်လို့။

ဒါနဲ့ ဟေ့ကောင်တွေ နေကြပါဦးဟ ဆိုပြီး သူတို့တွေရဲ့ သွင်ပြင်လက္ခဏာကို အရင်လေ့လာရတယ်။ နှစ်ကောင်ထဲမှာ တစ်ကောင်က အဖြူနဲ့ အနက်ကျားလေး ဒါပေမဲ့ အဖြူရောင်ပါဝင်မှုနှုန်း များတယ်။ အဖြူရောင်ရဲ့ အရှိန်အဝါကြောင့်လားတော့ မသိဘူး၊ သူ့ကိုကြည့်ရတာ နူးနူးညံ့ညံ့ရှိပုံပဲ။ နားရွက်ဖျားနှစ်ဖက်မှာ အနက်အစက်ကလေး နည်းနည်းပါတာက တမျိုး ထူးခြားနေတယ်။ ခြုံကြည့်လိုက်ရင် ချစ်စရာ ကြောင်ဖြူလေးပေါ့။ နောက်တစ်ကောင်ကတော့ အကျားလေး၊ တစ်ကိုယ်လုံး ညိုရင့်ရင့်နဲ့ အနက်ရောင် အစင်းကျား၊ အရောရော အနှောနှောတွေ ခပ်များများနဲ့ ဆိုပါတော့။ သူ့အမွှေးလေးတွေကြည့်ရတာ ကြမ်းကြမ်းထူထူ ပြီးတော့ ထောင်ပွပွလေးတွေ။ ထူးခြားတာတစ်ခုကတော့ သူတို့ နှစ်ကောင်ဟာ မကြီးလွန်း မငယ်လွန်းနဲ့ ချစ်စရာ အရွယ်တူလေးတွေ ဖြစ်နေတာပဲ။ ဝိုင်းစက်တောက်ပနေတဲ့ မျက်လုံးလေးတွေ၊ မျက်ဆံအရောင်ညိုညိုလေးတွေ ပြီးတော့ နှာတံ အကျတွေကလည်း ဆင်တူ၊ နှုတ်ခမ်းလေးတွေ နောက်ဆုံး နားရွက်လေးတွေ ထောင်နေပုံကအစ တထပ်တည်း ချွတ်စွပ်တူနေတာ။ အကဲခတ်နေတုန်းမှာ သူတို့ကတော့ စကားတွေ အဆက်မပြတ် သူ့ထက်ငါ လုပြောနေမြဲ။ ခက်လည်း ခက်တဲ့ ကောင်တွေကွာ လို့ စိတ်ထဲက ရေရွတ်မိတယ်။

သူတို့ပြောနေတာတွေ ကိုယ်က နားမလည်တော့ သူတို့ မျက်နှာကို တည့်တည့်၊ ခပ်ကြောင်ကြောင် ကြည့်ပြီးတော့ ဟေ့ကောင်လေးတွေ ခဏနေကြဦးကွ လို့ ပြောလိုက်တယ်။ အကြည့်က ကြောင်တောင်တောင်နိုင်နေလို့လား လေသံက နည်းနည်း မာသွားလို့လားမသိဘူး၊ နှစ်ကောင်စလုံး သူ့ထက်ငါ အပြိုင်အဆိုင် အော်နေရာကနေ တိကနဲ ရပ်သွားတယ်။ ကိုင်း… ဒီတစ်ခါတော့ ကိုယ့်အလှည့် ကျပဟ ဆိုပြီး သူတို့နဲ့ မျက်နှာချင်းဆိုင်မှာ ထိုင်ချလိုက်တယ်။ သူတို့ ဇက်ကလေးတွေ ပုဝင်သွားတာမြင်လိုက်ရတော့ နည်းနည်းတောင် ပြုံးချင်ချင်ဖြစ်သွားသေးတယ်။ ဒါပေမဲ့ မပြုံးမိအောင် ထိန်းရင်း… “ဒီမှာ ကိုယ့်လူတို့… လောလောဆယ် မင်းတို့ပြောတာကို ငါ နားမလည်ဘူး၊ ဒီတော့ အိမ်ပေါ်တက်ပြီး နားကြပ်တစ်ခု သွားယူလိုက်ဦးမယ်၊ အဲဒါ တပ်ပြီး နားထောင်မှ မင်းတို့ ပြောတာ နားလည်လိမ့်မယ်၊ အဲဒီလို နားလည်မှသာ မင်းတို့ ဘာကို ပြောချင် ဆိုချင်သလဲ၊ ဘာကို လိုချင်သလဲ ဆိုတာ သေသေချာချာ သိလိမ့်မယ်၊ ဒီတော့ စကားဆက်ပြောချင်ရင် မင်းတို့ ဒီနေရာက ဘယ်မှ မသွားပဲ စောင့်နေကြ… ဟုတ်ပြီလား” လို့ လေသံမှန်မှန်နဲ့ ခပ်အေးအေးပဲ ပြောချလိုက်တယ်။

အဲဒီမှာ ဘာသွားတွေ့လဲ ဆိုတော့ ကိုယ်ကသာ သူတို့ရဲ့ ညောင်ညောင်ဘာသာဗေဒကို နကန်းတစ်လုံးမှ နားမလည်တာ၊ သူတို့ကတော့ ကိုယ်ပြောသမျှကို ဂဃနဏ နားလည်နေတယ် ဆိုတာပဲ။ ဒီလိုလေ… ခုနက ပြောလိုက်တဲ့ ကိုယ့်စကားအဆုံးမှာ ညောင်ညောင်သံတွေ တိကနဲ ရပ်သွားပြီး ခေါင်းတွေကို တဆတ်ဆတ် ညိတ်ပြနေကြတယ်။ အဲဒါကို မျက်စိနဲ့ တပ်အပ် မြင်လိုက်ရတော့ အံ့သြတကြီးနဲ့ ထိုင်နေတဲ့ ခန္ဒာကိုယ်ဟာ ရုတ်တရက် အနောက်ဖက်ကို နည်းနည်းတောင် လန်သွားတယ်။ ခံစားလိုက်ရတဲ့ ခံစားချက်ကလည်း ထူထူထဲထဲနဲ့ နင်တင်တင်ကြီး၊ လည်ချောင်းထဲ တစ်ခုခု မျိုချလို့ မရပဲ တစ်ဆို့ဆို့ ဖြစ်နေသလိုမျိုးနဲ့ ဆင်တူတယ်။ သူတို့ ဘာကောင်တွေပါလိမ့်။ မျက်လုံးကို လက်နဲ့ပွတ်ရင်း သူတို့ကို နောက်ထပ်တစ်ခါ သေသေချာချာ ပြန်ကြည့်မိတယ်။ အမှန်အတိုင်း ဝန်ခံရရင် အဲဒီအချိန်မှာ ကိုယ့်မျက်နှာဟာ ရှက်တက်တက်မျက်နှာမျိုး ဖြစ်နေမှာ မလွဲဘူး။ ပြုံးတုံ့တုံ့ မျက်နှာပေးနဲ့ ကြောင်နှစ်ကောင်ဟာ သူတို့ရှေ့မှာ ထိုင်နေတဲ့ လူတစ်ယောက်ကို အေးအေးသက်သာပဲ။ 

သူတို့ နှစ်ကောင်ထဲက ခုနက ပြောခဲ့တဲ့ အဖြူကောင်… နူးညံ့ပြီး ချစ်စရာကောင်းတယ်လို့ ထင်ရတဲ့ အဲဒီအဖြူကောင်ရဲ့ အကြည့်ဟာ ကိုယ့်စိတ်က ထင်လို့ပဲလားတော့ မသိ၊ သရော်လှောင်ပြောင်လိုတဲ့ အရိပ်အယောင် အနည်းငယ် စွက်နေသလိုပဲ။ သူ့ထက်စာရင် အညိုကြားလေးကတော့ အေးအေးဆေးဆေးပိုရှိပုံရတယ်။
သူတို့ရှေ့မှာ ငူငူငေါင်ငေါင်နဲ့ ထိုင်ပြီး မျက်လုံးအကြောင်သားနဲ့ ကြည့်နေမိတဲ့ ကိုယ့်ကို သူတို့လည်း ဘာလုပ်ရမှန်း မသိသလို ပြန်ကြည့်နေကြတယ်။ သူတို့ မျက်လုံးလေးတွေက ကြည်လင် ဝိုင်းစက်ပြီး တောက်ပလို့။ သူတို့ရဲ့ မျက်လုံးအကြည့်တွေမှာ အဓိပ္ပါယ် အမြောက်အများ ရှိနေတာ သိသာတယ်။ ကိုယ့်မျက်လုံးလို ကြောင်ငေးငေး ဖြစ်မနေဘူးဆိုတာလည်း သေချာတယ်။ ခက်ရချည်ရဲ့။

စကားကြုံလို့ ကြောင်တွေရဲ့ နေရေး စားရေးအကြောင်း ပြောပြဦးမယ်။ သူ့အရပ်နဲ့ သူ့ဇာတ် ဆိုသလိုပေါ့။ ဒီအရပ်မှာက ကြောင်တွေကို အိမ်ပေါ်မှာတင်ပြီး မွေးထားလို့ မရဘူး။ ဒီတော့ ကြောင်တွေဟာ တိုက်အောက်တွေမှာ၊ မြက်ခင်းစပ်တွေမှာ၊ ရေမြောင်းလေးတွေထဲမှာ အဆင်ပြေသလို နေရာယူ နေထိုင်လေ့ရှိကြတယ်။ အိမ်ပေါ်တွေမှာ မနေရပေမယ့် အစာရေစာအတွက်ကတော့ ဘာမှပူစရာ မရှိဘူး။ မနက်ဖြစ်စေ ညနေဖြစ်စေ အချိန်တန်ရင် ကြောင်စာ ကျွေးတဲ့သူတွေဟာ စက်ဘီးလေးနဲ့ ရောက်လာပြီး အစာလုံးတွေ၊ ရေ နဲ့ နို့တွေကို နေရာ သတ်သတ်မှတ်မှတ် ချထားတဲ့ ခွက်ကလေးတွေထဲမှာ ဖြည့်ပေးသွားတတ်တယ်။ အဲဒီတော့ ကြောင်လေးတွေဟာ စားချိန်တန်စား၊ ပြီးလို့ ဗိုက်ပြည့်ရင် နားနားနေနေ အိပ်လိုအိပ်၊ ဟိုနားဒီနား အညောင်းပြေ အညာပြေ လျှောက်လို လျှောက်၊ ပြေးလွှားဆော့ကစား သက်တောင့် သက်သာ ရှိကြတယ်။ အခုလည်း အဲဒီလိုပဲ... သူတို့ ထိုင်နေတဲ့ မြောင်းလေးနဲ့ နှစ်ပေလောက် အကွာမှာ သူတို့ရဲ့ အစာခွက်နဲ့ ရေခွက်လေး ရှိတယ်။

ခုနက ကိစ္စကို ပြန်ကောက်ရရင် ခြေလှမ်းတွေဟာ ရှေ့ဆက်ရအခက် နောက်ပြန်လှည့်ရအခက်နဲ့။ စိတ်ထဲမှာတော့ မကြာခင်က လက်ဆောင်ရထားတဲ့၊ အိမ်ပေါ်က နီညိုရောင် နားကြပ်ကို အမြန်ဆုံး ပြေးယူလိုက်ချင်လှပြီ်။ နားကြပ်ဆိုလို့ အဲဒီနားကြပ်အကြောင်းလည်း နည်းနည်း ပြောပြချင်သေးတယ်။ အဲဒီနားကြပ်ဟာ နိုင်ငံခြားကပြန်လာတဲ့ မိတ်ဆွေတစ်ယောက်ဆီက လက်ဆောင်ရထားတာ။ သူ့အပြောအရ အဲဒီနားကြပ်နဲ့နားထောင်ရင် သတ္တဝါတွေရဲ့ ဘာသာစကားကို အဓိပ္ပါယ် ဖေါ်နိုင်သတဲ့။ ယုံနိုင်စရာ မရှိတာကြောင့် တစ်ခါမှလည်း စမ်းသပ်ဖို့ မကြိုးစားမိဘူး။ အဲဒီမိတ်ဆွေက နိုင်ငံခြားပြန်ဆိုတဲ့ ဂုဏ်ပုဒ်တစ်ခုကလွဲရင် အချိန်တော်တော်များများမှာ အူကြောင်ကြောင်တွေချည်း ပြောတတ်သူဆိုတော့ သူငယ်ချင်းတစ်စုကလည်း သူ့စကားကို ဘယ်တော့မှ လေးလေးနက်နက် နားမထောင်ကြဘူး၊ သူ ဘာပြောပြော မယုံကြတာက များတယ်။ သူက နိုင်ငံခြားက ပြန်လာလို့ လက်ဆောင်တွေ ဘာတွေ ပေးရင်လည်း အဲဒီလက်ဆောင်အကြောင်းကို တရှည်တလျား တဖွဲ့တနွဲ့ကို ရှင်းပြတတ်တာ၊ သူဟာသူ ပြောချင်ရာပြော ကိုယ်တွေက သေသေချာချာလည်း နားမထောင်မိပါဘူး၊ ပြီး ပြီးရောသဘောနဲ့ ဒီလိုပဲ ယူထားလိုက်ကြတာပဲ။ နောက် ကွယ်ရာကျမှသာ ဟိုပြော ဒီပြော ပြောဖြစ်ကြတာ၊ ဒီလိုပြောတာ မကောင်းမှန်း သိပါလျက်နဲ့ လူစုံရင် သူ့အကြောင်း ပြောမိကြတာပဲ။ ခုနက စကားကို ပြန်ကောက်ရရင် အဲဒီ နားကြပ် - သတ္တဝါတွေရဲ့ ဘာသာစကားကို အဓိပ္ပါယ် ဖေါ်နိုင်တယ် ဆိုတဲ့ အဲဒီနားကြပ်ဟာ အိမ်မှာ ရှိနေတယ်။ အဲဒါကို ယူပြီး နားထောင်လိုက်ရင် ဒီညောင်ညောင်နှစ်ကောင်ရဲ့ စကားကိုလည်း နားလည်မယ်၊ နားကြပ်ရဲ့ အလုပ်လုပ်ပုံကိုလည်း စမ်းသပ်ပြီးသားဖြစ်မယ်။ တစ်ချက်ခုတ် နှစ်ချက်ပြတ်ပဲ။

တဖက်ကလည်း နားကြပ်သွားယူနေတုန်း ဒီကြောင်နှစ်ကောင် ပျောက်သွားမှာကိုလည်း စိုးရိမ်နေတယ်။ ခုနက စကားဆက်ပြောချင်ရင် မင်းတို့ ဒီနေရာက ဘယ်မှ မသွားပဲ စောင့်နေကြ လို့ ပြောလိုက်တုန်းက နှစ်ကောင်သား ခေါင်းလေးတွေ ညိတ်ပြတာကို ပြန်တွေးမိတော့ ဟုတ်သလိုလို မယုံရနိုးနိုး၊ ယုံရနိုးနိုးပဲ။ ဒီစကားကို နောက်တစ်ခါ ထပ်ပြောလို့ ခေါင်းညိတ်ပြရင် သေချာပြီလို့ ယူဆပြီး မရဲတရဲ ထပ်ပြောလိုက်တယ်။ ပထမတစ်ခေါက်ကလိုပဲ နှစ်ကောင်သား ခေါင်းတွေ တွင်တွင်ညိတ်ပြကြတယ်။ သူတို့ရဲ့ ခေါင်းအညိတ်မှာ ပြောမပြတတ်အောင် ကြက်သေသေသွားတယ်ဆိုတာ ဝန်ခံရမှာပဲ။ သေချာနေပါပြီ။ သူတို့ လူစကားကို ကောင်းကောင်း နားလည်နေတယ်ဆိုတာ သိပ်ကိုသေချာနေပါပြီ။ မျက်လှည့်ပြလိုက်သလို ရုတ်ချည်း ပြောင်းလဲသွားတဲ့ အပြောင်းအလဲကြားမှာ ကိုယ်ဟာ ကြောင်တစ်ကောင် ဖြစ်သွားပြီး သူတို့က လူနှစ်ယောက်ဖြစ်သွားသလိုပဲ။ 

ညနေဟာ အလင်းရောင် နည်းတဲ့ဖက်ကို ရောက်လာတယ်။ ကြောင်နှစ်ကောင်ရဲ့ မျက်လုံးလေးတွေဟာ တစုံတရာကို ဆက်လက်မျှော်လင့်နေတယ်လို့ ခံစားနေရတုန်းပဲ။ ကဲ… ဘာပဲဖြစ်ဖြစ် နားကြပ် သွားယူမယ် ဆိုပြီး ထိုင်ရာက ထတယ်။ ခြေလှမ်း လေး ငါးလှမ်းလောက်အရောက်မှာ ကြောင်နှစ်ကောင်ဆီက စူးစူးရှရှ ပြီးတော့ သံပြိုင် အော်လိုက်တဲ့ အသံကို ကြားရတယ်။ အသံက သာမန်နဲ့ မတူပဲ ကြောက်ရွံ့ထိတ်လန့်သံ ပေါက်နေတာမို့ စိတ်ထဲ ထိတ်ကနဲဖြစ်သွားတယ်။ ဘာများဖြစ်ပါလိမ့် လို့ လှည့်ကြည့်လိုက်တော့ မြောင်းဖုံးသံပြားကြားထဲကနေ အလုအယက် တိုးထွက်နေတဲ့ ခေါင်းလေး နှစ်ခေါင်းကို မတွေ့ရတော့ဘူး။ ဟာ… ဘယ်ရောက်သွားကြတာပါလိမ့်။ ချက်ချင်းပဲ ခြေလှမ်းကို အနောက်ကို ပြန်လှည့်လိုက်တယ်။ ခုနက သူတို့ ထိုင်နေတဲ့နေရာနားကို ရောက်တော့ သူတို့ နှစ်ကောင် ပျောက်နေတာကလွဲပြီး ဘာမှ ထူးထူးခြားခြား မတွေ့ရဘူး။ ခဏနေတော့ အသံတိုးတိုးလေး ထွက်လာတယ်။ အော… သူတို့က မြောင်းဖုံးအောက်ထဲ ဝင်ပုန်းနေကြတာကိုး။ အကောင်တွေ မတွေ့ရပေမယ့် အသံတော့ ကြားနေရတယ်။ အသံက တစ်ခုခုကို ထိတ်လန့်နေတဲ့အသံမျိုး ခပ်တိုးတိုး ခပ်အုပ်အုပ်နဲ့ မရဲတရဲရယ်။ ဘာကောင်တွေလဲကွ လို့ တွေးရင်း သူတို့ ဘာဖြစ်နေတာလဲ ဘာပြောနေတာလဲ ဆိုတာ သိချင်တဲ့ စိတ်က တားမရဘူး။ အိမ်ဖက်ကို ပြန်ပြီး နားကြပ်ယူဖို့လည်း ခက်နေတယ်။ ဒီအချိန်မှာ အတောင့်တဆုံးအရာကို ပြပါဆိုရင် အလာဒင် မီးခွက်များ ဖြစ်မလားပဲ။ အလာဒင်ရဲ့ လိုတရ မီးခွက်သာ ရှိနေမယ်ဆိုရင် ဟတ်ချလောင်းလို့အော်ပြီး မီးခွက်ကိုပွတ်လိုက်ရုံနဲ့ နားကြပ်ဟာ လက်ထဲကို ချက်ချင်း ရောက်လာနိုင်မယ် မဟုတ်လား။ ကိုယ့်အတွေးကို ကိုယ် အတော် ရယ်ချင်သွားတယ်။ တယ်ကြောင်ပါ့လား။ 

ဘာဆက်လုပ်ရမယ်မှန်း ဝေခွဲမရ ဖြစ်နေချိန်မှာ ဘယ်ဖက် မျက်စိထောင့်ထဲကနေ တစုံတခုကို ရိပ်ကနဲ တွေ့လိုက်တယ်။ ခေါင်းကို ငဲ့စောင်းပြီး လှည့်ကြည့်လိုက်တော့ ဘာမှ မတွေ့ရတော့ပြန်ဘူး။  ဘာပါလိမ့်လို့ ငြိမ်ပြီး တွေးနေမိတဲ့အချိန် လေး ငါး စက္ကန့်လောက်အကြာမှာ တစ်ခုခုဟာ ရိပ်ကနဲ လှုပ်သွားတယ်လို့ ခံစားသိနဲ့ သိလိုက်ပြန်တယ်။ အလင်းရောင်က နည်းသည်ထက် နည်းလာတော့ မလှမ်းမကမ်းပေမယ့် မသဲကွဲဘူး။ စိတ်ထဲ ညိုတိုတိုပစ္စည်းတစ်ခု လို့ ထင်တယ်။ ကြွေကျနေတဲ့ သစ်ရွက်ခြောက် အပိုင်းအစလား၊ လမ်းဘေးမှာ လွှင့်ပစ်ထားတဲ့ စက္ကူအိတ်အဟောင်းတစ်လုံးလား၊ သတင်းစာစက္ကူ အပိုင်းအစတစ်ခုလား... အဲဒီလိုအရာတွေ လှုပ်ရှားရအောင်ကလည်း တစ်ညနေလုံး လေက ငြိမ်လိုက်တာမှ။ ဒါမှမဟုတ် သက်ရှိအကောင် တစ်ကောင်ကောင်ရော မဖြစ်နိုင်ဘူးလား။ တွေးနေရင်း ချွေးနည်းနည်း ပျံလာချိန်မှာ ကြောင်ကလေးတွေဆီက အသံ ခပ်တိုးတိုးလေးတွေ ထပ်ကြားလိုက်ရတယ်။ ကြောက်နေကြသလိုပဲ။ အသံထဲမှာ တုန်လှုပ်မှုကို မှန်းဆလို့ရနေတယ်။ ကြောင်ကလေးတွေဖက်ကို အာရုံစိုက်မိချိန်မှာ တဖက်ကလည်း ရိပ်ကနဲ ရိပ်ကနဲ လှုပ်နေတာ သိနေတယ်။ ကိုယ့်ကိုကိုယ် မူးများနေသလားလို့ တွေးရအောင်လည်း အိမ်က ထွက်ခါနီး သောက်လာတာ ရေနွေးကြမ်းတွေပဲ။ မဟုတ်သေးပါဘူး။ 

တစ်မိနစ်လောက် ငြိမ်ပြီး ဘာဆက်လုပ်ရင် ကောင်းမလဲလို့ စဉ်းစားနေမိတယ်။ မျက်စိထောင့်ထဲ လှုပ်နေတဲ့ အရာကို အနားကပ်ပြီး သွားကြည့်ရအောင်ကလည်း ဘာမှန်းမသိ ညာမှန်းမသိဆိုတော့ သိပ်အဆင်မပြေလှဘူး။ ခပ်လှမ်းလှမ်းကနေ ကြည့်နေပြန်တော့လည်း ဘာမှ သဲသဲကွဲကွဲ မမြင်ရဘူး။ အဲဒီအချိန်မှာ ဖျတ်ကနဲ သတိရသွားတာကတော့ အိမ်သော့နဲ့တွဲထားတဲ့ လက်ညှိုးအရွယ် လက်နှိပ်ဓါတ်မီး ကီးချိန်းလေးပဲ။ ဓါတ်ခဲ ရှိမရှိ မသေချာ... ဒါပေမဲ့ စမ်းကြည့်ရမယ်။ ဘောင်းဘီအိတ်ထဲကနေ သော့ကို ဆွဲအထုတ်မှာ သော့အချင်းချင်း ပွတ်တိုက် ထိရိုက်သံကြောင့်လား မသိ၊ ခုနက လှုပ်နေတယ်လို့ ထင်ရတဲ့အရာက ငြိမ်သွားသလို ကြောင်ကလေးတွေ ဆီက အော်သံကလည်း တိတ်ဆိတ်သွားတယ်။ ညနေခင်းရဲ့ အလင်းရောင်ကတော့ ကုန်သလောက်နီးနီး ရှိနေပြီ။ အဲဒီနောက်မှာ လက်နှိပ်ဓါတ်မီးကို အသာ လှည့်ရင်း လှုပ်နေတဲ့ အရာနားကို ဖြည်းဖြည်းချင်း ရွှေ့ပြီးချိန်လိုက်တယ်။ ကြောက်ရွံ့စိတ်လား စိုးရိမ်စိတ်လား ဘာမှန်း မသဲကွဲပေမယ့် တထိတ်ထိတ်နဲ့ စိတ်လှုပ်ရှားနေမိတယ်။

လှုပ်နေတဲ့အရာနားကို လက်နှိပ်ဓါတ်မီးရဲ့အလင်းရောင် ဖျတ်ကနဲ ကျသွားတဲ့အချိန်မှာ အရိပ်လိုလို၊ မီးခိုးငွေ့လိုလို ဘာမှန်းမသဲကွဲတဲ့ တခုခုဟာ ကိုယ့်ဖက်ကို ရွေ့လျားလာသလို ထင်လိုက်ရတယ်။ ရွေ့လာတာ မြန်လွန်းတော့ ကိုယ့်ခြေထောက်နားကို စွေ့ကနဲ ရောက်လာပြီး ကိုယ့်ကို တွန်းတိုက်သွားသလို၊ ကျော်ဖြတ်သွားသလိုနဲ့ အလျင်စလို ရွေ့လျားသွားတာမျိုး။ ဘာကြောင့်မှန်း မသိပေမယ့် ခန္ဒာကိုယ်ဟာ အနောက်ကို နည်းနည်း ယိုင်သွားတယ်။ အဲဒီလှုပ်နေတဲ့အရာ သက်ရှိလား သက်မဲ့လား၊ သက်ရှိဆိုရင်လည်း ဘာကောင်၊ သက်မဲ့ဆိုရင်လည်း ဘာပစ္စည်းရယ်လို့ သဲသဲကွဲကွဲ မသိလိုက်ရဘူး။ အဲဒီအချိန်မှာပဲ ပါးလှပ်လှပ် လေအေးအေးလေးက ကိုယ့်အနားမှာ စိမ့်ကနဲ ဝေ့ဝဲတိုက်ခတ်သွားတယ်။ လေထဲမှာ ပန်းအနံ့လို သင်းမွှေးတဲ့ အနံ့တစ်ခုခု ရောပါနေသလိုလို။ ညနေခင်း မှောင်ရီပျိုးစအချိန်ဆိုတော့ ကျောထဲ နည်းနည်းတော့ စိမ့်သွားတယ်။ တခဏအတွင်းမှာ သတိ ပြန်ဝင်လာတယ်။ စက္ကန့် မိနစ် ဘယ်လောက်များများ အသက်အောင့်ထားမိသလဲ မသိဘူး။ လေတွေကို ဝှူးကနဲ မှုတ်ထုတ်လိုက်မိတယ်။ ပြီးတော့ တစ်ယောက်တည်း ဘေးဘီကိုလည်း မကြည့်နိုင်၊ ဘာကိုမှလည်း သတိမရနိုင်တော့ပဲ မြောင်းကလေးနံဘေးမှာ စိတ်လွတ်ကိုယ်လွတ် ထိုင်ချလိုက်တော့တယ်။

လူက ကတုန်ကယင်နဲ့၊ မောသလို မူးသလို ဖြစ်ကျန်နေခဲ့တယ်။ နားကြပ်သွားယူပြီး ကြောင်နှစ်ကောင်ရဲ့ စကားကို နားထောင်ဖို့ဆိုတဲ့ စိတ်ကူးလည်း ဘယ်ရောက်သွားမှန်း မသိတော့ဘူး။ အဲဒီအချိန်မှာ ကြောင်နှစ်ကောင်ဟာ ရေမြောင်းလေးထဲက ထွက်ပြီး သူတို့အတွက် ချကျွေးထားတဲ့ အစာလုံးတွေ၊ ရေ နဲ့ နို့တွေကို မြိန်ရည်ရှက်ရည် စားသောက်နေကြတယ်။ စားလို့သောက်လို့ ပြီးသွားတော့ နှုတ်ခမ်းပါးနားသပ်ပြီး နှစ်ကောင်သား ခုနက ပြန်ပိတ်ဖို့မေ့နေတဲ့ သော့ချိတ်ဓါတ်မီးက အလင်းရောင်ကို လိုက်ဖမ်းပြီး ပျော်ပျော်ပါးပါး ဆော့ကစားနေကြတော့တယ်။ အခုနက ကြောက်အားလန့်အားနဲ့ တစ်ယောက် တစ်ခွန်း တိုင်တန်းသလို အော်ကြ ဟစ်ကြတာ သူတို့ မဟုတ်သလိုပဲ။ ခဏနေတော့ မြောင်းထဲ ပြန်ဆင်းဖို့ ပြင်ကြရင်း နှုတ်ဆက်သလို ညောင် လို့ တစ်ချက် ပြိုင်တူ အော်လိုက်ကြတယ်။ မေ့လွယ် ပျောက်လွယ် ဖြစ်လွယ် ပျက်လွယ်နဲ့... ဘဝဆိုတာ ဒါပါပဲ။

သက်ဝေ
(၂၀ ဧပြီ ၂၀၁၆)

 - ၂၀၁၆ သြဂက်စ်လ ထုတ် မိုးမခ မဂ္ဂဇင်းတွင် ဖေါ်ပြပြီးဖြစ်သည်။

Monday, September 26, 2016

လွှတ်ချလိုက်ခြင်းများ

သေသေချာချာ တွေးကြည့်မိပါက ဘဝတွင် လွှတ်ချပစ်ချင်စရာ ကောင်းလှသော အကြောင်းအခြင်းအရာများ၊ တနည်းအားဖြင့်ပြောရလျှင် လွှတ်ချပစ်လိုက်ရန် သက်သေ သက္ကာရ အထောက်အထား ပြည့်စုံ ခိုင်လုံသော  အကြောင်းအရာ အဖြစ်အပျက်များ များစွာ ရှိနေခဲ့သည်။ အချို့အရာများမှာ အမှန်တကယ် အသုံးမဝင်တော့ပဲ စိတ်လွတ်လက်လွတ် လွှတ်ချချင်စရာ ကောင်းလှသည်ဖြစ်ပြီး အချို့မှာမူ အနည်းငယ် လိုအပ်ကောင်း လိုအပ်နေအုံးမည်ဟု ယူဆကာ လွှတ်မချဖြစ်သေးသော အရာများဖြစ်သည်။ ထို့အပြင် လုံးဝ မလိုအပ်တော့ဟု စိတ်ထဲမှာ သေချာနေသော်လည်း ငဲ့ညှာထောက်ထားစရာ အခြေအနေအရပ်ရပ်ကြောင့် မရှိ မကောင်း၊ ရှိမကောင်း၊ သိမ်းထားရကောင်းနိုး လွှင့်ပစ်လိုက်ရကောင်းနိုး ချီတုံချတုံ ဖြစ်နေရသော အရာများလည်း များစွာ ရှိနေသေးသည်။ သို့သော် ဆုံးဖြတ်လိုက်သည်။ ဘဝတိုတိုလေးတွင် မည်သည်က အရေးပါပြီး မည်သည်က အရေးမပါသည်ကို အသေအချာ ပြန်လည်စဉ်းစား ဆင်ခြင်မည်။ အရေးမပါသောအရာများကို အသေအချာ စီစစ်မည်။ ပြီးလျှင် အဆင်ပြေသလို တစပြီး တစ လွှတ်ချလိုက်တော့မည်။
* * * * *
ပထမဆုံး ပိုးပုဝါလေးတစကို လွှတ်ချခဲ့သည်။ ပုဝါများစွာ ပိုင်ဆိုင်သော်လည်း ထိုပုဝါကလေးမှာ အမှတ်တရပေါင်းများစွာ ပါဝင်သော၊ အထိမ်းအမှတ်နေ့စွဲတခုမှာ သူကိုယ်တိုင် တယုတယ စည်းနှောင်ပေးခဲ့ဖူးသော ခရမ်းဖျော့ရောင် ပိုးပုဝါကလေးတခု ဖြစ်သည်။ ဘဝမှာ အတန်အသင့် မြတ်နိုးခဲ့ဖူးသော အရာတခုဟု ဆိုရလျှင်လည်း မှားမည်မထင်ပါ။ သူနှင့်ပတ်သက်သမျှ အရာရာကို လွှတ်ချလိုက်တော့မည်ဟု စဉ်းစားလိုက်သော အချိန်တွင် ထိုပုဝါကလေးကို သတိတရ ရွေးချယ်ခဲ့မိသည်။ လွှတ်ချအံ့ဆဲဆဲ ထိုပုဝါစလေးထဲတွင် ခါးသက်ရှတပြီး တဖက်သတ်ဆန်သော ချစ်ခြင်းမေတ္တာများ ပါဝင်မည်၊ တကိုယ်ရေ လွမ်းဆွတ်တမ်းတမှု အနည်းငယ် ပါဝင်မည်၊ ပြင်းထန်သော ဒါဏ်ရာဒါဏ်ချက်များနှင့်အတူ နာကျင်မှုအပိုင်းအစများကတော့ သေချာပေါက်ကို ပါဝင်နေလိမ့်မည်။ ချစ်သူဟု သုံးနှုန်းခေါ်ဆိုနိုင်ခဲ့ဖူးသော သူစိမ်းအမျိုးသားတယောက်ထံမှ ပိုင်ဆိုင်ရရှိခဲ့သော ချစ်ခြင်းမေတ္တာသည် သူ ချန်ထားခဲ့ပြီး နောက်ပိုင်းမှာ တန်ဖိုးထား စုံမက်စွာ ဆက်လက် သိမ်းဆည်းထားရန် လိုအပ်သည်လား၊ တဆက်တည်းမှာ ရက်ရက်စက်စက် ချန်ရစ်ထားခဲ့ရက်သော ထိုချစ်သူကို တရှိုက်မက်မက် လွမ်းဆွတ် တမ်းတနေရမှုကရော အမှန်တကယ် ရှိသင့်ရှိထိုက်ပါသလား၊ ထိုသူကို လွမ်းဆွတ် တမ်းတနေရဖို့ရော ထိုက်တန်ပါရဲ့လား။ ထိုသူနှင့်ပတ်သက်သော ထိခိုက်နာကျင်မှုများကတော့ ဘယ်လိုမှ သိမ်းဆည်းထားရန် မသင့်သော အရာများသာ။ ထိုအခါ အရာရာကို အပြီးတိုင် လွှတ်ချပစ်ရန်သာ စဉ်းစားရတော့သည်။

မြင်လွှာအောက်မှ အပြီးတိုင် ကွယ်ပျောက်သွားစေရန်ဟူသော အတွေးဖြင့် ထိုပုဝါစကလေးကို ဟိုး ခပ်မြင့်မြင့်နေရာတခုမှ လွှတ်ချနိုင်ရန် နေရာရွေးရသည်။ တွေ့ပြီ…  အတန်ငယ်မြင့်မား မတ်စောက်သော တောင်ကုန်းငယ်လေး။ သူနဲ့အတူ တကြိမ်မက ရောက်ခဲ့ဖူးသော တောင်ကုန်းငယ်ကလေး။ တောင်ကုန်းတနေရာတွင် ခြေစုံရပ်ရင်း လက်ထဲမှ ထိုပုဝါကလေးကို လွှတ်ချခဲ့သည်။ မလွှတ်ချခင် ဘေးဘီဝဲယာကို အသာ စောင်းငဲ့ကြည့်ရင်း တချက်ကလေး နမ်းရှိုက်လိုက်ရန် ဟန်ပြင်ပြီးမှ ရှက်ရွံ့စိတ်တို့ဖြင့် မလုံမလဲဖြစ်ကာ ခေါင်းကို ခါယမ်းလိုက်မိသည်။ ထို့နောက် စိတ်ကို ဖြတ်ကာ ပုဝါစလေးကို လွှတ်ချလိုက်တော့သည်။

ဖြစ်ချင်တော့ ထိုနေ့ ထိုအချိန်မှာ ဆောင်းလေက အရှိန်ပြင်းပြင်းဖြင့် တိုက်ခတ်နေခဲ့သည်။ ခရမ်းဖျော့ရောင် ပိုးပုဝါကလေးသည် လေထဲတွင် တလူးလူး တလွန့်လွန့်ဖြင့် နိမ့်ဆင်းဝဲပျံရင်း စက္ကန့်အနည်းငယ် အကြာတွင် သစ်ကိုင်းတခု၏ ထိပ်ဖျားတွင် သွားရောက် တွယ်ငြိနေခဲ့သည်။ ထိုအခါ ပုဝါစကလေးသည် ရုတ်တရက် ဖမ်းဆီး ချုပ်နှောင်ခံလိုက်ရသူတယောက်ပမာ၊ လေအဝှေ့တွင် ရုန်းရင်းဆန်ခတ်နှင့်။ သို့သော် လေနှင့်အတူ ဆက်လက်၍လည်း မပျံသန်းနိုင်၊ သစ်ကိုင်းဖျားတွင် ငြိတွယ်မြဲ ငြိတွယ်လျက် မြင်လွှာအောက်မှလည်း ပျောက်ကွယ်မသွားနိုင်ပဲ လွှတ်ချခဲ့သူကို အပြစ်တင် စကားတင်းဆိုနေသယောင်။ နောင်တများစွာ ရစေသယောင်။ ပုဝါကလေးကို သံယောဇဉ်မပြတ်ချင်သလို၊ အားနာသလို လှည့်ကြည့် လှည့်ကြည့်ဖြင့် ပြန်လာခဲ့ရသည်။ တဆက်တည်းမှာ ထိုနေရာကို နောက်တခေါက် ထပ်မလာရန်လည်း ဆုံးဖြတ်မိသည်။ မကွယ်မဝှက်ပဲ ပြောကြစတမ်းဆိုလျှင် ကိုယ်တိုင်လွှတ်ချ ချန်ထားရစ်ခဲ့သော ထိုပုဝါလေးကို စိတ်အတွေးထဲမှ အကြိမ်ပေါင်းများစွာ ပြန်လည်ကောက်ယူနေခဲ့မိသည်။

* * * * *
ထိုညက ညသည် ညပီသလျှက် အမှောင်ထုကြီးစိုးကာ တိတ်ဆိတ်နေခဲ့၏။ အဖြူခံပေါ်တွင် အပြာရောင် Bulla တံဆိပ် ရေးထိုးထားသော ဒိန်ချဉ်ဗူးထဲသို့ သကြားညိုအနည်းငယ် ထည့်ကာ မွှေလိုက်သည်။ ထို့နောက် ဒိန်ချဉ်ဗူးကို ကိုင်ကာ ခပ်ကျယ်ကျယ် တွန်းဖွင့်ထားသော ပြတင်းပေါက်နံဘေးတွင် ထိုင်ရင်း အပြင်ဖက်ကို အကြောင်းမဲ့ ငေးကြည့်နေမိသည်။ နက်ပြာရောင် ကောင်းကင်ပြင်တွင် ထိုညက ကြယ်ပွင့်ကလေး တလုံးတလေမှ ရှိမနေပါ။ သို့သော် ကိုယ့်ရဲ့ ကြယ်ပွင့်ကလေး ဟု ခေါ်ခဲ့ဖူးသူတယောက်၏ အသံကို ဖျတ်ကနဲ သတိရသွားချိန်တွင် နှလုံးသားတနေရာမှ နာကျင်စူးနစ်ကာ အသက်ရှူရ ခက်နေခဲ့သည်။ သတိရခြင်းများသည် အခါများစွာမှာ အတိုင်းအဆမဲ့ ချိုမြိန်သည်ဟု ကျေနပ်ချင်စရာကောင်းသော်လည်း တချို့အချိန်များတွင်တော့ ထင်ထားသည်ထက် အဆပေါင်းများစွာ ခါးသက်စေသည်ချည်းသာ။ တခါတရံတွင်မူ ကြည်လင်သော ဂျင်န် တခွက်ကဲ့သို့ ရစ်မူးစွာ ပြင်းရှတတ်သေး၏။ ထိုသတိရခြင်းများကို ကိုယ်တိုင် နှစ်လိုခြင်းမရှိသော အချိန်တခုကို မလွဲမသွေ ရောက်ရှိနေပြီဟု ကိုယ်တိုင် သေချာနေခဲ့သည်။

ထိုစဉ် ရုတ်တရက် ပေါ်လာသော စိတ်အစဉ်အတိုင်း သောက်လက်စ ဒိန်ချဉ်ဗူးကို အရှိန်ဖြင့်လွှဲကာ ပြတင်းပေါက်မှ ပစ်ချလိုက်မိသည်။ ပစ်ချအပြီးမှာ တစုံတခုကို မျှော်လင့်စောင့်ဆိုင်းနေသကဲ့သို့ စက္ကန့်အနည်းငယ် ကြာသည်အထိ မျက်စိ စုံမှိတ်ကာ အသက်မရှူမိပဲ ငြိမ်သက်နေမိသည်။ တခဏအတွင်းမှာပင် ပစ်ချလိုက်သော ဒိန်ချဉ်ဗူးနှင့် ကတ္တရာလမ်းမတို့ ပြင်းထန်စွာ ထိရိုက်သွားသော အသံကို ကြားရသည်။ သေးငယ်သော ဒိန်ချဉ်ဗူးကလေးက ထိုမျှလောက် အသံပြင်းပြင်း ထွက်သည်ကို အံ့သြ မှင်သက်နေမိသေးသည်။ ထိုအသံသည်  ညတည၏ တိတ်ဆိတ်မှုကို လှလှပပ ဖြိုခွင်း လိုက်သလိုပင်။ တချိန်ထဲမှာ တင်းကြပ်နေသော ခံစားမှုတို့ကို အဆုံးစွန် ဖြေလျော့ချလိုက်သကဲ့သို့ နှာသီးဖျားတွင် ရစ်ဝဲနေသော လေကို လွတ်လပ် ပေါ့ပါးစွာ ရှူထုတ်လိုက်မိ၏။ နှုတ်ခမ်းနှစ်လွှာကို မဖွင့်ဟပဲ ပိပိရိရိ ပြုံးတတ်ရန် အခါများစွာက ကြိုးစား လေ့ကျင့်ခဲ့ဖူးသည့်အတိုင်း ဟန်ပါပါ ပြုံးလိုက်၏။ တစုံတယောက်ကို သတိရခြင်း၊ ကိုယ့်ကိုကိုယ် စိတ်တိုင်းမကျစွာ ခံပြင်းခြင်း၊ ဒေါသ အနည်းငယ်နှင့် ပူလောင်ခြင်းတချို့ အပြင် သစ်ကိုင်းဖျားတွင် လူးလွန့် ငြိတွယ်ကျန်နေခဲ့သော ပိုးပုဝါစကလေးပါ ထိုဒိန်ချဉ်ဗူးထဲတွင် ရီးလေးခို၍ ပါသွားကြသည်ကို မည်သူမျှ မသိနိုင်သော်လည်း ကိုယ်တိုင်ကတော့ သေသေချာချာ သိနေခဲ့သည်။

ဒိန်ချဉ်ဗူးသည် အနက်ရောင်လမ်းမနှင့် အရှိန်ပြင်းပြင်း ထိရိုက်ကာ တစစီ ပေါက်ကွဲ ပွင့်ထွက် လွင့်စင်သွားပုံကို စိတ်မှန်းဖြင့် တွေးမြင်ကြည့်မိ၏။ ဒိန်ချဉ်ဗူးနှင့်အတူပါသွားသော ဒေါသလှိုင်းများ၊ အလွမ်းများနှင့် သောက အပူငွေ့များသည်လည်း အပိုင်းအစများအဖြစ် ပဲ့ကြွေကာ အနက်ရောင်ကတ္တရာလမ်းမပေါ်တွင် အဆောတလျင် ပြေးလွှားသူက ပြေးလွှား၊ ဘီးလှိမ့်ရုံ မောင်းနှင်သွားသော ကားတစင်းမှ လွင့်ကျကျန်ရှိနေခဲ့သော တေးသံတချို့နှင့်အတူ နရီစည်းချက်လိုက်ကာ ကခုန်သူက ကခုန်၊ လမ်းဘေး သစ်ပင်ခြေရင်းတွင် ငြိမ်သက်စွာ လှဲလျောင်းသူက လှဲလျောင်း… ထိုမြင်ကွင်းကို စိတ်ထဲမှာ တွေးထင် မြင်ယောင်ရင်း များစွာ ကျေနပ်မိ၏။ တင်းကြပ်မှုများ ပူလောင်မှုများလည်း အချိန်တိုတိုအတွင်း သက်သာရာ ရသွားသယောင်၊ နေလို့ ပိုကောင်းသွားသယောင်။  ထို့အတူ သတိရနေစရာ မလိုအပ်ဟု ဆင်ခြင်မိသော လူတယောက်ကို ရံဖန်ရံခါ လွမ်းဆွတ် သတိရနေချိန်များဟူသည့် ခေါင်းစဉ်ကိုပါ တခါတည်း လွှတ်ချလိုက်နိုင်ပြီ ဖြစ်သည်။ ထိုအခိုက်အတံ့လေးမှာတော့ လွှတ်ချပစ်လိုက်ရခြင်း၏ အရသာကိုလည်း မက်မောစွာ နားလည်နေခဲ့ပြီ ဖြစ်သည်။ ထို့အပြင် ပုဝါကလေးကို လွှတ်ချခဲ့စဉ်ကလို နှမြောတသစွာ ပြန်လည်ကောက်ယူလိုစိတ်များ စိုးစဉ်းမှ ပေါ်မလာသည်ကိုလည်း အံ့သြစွာ တွေ့ရှိခဲ့ရသည်။

* * * * *
မလိုအပ်သည်များကို လွှတ်ချခြင်း ဟူသောအဖြစ်တွင် နေသားတကျ ပျော်ဝင်လာသောအခါ လူက တစ တစ ပေါ့ပါးလာခဲ့သည်။ နေ့စဉ်နှင့် အမျှ ဘာကို လွှတ်ချရရင် ကောင်းမည်လဲ ဟူသော အတွေးများသာ ကြီးစိုးသည်။ မှတ်မိသမျှပြောပြရလျှင် စာတိုက်ပုံးထဲမှ စာအဟောင်းများကို ရှင်းလင်းပစ်ချခဲ့သည်။ လက်တဝါးစာခန့်ရှိသော လက်ကိုင်ဖုန်းကလေး၏ သိုလှောင်နိုင်စွမ်းကို အံ့အားတသင့်ဖြစ်နေရင်းမှပင် စာတိုများကို ကြက်ခြေခတ်ရင်း ပစ်ချခဲ့သည်။ အနှစ်နှစ်အလလက ရေးသားခဲ့သော ဒိုင်ယာရီများ၊ သံယောဇဉ် လက်ကျန်တစွန်းတစကြောင့် သိမ်းဆည်းထားမိသော မင်လက်ကျန်နည်းနေသော ဘောပင်ရောင်စုံများ၊ အသံထွက်မည် မထွက်မည် မသေချာတော့သော သီချင်းစီဒီချပ်များ၊ ဟိုတကွက် ဒီတကွက် ဆေးသား ပြယ်လွင့်စပြုနေပြီဖြစ်သော ဓါတ်ပုံဟောင်းများ။ သာမန်မျက်စိဖြင့် မြင်နိုင်သော ထိုအရာများအပြင် အလွယ်တကူ မမြင်တွေ့နိုင်သော၊ ဟိုမှ သည်မှ တစစီထွက်နေသော အထူအပါး အတိုအရှည် မတူညီကြသော အရောင်အသွေးစုံလင်လှသော ကြိုးမျှင်များကိုလည်း တမျှင်ခြင်းစီ စိတ်ရှည်လက်ရှည် ရှင်းလင်း ဆွဲထုတ်သည်။ ထိုကြိုးမျှင်များထဲမှ အနည်းငယ်ကိုသာ ပြန်လည်သိမ်းဆည်းကာ အချို့ကို အပိုင်းအစငယ်ကလေးများဖြစ်အောင် ဖြတ်တောက်ကာ လွှတ်ချသည်။ အချို့ကို စုပေါင်း ထွေးလုံးကာ ပစ်ချသည်။ ရှင်သန်နေထိုင်ရသော နေ့ရက်များ တနေ့ထက်တနေ့ ပို၍ ပေါ့ပါးလာခဲ့သည်မှာ သေချာလှသည်။ ရှူသွင်းလိုက်သော လေထုသည်ပင် အခါများစွာထက် ပိုမိုလတ်ဆတ် သန့်ရှင်းနေသယောင်...

မလိုအပ်သမျှ အရာအားလုံးကို လွှတ်ချနိုင်ခဲ့သောတနေ့…
ထိုနေ့တွင် အပြာရောင်ကောင်းပင်ကြီးပေါ်တွင် လှပစွာ ချိတ်တွယ်လျှက်ရှိသော ဝါဂွမ်းကလေးတမျှ ပေါ့ပါးသော တိမ်ဖြူကလေးတစ သို့တည်းမဟုတ် ရောင်စဉ်ခုနှစ်သွယ် စီခြယ်အပ်သော သက်တန့်ကွေးပေါ်တွင် မှီတွယ် ခိုနားလျှက်ရှိသော အဖြူရောင် ငှက်ငယ်ကလေးတကောင် ကိုယ်တိုင် ဖြစ်မလာနိုင်ဟု ဘယ်သူ အတတ်ပြောနိုင်မည်လဲ။ ဒါတွေမှ မဖြစ်ရလျှင်၊ မဖြစ်နိုင်ခဲ့လျှင် အနည်းဆုံးတော့ ကောင်းကင်ပေါ်တွင် လွတ်လပ် ပေါ့ပါးစွာ ဝဲပျံသန်းသွားသော ငှက်ငယ်ကလေးတကောင်၏ ကိုယ်ပေါ်မှ မတော်တဆ ကျကျန်နေရစ်ခဲ့သော ငှက်မွှေးလေးတမျှင်၊ မိုးကုတ်စက်ဝိုင်း တလျှောက် မျက်စိတဆုံး တွေ့မြင်နေရသော မြက်ခင်းစိမ်းထဲမှ လေယူရာ ယိမ်းနေသော မြက်သီးပေါ့ပေါ့ကလေး တစ်လုံး၊ စမ်းချောင်းငယ်ကလေးထဲတွင် ပေါ့ပါးစွာ အလိုက်သင့် စီးမျောပါလာသော စက္ကူလှေငယ်ကလေး တစီး၊ မိုးရွာပြီးစ ညနေခင်းတခုတွင် စိမ်းမြသစ်ရွက်ဖျား၌ တွဲခိုကျန်ရစ်သော မိုးရေစက်ကလေး တစက်၊ အဖြူရောင်နှင့် အနက်ရောင် ရောနှောနေသော လိပ်ပြာတကောင် သယ်ယူလာသော ဝါဖျော့ဖျော့ ဝတ်မှုန်ကလေး တမှုန်၊ ပွင့်အာစပြုနေပြီဖြစ်သော အနီရောင် နှင်းဆီပွင့်ငယ်လေး၏ ကိုယ်ပေါ်မှ နုညံ့သော ပွင့်ချပ်ကလေးတခု… တခုခုတော့ ဖြစ်နိုင်လိမ့်မည်ဟု သေချာယုံကြည်နေမိသည်လေ။

သက်ဝေ
(၁၂ ဇွန် ၂၀၁၅ - ၉ သြဂုတ် ၂၀၁၆)

- ၂၀၁၆ စက်တင်ဘာလ ထုတ် မိုးမခ မဂ္ဂဇင်းတွင် ဖေါ်ပြပြီးဖြစ်သည်။


Friday, August 19, 2016

ဓါတ်လှေခါးထဲက ခြင်

မနက်က ဓါတ်လှေခါးထဲမှာ ခြင်တစ်ကောင်နဲ့ တွေ့တယ်။ 
ဓါတ်လှေခါးထဲမှာ ခြင်တွေ့တာ ဘာများ ထူးဆန်းသလဲ။ အဲဒီ “ခြင်” ဆိုတဲ့ သေးသေးကွေးကွေး ငတိအကြောင်းကို လူတိုင်းသိကြတယ်။ ခြင်ဆိုတာ နေရာအတော်များများမှာ လွယ်လွယ်ကူကူ တွေ့နိုင်တဲ့ သတ္တဝါတစ်ကောင်ပဲ၊ သူ့မှာ အတောင်ပံတွေ ပါတယ်၊ လိုရာခရီးကို အချိန်မဆိုင်း ပျံသန်းနိုင်တယ်။ ခြင်တစ်ကောင်ဟာ တဝီဝီ အသံပေး အော်မြည်ပျံသန်းရင်း တွေ့တဲ့သူကို ကိုက်တတ်တယ်။ သူက သွားချင်ရာ ရောက်ရာပေါက်ရာ လျှောက်သွားနိုင်တဲ့ အကောင်ဆိုတော့ နေရာအနှံ့မှာ တွေ့နိုင်တာပေါ့။ လူသူတိတ်ဆိတ်နေတဲ့ အိမ်ဟောင်းဟောင်းထဲမှာ၊ အိပ်ခန်းထဲက ဇာခြင်ထောင်အစပ်မှာ၊ အလှစိုက် ပန်းအိုးတွေနားမှာ၊ ပန်းနုရောင် သစ်ခွပွင့်ပေါ်မှာ၊ ငါးကန်တစ်ခုရဲ့ မှန်ဘောင်ပေါ်မှာ၊ ကလေးငယ်လေးတစ်ယောက်ရဲ့ ပြောင်တင်းတင်း ခြေသလုံးလေးပေါ်မှာ၊ ဂါဝန်လက်ပြတ်ဝတ်ထားတဲ့ အမျိုးသမီးတစ်ယောက်ရဲ့ လက်မောင်းရင်းမှာ၊ မီးဖိုခန်းက စိုထိုင်းထိုင်း လက်သုတ်ပုဝါစပေါ်မှာ၊ ရေချိုးခန်းထဲက သွားပွတ်တံနဲ့ သွားတိုက်ဆေးဗူးနားမှာ၊ ရေကူးကန်ဘေးမှချထားတဲ့ ဆေးဖြူသုတ်ပက်လက်ကုလားထိုင်တွေနားမှာ၊ သစ်ပင်ပန်းပင်တွေ ခြုံနွယ်ပိတ်ပေါင်းတွေ အုပ်နေတဲ့ ခြံစည်းရိုးတဝိုက်မှာ၊ ဒါမှမဟုတ် အိမ်ထောင့်က ဇွန်ပန်းရုံအနားမှာ... ခြင်တစ်ကောင် ရောက်နေနိုင်တဲ့နေရာတွေက ရေတွက်လို့မရအောင် အများကြီး။ ဒီလိုဆိုတော့ ဓါတ်လှေခါးထဲမှာ ခြင်တစ်ကောင်ကို တွေ့ရတာဟာလည်း ဘာမှ မဆန်းဘူး။ ဒါပေမဲ့ ဆန်းနေတာတွေက ရှိသေးတယ်။  

ခြင်အကြောင်း အသေးစိတ် မပြောခင် ဓါတ်လှေခါးအကြောင်း (နည်းနည်း) အရင်ပြောတာ ကောင်းမယ်လို့ ယူဆတယ်။ ဓါတ်လှေခါးဟာ အတော်လေး ကျယ်ဝန်းတယ်။ အခင်းက အစိမ်းရောင် ရင့်ရင့်နဲ့။ ဓါတ်လှေခါးရဲ့ တံခါးမှာ ဆနွင်းမကင်းပုံ အကွက်ဖေါ်ထားတဲ့ သံတိုင်တွေနဲ့ ရှည်မျောမျော မှန်ချပ်တွေ ပါတယ်။ အတွင်းနံရံ သုံးဖက်မှာကတော့ ကြည်လင် လင်းလက်နေတဲ့ ကြည့်မှန်ချပ်တွေ ပါတယ်။ နံရံတစ်ဖက်မှာတော့ အင်္ဂလိပ်စာလုံး တစ်ကနေ လေးဆယ် အထိ ရေးထားတဲ့ လေးထောင့်အကွက်လေးတွေ ပါတယ်။ အရေးပေါ်ခေါ်ချင်ရင် နှိပ်စရာ ခလုပ်၊ တံခါး အဖွင့်အပိတ် ခလုပ်တွေလည်း ပါနေတဲ့ သာမာန်ဓါတ်လှေခါးတစ်စင်းပါပဲ။ ဒါပေမဲ့ အဲဒီဓါတ်လှေခါးထဲမှာရှိနေတဲ့ မှန်ချပ်တွေကတော့ အင်မတန်ဆွဲဆောင်မှုရှိတဲ့ မှန်ချပ်တွေလို့ ဆိုရမယ်။ ဓါတ်လှေခါးထဲရောက်ရင် အဲဒီမှန်တွေကို မကြည့်မိတဲ့သူ မရှိသလောက် (မရှိသလောက်) ရှားတယ်။ ကြီးကြီး ငယ်ငယ် ရွယ်ရွယ်၊ မိန်းမ ယောက်ျား ကလေး... အားလုံး တစ်ချက်ကလေးဖြစ်ဖြစ်တော့ မှန်ကို ကြည့်လိုက်ကြတာပဲ။ သိသိသာသာ ကြည့်တာနဲ့ မသိမသာ ကြည့်တာနဲ့ပဲ ကွာတယ်။ 

အများအားဖြင့် လူလတ်ပိုင်း အမျိုးသမီးတွေဟာ ဓါတ်လှေခါးထဲမှာ တခြားလူတွေ ရှိနေရင်တောင် နည်းနည်းလေးမှ ဂရုမစိုက်ပဲ မှန်ကို သိသိသာသာ ကြည့်တတ်ကြတယ်။ မှန်ကြည့်ပြီး ဆံပင်သပ်တင်လိုက်ကြတာမျိုး၊ ကိုယ်ပေါ်က အဝတ်အစားကို ဆွဲဆန့်လိုက်ကြတာမျိုး၊ လည်ပင်းက ဆွဲကြိုး အနေအထားလေး နည်းနည်း ပြင်လိုက်တာမျိုး၊ ပုခုံးမှာချိတ်ထားတဲ့ ပိုက်ဆံအိတ်ကို အရှေ့ဖက်ကို ဆွဲလှည့်လိုက်တာမျိုးတွေ ရှိတယ်။ တချို့ဆို ခါးကို မသိမသာလှည့်လို့ ကိုယ်လုံးပေါ်မှန်ကြည့်နည်းနဲ့ သူတို့ရဲ့ ခန္ဒာကိုယ်ကို ရှေ့ နောက် စောင်းငဲ့ပြီး ကြည့်တတ်သေးတာ။ အထက်တန်း ကျောင်းသူလေးတွေနဲ့ အမျိုးသမီးငယ်လေးတွေကတော့ ရှက်ကိုးရှက်ကန်း အမူအယာမျိုးနဲ့ မှန်ကို ဖြတ်ကနဲ မရဲတရဲ (မသိမသာ) ခိုးကြည့်တတ်ကြတယ်။ အမျိုးသားတွေလည်း အဲဒီလိုပဲ၊ မှန်ချပ်တွေပေါ်မှာ မြင်နေရတဲ့ သူတို့ပုံရိပ်ကို မသိမသာပဲ ကြည့်လေ့ရှိကြတယ်။ ကလေးငယ်တွေကတော့ မှန်နားကို မျက်နှာကပ်ပြီး ဝှူးကနဲ လေနဲ့ မှုတ်သူက မှုတ်၊ မှန်ထဲမှာ မြင်နေရတဲ့ သူတို့မျက်နှာကို သဘောကျပြီး မျက်လုံးပြူးလိုက်၊ လျှာထုတ်လိုက်၊ ပါးစပ်ကို လေဖေါင်းလိုက်နဲ့ နောက်ပြောင်သူက နောက်ပြောင်၊ မှန်ချပ်တွေကို လက်နဲ့ တဖြတ်ဖြတ်ရိုက်သူက ရိုက်နဲ့ပေါ့။ ဓါတ်လှေခါးထဲက မှန်ချပ်ကြည်ကြည်တွေဟာ လူတိုင်းကို အဲဒီလို ဆွဲဆောင်တယ်။ 

ဟုတ်ပြီ အခုလောက်ဆို ဓါတ်လှေခါးကို မျက်စိထဲ ကွက်ကွက်ကွင်းကွင်း မြင်ရောပေါ့။ အဲဒီဓါတ်လှေခါးထဲမှာ ဒီမနက် ကျွန်မတစ်ယောက်တည်း။ ရုံးချိန်မရောက်သေးပဲ အချိန်အတော် စောနေသေးတာက တစ်ကြောင်း၊ ကလေးတွေ ကျောင်းပိတ်ရက်ဖြစ်တာက တစ်ကြောင်း ဓါတ်လှေခါးထဲမှာ တခြား ဘယ်သူမှ မပါဘူး။ ဓါတ်လှေခါးထဲရောက်တော့ ခုနကပြောတဲ့ အင်မတန်ဆွဲဆောင်နိုင်အားကောင်းတဲ့ မှန်ချပ်ကြီးတွေပေါ်မှာ တွဲခိုနေတဲ့ ခြင်ကို အထင်အရှား တွေ့လိုက်ရတာပဲ။ ပြောခဲ့သလိုပါပဲ... ဓါတ်လှေခါးထဲမှာ ခြင်တစ်ကောင်ကို တွေ့ရတာ ဘာမှ မဆန်းဘူး။ ဆန်းနေတာက ခြင်ရဲ့ မျက်နှာပဲ။ ခြင်ဟာ သူ့မျက်နှာသေးသေးလေးပေါ်မှာ မထီတရီအပြုံးကို ဆင်မြန်းထားခဲ့တယ်။ ပြီးတော့ မှန်ချပ်ကို မျက်နှာမလွှဲတမ်း စူးစူးစိုက်စိုက်ကြည့်နေခဲ့တယ်။ ခြင်ဟာ အနောက်ဖက်ကို လှည့်ကြည့်စရာမလိုပဲ မျက်တောင်တစ်ခတ်အတွင်းမှာ ကျွန်မကို တွေ့မြင်သွားခဲ့တယ်။ ကျွန်မ သူ့ကို စူးစူးစိုက်စိုက် လှမ်းကြည့်နေတယ် ဆိုတာကိုလည်း မှန်ချပ်တွေကနေတဆင့်  ခြင် သိသွားခဲ့တယ်။ ခြင်ဟာ နေရာမှာ ကျောက်ရုပ်တစ်ရုပ်လို ငြိမ်သက်နေရင်း ကျွန်မကို သူ့ရဲ့ ရန်သူလား မိတ်ဆွေလား ဆိုတာ အကဲခတ်နေပုံပဲ။ 

ကျွန်မကလည်း အခုလို အထပ်လေးဆယ်အမြင့်အထိ ရောက်လာတဲ့ ခြင်ကိုကြည့်ရင်း  ဖြစ်နိုင်ခြေတွေကို ခန့်မှန်း စဉ်းစားနေခဲ့တယ်။ ခြင်ဟာ ဒီလောက် အမြင့်ကို ရောက်လာဖို့ သူ့ရဲ့ အတောင်ပံတွေကို ညောင်းညာကိုက်ခဲသွားတဲ့အထိ အသုံးပြုပြီး ခဲရာခဲဆစ် တက်လာခဲ့ရတာလား။ ဒါမှမဟုတ် ဓါတ်လှေခါးရဲ့ အကူအညီနဲ့ အတောင်တွေကို အနားပေးလို့ သက်တောင့်သက်သာ - မပင်မပန်း - ရောက်လာခဲ့တာလား။ ကျွန်မ အတွေးမဆုံးခင်မှာ ခြင်ဟာ တဖက်နဲ့တဖက် ထိုးထွင်းမြင်နိုင်အောင် ပါးလွှာပြီး ကြည်လင်တဲ့ အတောင်တွေကို တစ်ချက်ခတ်ပြီး သူ့ခန္ဓာကိုယ် အနေအထားကို နည်းနည်းပြင်လိုက်တယ်။ အတောင်ညောင်းလို့ အတောင်တွေကို ဆန့်လိုက်တာမျိုးလား၊ ဒါမှမဟုတ် - ဖြစ်ချင်ရာဖြစ် - အင်အားချင်းမမျှတဲ့ ရန်သူကို ရင်ဆိုင်တော့မယ်လို့ အားတင်းရင်း လက်သီးကို ကျစ်ကျစ်ပါအောင် ဆုတ်လိုက်တာမျိုးလားဆိုတာ ကျွန်မ မသေချာဘူး။ စိတ်ထဲက အလိုလို သိနေတာတစ်ခုကတော့ ခြင်ဟာ ကျွန်မကို သူ့ရဲ့ ရန်သူလို့ပဲ သဘောထားတယ်ဆိုတာပဲ။ ဒါနဲ့နေပါဦး... ကျွန်မတို့ လူသားတွေကရော အရွယ်အစားအားဖြင့် အင်မတန်သေးငယ်တဲ့ ခြင်တွေကို ဘယ်လောက်တောင် ရန်မူခဲ့ / ရန်ပြုခဲ့ / အသက်နဲ့ ခန္ဓာ အိုးစားကွဲပြီး တစ်စစီ သေကြေပျက်စီးအောင် ဖျက်ဆီးခဲ့ကြပြီးပြီလဲ။ 

တွေးကြည့်လိုက်တော့ အဖြေက သိပ်ရှင်းနေတယ်။ ငှက်ဖျားပိုး၊ အဝါရောင် အဖျားပိုး၊ သွေးလွန်တုတ်ကွေးနဲ့ တခြားရောဂါပိုးတွေကို သယ်ဆောင်ဖြစ်ပွားစေတဲ့ ခြင်တွေ။ သူတို့ကို မြင်လိုက်ရင် လူတိုင်း (လိုလို) က အားကြိုးမာန်တက် ရိုက်နှက် နှိမ်နင်းလိုက်ဖို့ အဆင်သင့် ဖြစ်နေကြတာ မဟုတ်လား။ ကိုယ့်ကိုယ်ပေါ်မှာ လာနား / လာကိုက်ရင်တောင် အဲဒီခြင် မြန်မြန်ကိစ္စတုံးဖို့သာ အဓိကထားပြီး ကိုယ့်အသား ဘယ်လောက်နာသွားတယ်ဆိုတာ ဂရုမထားပဲ ခပ်ပြင်းပြင်းလေး (မညှာမတာ) ရိုက်ပစ်လိုက်ကြတာမျိုး မဟုတ်လား။ ခြင်တွေကို နှိမ်နင်းပုံ နှိမ်နင်းနည်းနဲ့ ကာကွယ်နည်းတွေကလည်း ပြောရရင် အမျိုးပေါင်း များစွာပါ။ ခြင်ဇကာ၊ ခြင်ထောင် က အစ... ခြင်ဆေးခွေ၊ ခြင်ဆေးရည်၊ ခြင်မကိုက်စေတဲ့ လိမ်းဆေး၊ လိမ်းဆေးပါတဲ့ ကပ်ခွာ၊ လက်ကောက်တွေ အလယ်... လျှပ်စစ်ဓါတ်အားသုံး ဘက်တံ၊ ယပ်တောင်၊ ထောင်ခြောက်တွေအဆုံး အမျိုးကို စုံလို့။ ဒီကြားထဲ ဒန်အိုးအဖုံးမှာ ဆီသုတ်ပြီး ခြင်တွေကို ကပ်စေပြီး အမိဖမ်းတဲ့နည်းတောင် ရှိသေးတယ်။ ဘုရားရေ... မှုန်တီမှုန်မွှား သေးကွေးလှတဲ့ သတ္တဝါတစ်ကောင်အတွက် အကာအကွယ်တွေနဲ့ အားထုတ်မှုတွေက များလှချည်လား။ ဒါတွေကြောင့်ပဲ ဓါတ်လှေခါးထဲက ခြင်ဟာ ကျွန်မကို ရန်သူတစ်ယောက်လို ကြည့်နေတာဖြစ်မယ်။ ကျွန်မရဲ့ စိတ်အတွေးကို ခြင် သိနေသလား မဆိုနိုင်ဘူး။ ခြင်ဟာ သူ့ခြေထောက် ခြောက်ချောင်းကို တစ်ချောင်းချင်း ဆန့်ထုတ်လိုက်တယ်။ ခေါင်းပေါ်က အင်တီနာ အတံနှစ်ခုကလည်း နည်းနည်း လှုပ်ရှားသွားတယ်။ ဒါ ကျွန်မရဲ့ အနံ့ကို သူ စူးစမ်းလိုက်တာပဲ။ ဖြစ်ချင်တော့ သစ်သီးနံ့သင်းမွှေးတဲ့ ရေမွှေးကို ကျွန်မ နည်းနည်းဆွတ်လာခဲ့မိတယ်။ 

ခြင်တွေဟာ တကယ်ပဲ အဲဒီလောက်တောင် ဆိုးရွားကြသလား။ သူတို့မှာ ကောင်းတဲ့အချက်ကလေး တစ်ချက်တလေတောင် မရှိတော့ကြဘူးလား။ ကျွန်မ ပြန်စဉ်းစားကြည့်တယ်။ ကျွန်မဖတ်ဖူးတဲ့ ဆောင်းပါးတစ်ပုဒ်မှာ ခြင်တွေရဲ့ အကြောင်း ကောင်းတာလေးတွေ ရွေးပြောထားတာ ပြန်သတိရတယ်။ လူတွေကို ကိုက်တတ်တာက ခြင် အမ တွေသာ ဖြစ်တယ်၊ ခြင်အထီးတွေဟာ မကိုက်တတ်ကြဘူးတဲ့။ ဒါဆိုရင် ဓါတ်လှေခါးထဲက မှန်ချပ်ပေါ်မှာ ခိုတွယ်နေတဲ့ ခြင်ကရော အထီးလား အမလား။ တကယ်လို့များ သူဟာ ခြင်အထီးဆို ကျွန်မကို ဒုက္ခပေးမယ့် ခြင်တစ်ကောင် မဟုတ်နိုင်ဘူးပေါ့။ ကိုယ့်ကို ရန်မူမှာမဟုတ်တဲ့ ခြင်တစ်ကောင်ကို ကျွန်မက - အသားလွတ် - ရိုက်ပုတ် နှိမ်နင်းမယ်ဆိုရင် တရားပါ့မလား။ ခက်ပုံခက်နည်းက ကျွန်မဟာ ခြင်တစ်ကောင်ရဲ့ ပြင်ပလက္ခဏာတွေကို ကြည့်ရုံနဲ့ အထီးလား အမလား မခွဲခြားတတ်တာပဲ။ လောကကြီးမှာ သင်ယူလို့ မဆုံးနိုင်တဲ့ သင်ခန်းစာတွေ အများကြီး ရှိနေသေးတယ် ဆိုတာ နားလည်လိုက်တယ်။ 

ခြင်အထီးတွေဟာ လူတွေကို ကိုက်တတ်တဲ့အထဲ မပါဘူး၊ လူတွေကို ဒုက္ခပေးတတ်ကြသူတွေမဟုတ်လို့ ခြင်တော် ခြင်ကောင်းတွေဆိုရင် ခြင်အမ တွေမှာရော တော်တာ ကောင်းတာလေးများ မရှိဘူးလား။ အဲဒီဆောင်းပါးမှာ ရေးထားတာကတော့ ခြင်အမတွေဟာ သူတို့ရဲ့ ကလေးတွေအတွက် လိုအပ်နေတဲ့ အစာအဟာရအတွက် လူတွေဆီက သွေးကို လာယူတာဖြစ်တယ်။ ဒါကို မိခင်မေတ္တာလို့ တွေးမြင်ယူဆလိုက်နိုင်ရင် အနည်းဆုံးတော့ သူတို့ကို ခွင့်လွှတ်နိုင်စိတ်ကလေး ပေါ်လာတန်ကောင်းပါရဲ့ တဲ့။ ကျွန်မ တခဏတော့ ငြိမ်တွေသွားမိတယ်။ ပြီးတော့ ကျွန်မရဲ့ သားလေးအတွက် သူကြိုက်နှစ်သက်တဲ့ စားသောက်ဖွယ်ရာတွေကို ပြင်ဆင် ချက်ပြုတ်ပြီး တယုတယ (စိတ်ရှည်လက်ရှည်) ခွံ့ကျွေးဖြစ်တဲ့ အချိန်တွေကို သတိရသွားတယ်။ ကျွန်မမျက်စိရှေ့ မှန်ချပ်ပေါ်မှာက ခြင်ကရော  ခြင်အမတစ်ကောင် (သားတွေ သမီးတွေအများကြီးနဲ့ ခြင် အမေတစ်ကောင်) များ ဖြစ်နေမလား။ သူ့ရဲ့ ရင်သွေးတွေ လိုအပ်တဲ့ အစာရေစာတွေ ဖြည့်ဆည်းပေးဖို့အတွက် ဒီလို အထပ်ပေါင်းများစွာ မြင့်မားခေါင်သီတဲ့ နေရာဒေသကို စွန့်စွန့်စားစား အစာရှာထွက်လာခဲ့သူလား။ သားသမီးတွေဆီ အပြန်လမ်းပျောက်နေလို့ နားမိနားရာ နေရာတစ်ခုမှာ နားနေခဲ့သူလား။

ခြင်ကို ကြည့်ရင်းနဲ့ ကျွန်မ ဝမ်းနည်းလာတယ်။ ခြင်ကတော့ ကျွန်မရဲ့အဖြစ်ကို သိဟန်မတူဘူး။ မှန်ထဲမှာ မြင်နေရတဲ့ ကျွန်မကများ သူ့ကို ရန်မူလာခဲ့ရင်ဆိုတဲ့ စိတ်အတွေးနဲ့၊ တစ်ခုခုဆို အချိန်ကိုက်လှုပ်ရှားနိုင်အောင် အဆင်သင့် ပြင်ထားတဲ့ အနေအထားမျိုးနဲ့ သေသေချာချာ စိုက်ငေးကြည့်နေဆဲပဲ။ အခုနက သူ့မျက်နှာ သေးသေးလေးပေါ်မှာ မြင်ခဲ့ရတဲ့ မထီတရီ - မခိုးမခန့် - အကြည့်တွေလည်း ပျောက်ဆုံးလို့။ စိုးရိမ်ထိတ်လန့်တဲ့ အရိပ်တွေသာ ကြီးစိုးနေခဲ့တယ်။

အဲဒီအချိန်မှာပဲ ဓါတ်လှေခါးတံခါးဟာ ရုတ်ချည်းပွင့်လာပြီး မှန်းခြေ အသက်ငါးနှစ်ကျော်ကျော် ခြောက်နှစ်၊ ဒါမှမဟုတ် ခုနှစ်နှစ်လောက်ရှိမယ်ထင်ရတဲ့ ကလေးနှစ်ယောက် ကျောပိုးအိတ်ကိုယ်စီနဲ့ ဝရုန်းသုန်းကား ပြေးဝင်လာခဲ့တယ်။ ဒီနေရာမှာ ကျွန်မဟာ ကလေးတွေရဲ့ အသက်ကို ခန့်မှန်းရာမှာ သိပ်ညံ့တယ်ဆိုတာ ဝန်ခံချင်သေးတယ်။ ပြောရရင် အဲဒီကလေးနှစ်ယောက်ဟာ ဓါတ်လှေခါးထဲရောက်ပြီး စက္ကန့်သုံးဆယ်လောက်အကြာမှာ ခြင်ကို တွေ့သွားတယ်။ ဟုတ်တယ် ခြင်ကလည်း တွေ့ချင်မြင်ချင် သတိထားမိချင်စရာပဲ။ မှန်ချပ်ကြည်ကြည်ပေါ်မှာ တစ်ကောင်တည်း ထင်ထင်ရှားရှား ရှိနေတာကိုး။ ခြင်ကို ကြည့်နေရင်းမှာ ကလေးနှစ်ယောက်ထဲက နည်းနည်းပိုပိန်တဲ့တစ်ယောက်က ခြင်ကို သူ့လက်ဝါး ပိန်ပိန်သေးသေးလေးနဲ့ လှမ်းရိုက်ဖို့ ကြိုးစားတာကို ရိပ်ကနဲ မြင်လိုက်ရတယ်။ အဲဒီလို မြင်လိုက်တယ်ဆိုရင်ပဲ ကျွန်မရဲ့ ညာဖက်လက်ကို သူတို့ထက် မြန်အောင် လှုပ်ရှားလိုက်တယ်။ ပြီးတော့ မျက်စိကို စုံမှိတ်ထားလိုက်မိတယ်။ တကယ်တော့ ကျွန်မ ဘာလုပ်လိုက်တယ်ဆိုတာ ကိုယ့်ကိုကိုယ် သတိမထားလိုက်မိဘူး။ သတိဝင်လာတဲ့အချိန်မှာ ကျွန်မ မျက်လုံးဖွင့် ကြည့်လိုက်တော့ ဓါတ်လှေခါး မှန်ပေါ်မှာ အခုနက ခြင် မရှိတော့ဘူး။ ကျောပိုးအိတ်ကိုယ်စီနဲ့ ကလေးငယ်နှစ်ယောက်ကတော့ ကျွန်မကို မျက်လုံးအကြောင်သားနဲ့ မော့ကြည့်နေကြတယ်။ ကျွန်မဟာ ဓါတ်လှေခါးထဲရောက်ပြီး အမှတ်မထင်မြင်တွေ့လိုက်ရတဲ့ ခြင်တစ်ကောင်ကိုကြည့်ရင်း အချိန်တော်တော်ကြာကြာ အတွေးနယ်ချဲ့နေမိတာကြောင့် ဓါတ်လှေခါးကို အောက်ဆင်းဖို့ ခလုပ်တွေ နှိပ်မထားမိဘူး။ ဒါပေမဲ့ ကလေးငယ်တွေရဲ့ ကောင်းမှုကြောင့် ဓါတ်လှေခါးဟာ အထပ်လေးဆယ်ကနေ အောက်ဆုံးမြေညီထပ်ကို ဒုတ်ဒုတ်ထိ ရောက်သွားခဲ့ပြီ။ တံခါးပွင့်လာတော့ ကလေးနှစ်ယောက်က ကျွန်မကို လှည့်ကြည့် လှည့်ကြည့်နဲ့ ထွက်သွားကြတယ်။ ကျွန်မကတော့ ရုတ်တရက် အပြင်ကို မထွက်နိုင်သေးဘူး။ ကြိုးစားပြီး ခပ်ဖွဖွဖြစ်အောင် ဆုတ်ထားတဲ့ ကျွန်မရဲ့ လက်သီးဆုတ်ကို အဓိပ္ပါယ်မဲ့ ပြန်ငုံ့ကြည့်နေခဲ့မိတယ်။ ပြီးတော့ နည်းနည်းလည်း တုန်လှုပ်နေခဲ့တယ်။ အဲဒီအချိန်မှာ ဓါတ်လှေခါးထဲကို လူတွေဝင်လာဖို့ ပြင်နေပြီ။ ကျွန်မ ဓါတ်လှေခါးထဲက ထွက်ခဲ့လိုက်တယ်။

ဓါတ်လှေခါးအပြင်ကိုရောက်တော့ လူသွားစင်္ကြန်အမိုးလေးအောက်ကို ခြေလှမ်းနည်းနည်း လျှောက်သွားလိုက်တယ်။ ပြီးတော့ ဘေးဘီဝဲယာကို ကြည့်လိုက်တယ်။ အနီးအနားမှာ ဘယ်သူမှ မရှိဘူးဆိုတာ သေချာပြီဆိုမှ အသက်ကို တဝရှူသွင်းရင်း ဆုပ်ထားတဲ့လက်ကို ဖြည်းဖြည်းခြင်း ဖြေလိုက်မလို့။ အဲဒီလို ဖြေနေတဲ့အချိန်မှာ မျက်စိကို မှိတ်ထားရမလား၊ ဖွင့်ကြည့်နေရမလားဆိုတာ ချီတုံချတုံဖြစ်နေသေးတယ်။ မျက်စိကို မှိတ်ထားရင်ကောင်းမယ်လို့ တွေးပြီး ဖျတ်ကနဲ မှိတ်လိုက်တဲ့အချိန်မှာ နီနီရဲရဲ သွေးအိုင်ထဲမှာ ခွေခွေလေး လဲနေတဲ့ ခြင်တစ်ကောင်ပေါ်လာတော့ ကြောက်လန့်တကြားနဲ့ မျက်စိကို ပြန်ဖွင့်လိုက်တယ်။ ခုနက ဆုတ်ထားတဲ့ လက်သီးကိုလည်း လန့်ပြီး ဖြည်လိုက်မိတယ်။ လက်ထဲမှာ.... 

လမ်းဆက်လျှောက်ရင်း စဉ်းစားလာတာ... ကျွန်မရဲ့လက်သီးထဲမှာ ခြင်ဟာ အစထဲက ပါမလာခဲ့တာလား။ ဒါမှမဟုတ် လက်သီးဆုတ်ကို ဖြည်လိုက်တဲ့အချိန်မှာ ပျော်ပျော်ပါးပါး ပျံထွက်သွားတာလား ဆိုတာပဲ။
သက်ဝေ
(၅ မေ ၂၀၁၆)


 - ၂၀၁၆ စက်တင်ဘာလ - Idea မဂ္ဂဇင်းတွင် ဖေါ်ပြပြီးဖြစ်သည်။

Thursday, July 21, 2016

လက်ကိုင်ဖုန်းထဲက မင်းသမီး

ကျွန်မ အိပ်ရာကနိုးလာတော့ အတော်နေမြင့်နေပြီ။ နေမြင့်ပြီသာ ပြောတာ နေလုံးဟာ ဘယ်နားရောက်လို့ ဘယ်လောက်အမြင့်ဆီ ရောက်နေတယ်ဆိုတာ ဘယ်သူကများ သေသေချာချာ သိမှာလဲ။ ဒီလိုပဲ ပြောရိုးပြောစဉ် စကားတစ်ခွန်းအနေနဲ့ နေမြင့်ပြီ နေမြင့်ပြီ ဆို ပြောနေကြတာ။ စဉ်းစားကြည့်ရင် အတော်တော့ ရယ်စရာ ကောင်းတယ်။ ထားပါလေ... အခု နေမြင့်ပြီ ဆိုပါစို့။ နေမြင့်တော့ တစ်နေ့တာ အလုပ်မစခင် မနက်စာ စားဖို့ လိုအပ်နေတယ်။ ဒါနဲ့ စားစရာ ဆိုင်တန်းတွေဖက်ကို လျှောက်လာခဲ့တယ်။ အဲဒီစားသောက်ဆိုင်တန်းမှာ ဆိုင်ခန်းပေါင်း ဆယ့်တစ်ခုရှိတယ်။ 

မနေ့ညက အလုပ်ကပြန်တော့ အတော်လေး မိုးချုပ်နေပြီ။ နာရီတော့ မကြည့်ဖြစ်ဘူး။ အလွယ်တကူ ကြည့်ရအောင်ကလည်း ကျွန်မ လက်ထဲမှာ နာရီမရှိဘူး။ နာရီဆိုတာ ကြည့်လည်း ဒီအချိန်ပဲ မကြည့်လဲ ဒီအချိန်ပဲ ဆိုတော့ နာရီကြည့်တဲ့အလုပ်ဟာ အပိုအလုပ်လို့ ခံယူထားတာကြာပြီ။ ဒါက စကားကြုံလို့ ပြောပြတာပါ။ ဒီလိုနဲ့ အိမ်အပြန်လမ်းမှာ မျက်စိရှေ့ တွေ့သမျှ ကားနံပါတ်က ဂဏန်းတွေကို လိုက်ပေါင်းတယ်။ အဲဒီအကျင့်က ကျောင်းအတူသွားဖေါ် ကျွန်မရဲ့ ငယ်သူငယ်ချင်းတစ်ယောက်ဆီက ရလာတာ။ ငယ်ငယ်က သူနဲ့အတူ ကျောင်းကို လမ်းလျှောက်သွားရင်း လမ်းပေါ်မှာ ဖြတ်သွားတဲ့ ကားတွေရဲ့ နံပါတ်တွေကို သူ့ထက်ငါ မြန်မြန်အဖြေရအောင် ပြိုင်ပေါင်းကြတယ်။ ပေါင်းတဲ့အခါမှာလည်း မြန်မြန်အဖြေထွက်အောင် ပေါင်းတတ်ဖို့ ပညာက လိုသေးတယ်။ အဲဒါကဘာလဲဆိုတော့ ကိုး တွေကို ဖယ်ထုတ်ပြီး ပေါင်းတဲ့ နည်းပဲ။ နံပါတ်မှာ ကိုး မပါရင်လည်း ရှိနေတဲ့ ဂဏန်းလုံးတွေထဲက ကိုး ဖြစ်နိုင်မယ့် ဂဏန်းတွေကို ရှာ၊ အဲဒါတွေကို ဖယ်ထုတ်ပြီး ကျန်တာတွေကို ပေါင်းတဲ့နည်း။ ဒီနေရာမှာ ကိုး ဆိုတဲ့ ဂဏန်းရဲ့ ဂုဏ်သတ္တိဟာ အင်မတန် ထူးဆန်းတယ်ဆိုတာလေးတော့ တဆိတ် မှတ်ထားကြစေချင်တယ်။ အဲဒီလို လမ်းသွားရင်း ကားနံပါတ်တွေ ပေါင်းတဲ့နည်းက ကလေးတွေကို စိတ်တွက် တွက်တတ်အောင် သင်ပေးတဲ့နေရာမှာ သိပ်အသုံးဝင်တယ် လို့ ကျွန်မသူငယ်ချင်းက ဆိုတယ်။ တကယ်လို့များ ရှင်တို့ အနီးအနားမှာ ကလေးတစ်ယောက်တလေ ရှိနေခဲ့ရင် ဒီနည်းကို စမ်းကြည့်ကြပါလို့ တိုက်တွန်းချင်တယ်။ 

အဲဒီလို ကားနံပါတ်တွေ ပေါင်းနေရင်း ညက တဖြည်းဖြည်း ပိုမှောင်မိုက်လာတယ်။ ညနက်တော့ လမ်းပေါ်မှာ ကား အသွားအလာ ကျဲသွားတာကနေ ကားတစီးတလေမှ မရှိတော့တဲ့အခါ လူက အလုပ်မရှိတော့သလို ဖြစ်သွားတယ်။ အဲဒီတော့ လမ်းဘေးက တိုက်တန်းလျားတွေရဲ့ ပြတင်းတံခါးတွေကို ရေတွက်တယ်။ ဖွင့်ထားတဲ့ ပြတင်းတံခါး ဘယ်နှစ်ခု၊ ပိတ်ထားတဲ့ ပြတင်းတံခါး ဘယ်နှစ်ခု သီးခြား မှတ်သားရေတွက်ရင်း ခဏကြာတော့ အကုန်ရောသွားတယ်။ ဒါနဲ့ မထူးဘူးဆိုပြီး ပိတ်ထားတဲ့ ပြတင်းတံခါးတွေနဲ့ ဖွင့်ထားတဲ့ ပြတင်းတံခါးတွေရဲ့ အရေအတွက်ကို ပေါင်းပစ်လိုက်တယ်။ တကယ်လည်း ထူးတော့ မထူးပါဘူး ပြတင်းတံခါးဟာ ပိတ်ထားထား ဖွင့်ထားထား ပြတင်းတံခါးတွေပဲ မဟုတ်လား။ ကိုယ့်အတွေးကို ကိုယ် သဘောကျရင်း ဟက် ဆို တချက် ရယ်လိုက်တယ်။ အဲဒီအချိန်မှာမီးရောင် လင်းလင်းနဲ့ ညလုံးပေါက်ဖွင့်တယ်လို့ ထင်ရတဲ့ စားသောက်ဆိုင်တန်းဟာ ကျွန်မရဲ့ မျက်စိရှေ့ကို ရွေ့လျားလာခဲ့တာပဲ။


ဒါနဲ့ ဆိုင်ခန်းတွေရဲ့ နာမည်ကို စာလုံးပေါင်း ဖတ်ရင်း တစ်ခန်း နှစ်ခန်း သုံးခန်း... ရေတွက်ကြည့်လိုက်မိတာပါ။ ဟော... ပြောရင်းဆိုရင်းမှာ ညကရေတွက်ခဲ့တဲ့ စားသောက်ဆိုင်တန်းတွေနားကို ရောက်လာခဲ့ပြီ။ ပြောခဲ့သလိုပဲ၊ အဲဒီစားသောက်ဆိုင်တန်းမှာ ဆိုင်ခန်းပေါင်း ဆယ့်တစ်ခုရှိတယ်။ ဒါပေမဲ့ အခု လောလောဆယ် (မနက်ပိုင်းမှာ) ဖွင့်နေတာက နှစ်ဆိုင်ထဲရယ်။ ကော်ဖီ လဖက်ရည် အအေး ရောင်းတဲ့ ဆိုင်ရယ်၊ ခေါက်ဆွဲကြော် ကြာဆံကြော်တွေကို ကြက်ဥကြော်၊ အသားပြားကြော်၊ ကြက်တောင်ပံကြော်တွေနဲ့ တွဲ ရောင်းတဲ့ ဆိုင်ရယ်... အဲဒီ နှစ်ဆိုင်ပဲ ဖွင့်ထားတယ်။ ခေါက်ဆွဲကြော်ဆိုင်မှာ တန်းစီနေကြတဲ့ လူတန်းရှည်ကြီးကို တချက် လှမ်းကြည့်လိုက်တယ်။ ပြီးတော့ သူတို့အားလုံးရဲ့ အနောက်မှာ ကျွန်မ ဝင်ရပ်လိုက်တယ်။ ရှေ့မှာ တန်းစီနေတဲ့လူ အားလုံးလိုလိုက လက်ကိုင်ဖုန်းတွေကို ငုံ့ကြည့်နေကြတယ်။ ဒါနဲ့ ကျွန်မလည်း ရောယောင်ပြီး အိတ်ထဲမှာ ပါလာတဲ့ လက်ကိုင်ဖုန်းကို ထုတ်လိုက်တယ်။

သူများနည်းတူ လက်ကိုင်ဖုန်းကိုသာ ထုတ်ယူလိုက်တာ၊ လက်ကိုင်ဖုန်းကိုသုံးပြီး ဘာလုပ်ရမယ်ဆိုတာ တကယ် မသိဘူး။ ပြောရရင် ကျွန်မအတွက် လက်ကိုင်ဖုန်းက အသုံးမတည့်တာ ကြာပြီ။ လက်ကိုင်ဖုန်းကနေ အချိန်မှန် (မပျက်မကွက်) ခေါ်ရ ပြောရမယ့်သူလည်း မရှိတာ ကြာပြီ ဆိုရင် ပိုမှန်မယ်။ အဲဒီကိစ္စကိုတော့ အကျယ်ချဲ့ပြီး မပြောချင်တော့ဘူး။ စိတ်သဘောထားချင်းမတိုက်ဆိုင်သောကြောင့် ဆိုတဲ့ စကားကို ရှင်တို့ ကြားဖူးကြမှာပေါ့။ အဲဒီစကားအတိုင်းပါပဲ။ သတင်းစာထဲမှာလည်း အဲဒီလိုပဲ ထည့်ရေးလိုက်ရတယ်။ တခြားလည်း ရှည်ရှည်ဝေးဝေး ရှင်းနေ ပြောနေစရာမှ မလိုတာ။ ပြီးတော့ ထုံးစံအရ စုံစမ်းမေးမြန်းခြင်း သည်းခံပါ ဆိုတာကလည်း ထည့်ရေးလိုက်ရသေးတယ်။ လူတွေရဲ့သဘောကလည်း ခက်သားလား။ စုံစမ်းမေးမြန်းခြင်း သည်းခံပါ ဆိုကာမှ ပိုသိချင် မေးချင်မြန်းချင်ကြတာမျိုး။ ဒါပေမဲ့ အဲဒီကြော်ငြာ သတင်းစာထဲ ပါလာတဲ့နေ့က ကျွန်မ လက်ကိုင်ဖုန်းကို ပိတ်ပြီး မြစ်ကမ်းစပ်တစ်ခုမှာ သွားထိုင်နေခဲ့တယ်။ အဲဒီညနေက လေတွေကလည်း တိုက်လိုက်တာ လွန်ပါရော။ လည်ပင်းမှာ စီးလာတဲ့ လည်စည်းပုဝါတောင် လေထဲ လွင့်ပါပြီး ရေထဲ မျောသွားတဲ့ အထိပဲ။ ပုဝါ လွင့်သွားသွားချင်း ရေစပ်ကို ဆင်းပြီး ပြန်ကောက်ဖို့ ကျွန်မ မကြိုးစားခဲ့ဘူး၊ ရေထဲကို ဆင်းပြီးရင် ပြန်တက်လာချင်စိတ် ရှိ မရှိ ကျွန်မ မသေချာလို့။

ခဏနေတော့ ရှေ့မှာ တန်းစီနေတဲ့ လူတွေ နည်းနည်းရွေ့သွားတယ်။ ဒါနဲ့ သူတို့ရဲ့ လမ်းကြောင်းအတိုင်း အရှေ့ကို လိုက်ရွှေ့ရတယ်။ ပြီးတော့ လက်ထဲမှာကိုင်ထားတဲ့ လက်ကိုင်ဖုန်းရဲ့ အနက်ရောင်မျက်နှာပြင်ကို ငုံ့ကြည့်မိတယ်။ ဒီလိုနေလို့တော့ မဖြစ်သေးပါဘူး။ လူတန်းရှည်ကြီး နောက်တည့်တည့်မှာ ရပ်နေရာက ကိုယ်ကို ဘေးဖက်ကို နည်းနည်းထွက်ပြီး လက်ကိုင်ဖုန်းကို သူတို့ ဘယ်လို အသုံးချနေသလဲ အကဲခတ်ရတယ်။ တော်တော်များများက လက်ကိုင်ဖုန်းနဲ့ သူတို့ရဲ့ နားရွက်တွေကို ကြိုးတစ်ချောင်းနဲ့ သွယ်တန်းထားကြတယ်။ ကျွန်မမှာ အဲဒီကြိုး ပါမလာဘူး။ ပါမလာဘူးဆိုတာကလည်း အစတည်းက ရှိမနေလို့ပါ။ အမှန်အတိုင်းပြောရရင် ကျွန်မဆီမှာ ဘာကြိုးမှ မရှိပါဘူး။ တခါတခါတော့လည်း ကြိုးတစ်ချောင်းတလေ လိုချင်မိတယ်။ ပြီးတော့ ကျွန်မ စဉ်းစားတယ်။ တကယ်လို့များ ကျွန်မမှာ ကြိုး နှစ်ချောင်းရှိမယ်ဆို တစ်ချောင်းကို ပထမကြိုး နဲ့ နောက်တစ်ချောင်းကို ဒုတိယကြိုးလို့ အမည်ပေးဖို့ပါ။ ဒုတိယကြိုးဟာ ခိုးခိုးခစ်ခစ်ရယ်မောတတ်တဲ့ ပန်းနုရောင် ဂါဝန်ဝတ် သမီးလေးတစ်ယောက်ဖြစ်နိုင်သလို ပါဝါရိန်းဂျားဝတ်စုံနဲ့ ဒါးကိုင်ပြီး ဟန်ရေးပြင်နေတဲ့ သားကလေးတစ်ယောက်လည်း ဖြစ်နိုင်မယ် မဟုတ်လား။ ဒါပေမဲ့ ပထမကြိုးတစ်ချောင်းဟာ မထင်မှတ်ပဲ ပြတ်တောက်သွားခဲ့တယ်။ ဒီတော့ ကျွန်မအတွက် ဒုတိယကြိုးဆိုတာ လေထဲမှာဆောက်ခဲ့တဲ့ အိမ်ကလေးပါပဲ။ ဘယ်တော့မှ ရှိမလာနိုင်တော့မယ့် ဒုတိယကြိုးပါ။ အဲဒီလိုတွေ တွေးမိတဲ့အချိန်မျိုးမှာ ကျွန်မ (စိတ်ညစ်ညစ်နဲ့) ခေါက်ဆွဲကြော် စားလေ့ရှိတယ်။ ဝါဖန့်ဖန့် သို့မဟုတ် ညိုညစ်ညစ် ခေါက်ဆွဲမျှင်တွေဟာ ကြိုးတွေလို့ လှည့်စားလို့ အကောင်းဆုံးပစ္စည်း မဟုတ်လား။

ကျွန်မနဲ့ တစ်ယောက်ကျော်မှာ ရပ်နေတဲ့ အမျိုးသမီးတစ်ယောက်ရဲ့ လက်ကိုင်ဖုန်းမျက်နှာပြင်က အတော်လေး ကြီးတယ်။ ကြီးဆို ကျောင်းသုံးဗလာစာအုပ်တစ်အုပ်လောက်ကို ကြီးတာ။ ဒီတော့ သူ့ရဲ့ လက်ကိုင်ဖုန်းမျက်နှာပြင်ကို ကျွန်မ ကောင်းကောင်းမြင်လို့ရတယ်။ သူ ကြည့်နေတာ ရုပ်ရှင်လား၊ သီချင်းလား တစ်ခုခုပဲ။ အလှပြင်ထားတဲ့ အမျိုးသမီးတစ်ယောက်ရဲ့ မျက်နှာကို အကြီးကြီး မြင်ရတယ်။ အဲဒီမျက်နှာကို ကျွန်မ မြင်ဖူးတယ်။ ဒါပေမဲ့ နာမည်တော့ မမှတ်မိတော့ဘူး။ စိတ်သဘောထားခြင်း တိုက်ဆိုင်တဲ့ အချိန်တုန်းက တီဗီရှေ့မှာ ကျွန်မနဲ့ ကျွန်မရဲ့ ပထမကြိုးတို့ အတူတူ ထိုင်ဖူးခဲ့တယ်။ ပြီးတော့ တီဗီဖန်သားပြင်မှာ ပေါ်လာသမျှ အရုပ်တွေကို ကြည့်ရင်း နေ့နေ့ ညည (အကြောင်းမဲ့) ရယ်မောခဲ့ဖူးတယ်။ အဲဒီတုန်းက မြင်ဖူးခဲ့တဲ့ မျက်နှာတွေထဲက တစ်ခုပဲ။ လှတော့တော်တော်လှတဲ့ မျက်နှာ။ အဲဒီလက်ကိုင်ဖုန်းအကြီးစားကို လှမ်းအကဲခတ်ရင်း တန်းစီနေတဲ့ လူတန်းရဲ့ အရွေ့အတိုင်း ကျွန်မ လိုက်ရွှေ့ရသေးတယ်။

အခုဆိုရင် ကျွန်မရဲ့ အနောက်မှာ တန်းစီနေတဲ့သူတွေတောင် ရှိနေပြီ။ နောက်ကျော နည်းနည်း လုံသွားတာပေါ့လို့ တွေးရင်း အရှေ့က လက်ကိုင်ဖုန်းအကြီးစားကို ဆက်ပြီး အကဲခတ်ရတယ်။ အခုနက မင်းသမီးလား အဆိုတော်လား မသဲကွဲတဲ့ အမျိုးသမီးရဲ့ မျက်နှာလှလှကို နောက်တကြိမ် ထပ်တွေ့ရပြန်တယ်။ စိတ်ထဲမှာ နည်းနည်းတော့ စနိုးစနောင့်ဖြစ်နေတယ်။ ဘယ်သူ ဘယ်ဝါ ကွဲကွဲပြားပြား သိလိုစိတ်နဲ့အတူ လူက ရီဝေဝေ မူးရိပ်ရိပ်ဖြစ်လာတယ်။ ဟိုက်ပိုဂလိုက်ဆီးမီးယား ဆိုတဲ့ သွေးထဲမှာ အချိုဓါတ်နည်းနေတာမျိုး၊ အဲဒီလိုမျိုး ကျွန်မ မကြာခဏ ဖြစ်ဖူးတယ်။ အဲဒီအချိန်မှာ သကြားလုံးတစ်လုံးလောက် ဝါးစားလိုက်ရင် ကောင်းသွားတတ်တယ်။ ဖြစ်ချင်တော့ အိတ်ထဲမှာ သကြားလုံး တစ်လုံးမှ ရှိမနေဘူး။ နားထင်ကို လက်နဲ့ထောက်ထားရင်းမှာ ကျွန်မအရှေ့ ကပ်ရက်ကလူက ကျွတ် ဆို အသံပြုပြီး ထွက်သွားတယ်။ ကြည့်ရတာ စောင့်ရတာ ကြာလို့ စိတ်မရှည်ပုံမျိုး။ စောင့်ရတာ ကြာလို့ စိတ်မရှည်ရင် ရှင် ခေါက်ဆွဲ မစားရရုံပဲ ရှိမှာပေါ့ အတော်ညံ့တဲ့လူပဲ လို့ စိတ်ထဲက ပြောလိုက်တယ်။ သူ ဘယ်ကြားမလဲ။

အဲဒီလူထွက်သွားတော့ အခုနက လက်ကိုင်ဖုန်းအကြီးစားဟာ ကျွန်မနဲ့ လက်တကမ်းအကွာကို ရောက်လာတော့တာပေါ့။ အခန့်သင့်လိုက်လေ။ လူတန်းဟာ အရှေ့ကို နည်းနည်း ဆက်ရွေ့သွားတယ်။ နီးနေပါပြီ။ ခေါက်ဆွဲစားရဖို့ တနည်းအားဖြင့် ကြိုးမျှင်တွေ ပိုင်ဆိုင်ရဖို့ နီးလာနေပါပြီ။ နည်းနည်းတော့ စိတ်လှုပ်ရှားမိသားရှင့်။ စိတ်ထဲကသာ အတွေးပေါင်းစုံတွေးနေတာ မျက်လုံးကတော့ အရှေ့က အမျိုးသမီးရဲ့ လက်ကိုင်ဖုန်းမျက်နှာပြင်ကို မခွာမိဘူး။ ကြည့်နေရင်းမှာ အဲဒီမျက်နှာပြင်ဟာ တဖြည်းဖြည်း ကြီးလာတာ အိမ်ရှေ့ ဧည့်ခန်းက လက်မ လေးဆယ် တီဗီလောက်ကို ကြီးလာသလိုပဲ။ ဖန်သားပြင်ပေါ်က မိတ်ကပ်နှုတ်ခမ်းနီ ခြယ်သထားတဲ့ အမျိုးသမီးရဲ့ မျက်နှာလှလှဟာလည်း နီးလာလိုက် ဝေးသွားလိုက်၊ ကြီးလာလိုက် သေးသွားလိုက်၊ ပြုံးလာလိုက် မဲ့သွားလိုက်။ အတော်အတန် ရင်းနှီးနေတဲ့ မျက်နှာလိုပဲလို့ တွေးရင်း ကျွန်မလက်ထဲမှာ ခလုတ်မဖွင့်ရသေးတဲ့ လက်ကိုင်ဖုန်းကို ကျစ်ကျစ်ပါအောင် ဆုတ်ထားမိတယ်။ အဲဒီအချိန်မှာ ကျွန်မရဲ့ ခေါင်းထဲကို တစုံတရာ ဆောင့်တွန်းထည့်လိုက်တဲ့အသံ… ဒုန်း ကနဲ တချက် ကြားရတယ်။ စောစောက ချောင်ချောင်လည်လည်ဖြစ်နေတဲ့ ခေါင်းဟာ ပစ္စည်းတွေနဲ့ ရုတ်ချည်း ပြည့်သိပ်သွားသလို ခံစားရတယ်။ မနက်ခင်းရဲ့ လန်းဆန်းတဲ့ နေရောင်တွေနဲ့အတူ ဦးနှောက်တွေ နေသားတကျ ပြန်လည် နိုးထ ဖွံ့ဖြိုးလာတာ ထင်ရဲ့နော်။ တဆိတ်တော့ ဆန်းကြယ်သား။ ရှင်တို့လည်း တနေ့နေ့ တချိန်ချိန်မှာ အဲဒီလိုအဖြစ်မျိုး ကြုံဖူးကြမှာပါ။


တဆက်တည်းမှာပဲ ခေါင်းထဲကနေ မြင်ကွင်းတချို့ တဖျတ်ဖျတ်နဲ့ ခုန်ဆင်းလာကြတယ်။ မြို့လည်ခေါင်မှာရှိတဲ့ ပြဇာတ်ရုံအရှေ့က ရေပန်းနားမှာ ရုတ်တရက်တွေ့လိုက်ရတဲ့ ပူးပူးကပ်ကပ် ခန္ဓာကိုယ်နှစ်ခု၊ ကျွန်မတစ်ယောက်တည်းသာ မြင်နိုင်တဲ့ကြိုးမျှင်တွေက သူတို့ကိုယ်တွေကို ပူးချည်ထားသလိုပဲ။ ပြီးတော့ အရှေ့က လက်ကိုင်ဖုန်းထဲက မင်းသမီးရဲ့ မျက်နှာ၊ စိတ်သဘောထားချင်း မတိုက်ဆိုင်ပါသဖြင့် ဆိုတဲ့ သတင်းစာကြော်ငြာ၊ ရေစီးထဲမှာ လွင့်ကျ မျောပါသွားတဲ့ ပုဝါစ။ လူတန်းရှည်ဟာ နောက်တကြိမ် ရွေ့လျားသွားပြန်တယ်။ ခေါက်ဆွဲဆိုင်နားကို ရောက်ခါနီးနေပြီ။ ကျွန်မအရှေ့မှာ တန်းစီနေတဲ့သူ သုံးယောက်ပဲ ရှိတော့တယ်။ ခေါက်ဆွဲဝယ်ပြီးရင် ခေါက်ဆွဲဗန်းကို သယ်စရာ လက်နှစ်ဖက်စလုံး အားသွားအောင် ခုနက ဆုတ်ထားတဲ့ လက်ကိုင်ဖုန်းကို အိတ်ထဲ ပြန်ထည့်လိုက်တယ်။

ကျွန်မ နည်းနည်း ပိုမူးလာတယ်လို့ ထင်တယ်။ သကြားလုံး မရှိတာ ခက်တယ်။ မူးနေရက်က စဉ်းစားမိတာကတော့ ကြိုးတွေနဲ့တူတဲ့ ခေါက်ဆွဲကို ကျွန်မ တကယ် စားချင်သေးရဲ့လား ဆိုတာပဲ။ ကျွန်မအရှေ့က မိန်းမက သူ့လက်ကိုင်ဖုန်း ဖန်သားပြင်ကို သည်းသည်းမည်းမည်း ကြည့်နေဆဲ။ မင်းသမီး... မင်းသမီး... ပြဇာတ်ရုံရှေ့က မင်းသမီး...။ ဗြုန်းဆို ကျွန်မ အဲဒီမိန်းမရှေ့မှာ သွားရပ်ပြီး သူ့ကြည့်နေတဲ့ လက်ကိုင်ဖုန်းကို လူယူလိုက်တယ်။ ထင်မထားဘူး၊ အကြီးစားလက်ကိုင်ဖုန်းဟာ ကျွန်မလက်ထဲကို အဲဒီလောက် လွယ်လင့်တကူ ပါလာလိမ့်မယ်လို့ ကျွန်မ တကယ်ပဲ ထင်မထားဘူး။ ပြီးတော့ ခေါက်ဆွဲဆိုင်ဖက်ကို လျှောက်သွားပြီး အဲဒီလက်ကိုင်ဖုန်းကို ပွက်ပွက်ဆူနေတဲ့ ဟင်းချိုအိုးထဲကို ခပ်ဖြည်းဖြည်း ထည့်ချလိုက်တယ်။ လှလှလေး ပြုံးနေတဲ့ မင်းသမီးရဲ့ မျက်နှာ ဟင်းချိုပူပူထဲ တအိအိနဲ့ နစ်ဝင်သွားတာကို ကြည့်ရင်း တချက်ပြုံးပြီး ခေါက်ဆွဲဆိုင်ကို ကျောခိုင်းလိုက်တယ်။ အနောက်မှာ ဘာတွေဖြစ် ကျန်ခဲ့တယ်ဆိုတာ ကျွန်မ မသိချင်တော့ဘူး။ မသဲမကွဲ အော်ဟစ်သံ တချို့နဲ့ တဖျတ်ဖျတ်မြည်နေတဲ့ ဖိနပ်သံတချို့ကိုတော့ ကျွန်မ ကြားလိုက်ရတယ်။ ဒါပေမဲ့ လှည့်မကြည့်ဖြစ်တော့ဘူး။ မျက်စိရှေ့က ဖြတ်သွားတဲ့ ကားတစင်းရဲ့နံပါတ်ပြားထဲက ကိုး ဖြစ်စေမယ့် ဂဏန်းတွေကို စိတ်ထဲကနေ ရွေးချယ် ဖယ်ထုတ်နေလိုက်တယ်။

သက်ဝေ
(၂၉ ဧပြီ ၂၀၁၆)

နှင်းဆီဖြူ အတွဲ ၂ အမှတ် ၁၀ ၊ ဇူလိုင် ၂၀၁၆ တွင် ဖေါ်ပြပြီး ဖြစ်သည်။


Friday, July 15, 2016

ကို ကို နဲ့ ကျွ န် မ ရဲ့ ညေ န

ဒီစာကို ကိုကိုဖတ်ရတဲ့အချိန်ဟာ အနည်းငယ် အေးစက်စက်နိုင်ပြီး နေရောင် စောစော ပျောက်သွားတတ်တဲ့ ဆောင်းညနေခင်း မှောင်ရီပျိုးစအချိန်လေး ဖြစ်ကောင်းဖြစ်နိုင်သလို ကိုကို့အိမ် ဧည့်ခန်းထဲက မဟော်ဂနီရောင် တိုင်ကပ်နာရီကြီးဆီက မနက်ဆယ်နာရီ အတွက် သံစုံတီးလုံးမြည်နေချိန်လည်း ဖြစ်နိုင်ပါတယ်။ အဲဒီအချိန်မှာ ကျွန်မက မှန်ရှေ့မှာထိုင်ရင်း ကိုကိုချစ်တဲ့ ညိုဖျော့ဖျော့ဆံပင်ရှည်တွေကို ရှင်းလင်း ဖြီးသင်ပြီးစအချိန် ဖြစ်နေနိုင်သလို တဆစ်ဆစ် ကိုက်ခဲ နာကျင်နေတဲ့ ခေါင်းကိုက်ဝေဒနာကနေ သက်သာလို သက်သာငြား ရေနွေးပူပူရောထားတဲ့ ပျားရည်ထဲကို အဝါရောင်သံပုရာတစ်လုံး ညှစ်ထည့်နေတဲ့ အချိန်လည်း ဖြစ်ချင် ဖြစ်နေနိုင်တာပေါ့။ မနက်စောစော ကော်ဖီချိန် ကိုကို ဖတ်လက်စ စာတစ်အုပ်ရဲ့ စာမျက်နှာတွေမှာ ကျွန်မကို သတိရစရာ စာကြောင်းရေ အနည်းငယ် သို့မဟုတ် တစွန်းတစ ပါဝင်နိုင်ဖို့ သိပ်မသေချာလှပေမဲ့ ကျွန်မ စာအုပ်စင်ထဲက စာအုပ်အတော်များများရဲ့ စာမျက်နှာတိုင်းမှာတော့ ကိုကို ရှိနေခဲ့ပါတယ်။ ကိုကို့အိပ်ယာဘေးက စားပွဲတင်နာရီဟာ တစ်တောက် တစ်တောက်နဲ့ ကုန်လွန်သွားတဲ့ အချိန်တွေအကြောင်း ပြောပြနေခဲ့ပေမဲ့ ကျွန်မ ခေါင်းအုံးဘေးက လက်ကိုင်ဖုန်းကလေးကတော့ ခေါ်သူ မရှိ၊ အေးစက် တိတ်ဆိတ်စွာနဲ့ နှစ်နှစ်ခြိုက်ခြိုက် အိပ်မောကျနေဆဲပါ။

အိပ်ခန်းထောင့်က စားပွဲအပုလေးပေါ်မှာ တင်ထားတဲ့ ဖယောင်းတိုင်တစ်ချောင်း တငွေ့ငွေ့နဲ့ ညင်ညင်သာသာ လောင်မြိုက်ပြီး အရည်ပျော်ကျနေချိန်မှာ ထွက်လာတဲ့ ဖယောင်းအညှော်နံ့နဲ့ လာဗင်းဒါးပန်းနံ့ ရောနေတဲ့ အနံ့ဆန်းဟာ ကိုကိုနဲ့ကျွန်မရဲ့ တစ်ခုတည်းသော ညနေခင်းဆီကို မသိမသာရော သိသိသာသာပါ ခေါ်ဆောင်သွားခဲ့တယ်။ အဲဒီညနေတုန်းကလည်း အခုလိုပဲ အဖြူရောင် ဖယောင်းတိုင်တွေ တစ်တိုင်ပြီးတစ်တိုင် လောင်ကျွမ်းပြီး အရည်ပျော်သွားခဲ့တာ ကိုကို မှတ်မိတယ် မဟုတ်လား။ ကိုကို ထပ်ထပ် ဖြည့်ပေးခဲ့တဲ့ ဝိုင်အနီတွေကတော့ ကိုကို့ ဆေးလိပ်မီးခိုးငွေ့တွေကြားထဲမှာ တစ်ခွက်ပြီးတစ်ခွက် ဝေဝါးကုန်ကြတယ်လေ။ အဲဒီဝိုင်အနီတွေ ဖြည့်ထားတဲ့ ရှည်မျောမျော ဝိုင်ခွက်နှစ်ခွက် နှုတ်ခမ်းချင်း တေ့ခတ်ပြီး နှုတ်ဆက် ဖြစ်ခဲ့လား၊ နှုတ်မဆက်ဖြစ်ခဲ့ဘူးလားဆိုတာ သေသေချာချာ မမှတ်မိတော့ပေမဲ့ ကိုကို ကျွန်မကိုတွေ့တွေ့ချင်း နှုတ်ဆက်ခဲ့ပုံလေးကတော့ ဘယ်တော့မှ မေ့ပျောက်နိုင်မှာ မဟုတ်၊ တသက်စာ အမှတ်တရပါ ကိုကို။ ရီဝေ ရှတ ဝိုင်အရသာနဲ့အတူ ကြည်သာချိုမြ အပြုံးတွေနဲ ပြည့်နှက်နေခဲ့တဲ့ အဲဒီညနေခင်းဟာ ရင်ခုန် ယစ်မူးစရာ… ဘယ်တော့မှ မမေ့နိုင်စရာ။ အဲဒီညနေကို “ကိုကိုနဲ့ ကျွန်မရဲ့ ညနေ” လို့ အမည်တပ်ပြီး စာတစ်ပုဒ် ရေးမယ် ဆိုတဲ့အကြောင်း ကိုကို့ကို ကျွန်မ ပြောဖြစ်ခဲ့ရဲ့လား။

ခေတ်မီဆက်သွယ်ရေးနည်းပညာတွေကြောင့် စာလုံးတွေ စကားသံတွေနဲ့ အများကြီး ရင်းနှီးခဲ့ဖူးပေမဲ့ အတူတူ မျက်နှာချင်းဆိုင် တွေ့ရတဲ့အခါမှာတော့ ပြောစရာစကားတွေဟာ ဟိုးကောင်းကင်ပြာပြာကြီးပေါ်မှာ လွင့်မျော ရွေ့လျားနေတဲ့ တိမ်လိပ်ဖြူဖြူတွေလိုပဲ ဖမ်းဆုပ်ရ ခက်ခဲနေပြန်တယ်။ ထိုင်နေရာကနေ လှမ်းမြင်နေရတဲ့ ဘာမှ မထူးဆန်းတဲ့ မြင်ကွင်းကို ကြံရွယ်ရာမဲ့ ငေးမောရင်း အဲဒီညနေခင်းမှာ အချိန်တွေဟာ ကုန်မှန်းမသိ ကုန်သွားခဲ့တာ။ အလင်းရောင် နည်းပါးသွားတဲ့ ညနေခင်းတွေတိုင်းကို အိမ်ပြန်ချိန်ရယ်လို့ ဘယ်သူကများ သတ်မှတ်ထားခဲ့တာပါလိမ့်။ တွေးနေရင်းမှာပဲ လမ်းမီးတိုင်တွေအားလုံး တပြိုင်နက်ထဲ လင်းလာကြတယ်။ အဲဒီတော့ ကျွန်မတို့ အိမ်ပြန်ကြရတယ်။ ပြန်ခါနီးနှုတ်ဆက်ကြတဲ့ အချိန်လေးမှာတော့ ဘယ်သူမှ မျက်ရည်မဝဲခဲ့တာ သေချာပါတယ်။ ဘာပဲဖြစ်ဖြစ် ရတောင့်ရခဲ ရှားပါးတဲ့ တွေ့ဆုံခွင့်လေးကို ဘုရားပေးတဲ့ ဆုလာဘ်တစ်ခုလို မက်မော တန်ဖိုးထားရင်း တစ်ယောက်ကို တစ်ယောက် ကျေနပ်ကြရပေမပေါ့။ ပတ်ဝန်းကျင်က လူတွေ အများကြီးရှေ့မှာ ကိုကို့လက်ကို တင်းတင်းဆုတ်ကိုင်ထားရင်း တစ်ခုခု ပြောချင် မှာချင်ပေမဲ့ ကိုယ်တိုင် ဘာပြောချင်မှန်း၊ ဘာမှာချင်မှန်းတွေးလို့ မရခဲ့ဘူး။ အဲဒီ့အခိုက်အတံ့လေးကို ခက်ခက်ခဲခဲ လွန်မြောက်အပြီးမှာတော့ ကိုကို့လက်မောင်းကို လက်သီးနဲ့ မနာအောင် ဖွဖွထိုးရင်း နေကောင်းအောင်နေကွ လို့ အပြုံးမပျက် အရယ်စွက်လို့ ပြောဖြစ်ခဲ့တာ ကိုကို မှတ်မိမယ် ထင်ပါရဲ့။ ဒါဟာ အဓိကအရေးအကြီးဆုံး မှာတမ်းပဲ… နေကောင်းနေမှ ကျန်းမာနေမှသာ ကျွန်မတို့ လျှောက်ချင်တဲ့လမ်းတွေ ဆက်လျှောက်နိုင်မှာ မဟုတ်လား။

ကိုကို့ကို သတိရလို့ အမှတ်တရစိုက်ထားခဲ့ဖူးတဲ့ စပယ်ပန်းပင်လေးမှာ အဖူးတွေ ဝေနေပြီဆိုတဲ့အကြောင်း၊ အပြန်လမ်းမှာ ဒီနေ့အတွက် အမှတ်တရအဖြစ် နှင်းဆီအနီလေး တစ်အိုး ဝယ်ဖြစ်လိမ့်မယ် ဆိုတဲ့အကြောင်း၊ တိမ်ကင်းစင်တဲ့ညတွေမှာ နက်ပြာရောင်ကောင်းကင်ပေါ်က ကြယ်ပွင့်လေးကို တွေ့တိုင်း ကိုကို့ကို လွမ်းဆွတ် သတိရနေမှာ ဖြစ်တဲ့အကြောင်း၊ အမှတ်တရ လက်ဆောင်အဖြစ် ကိုကိုယူလာပေးခဲ့တဲ့ စာအုပ်ကလေးသုံးအုပ်အတွက် ကျေးဇူးတင်တဲ့ အကြောင်း… အဲဒီလို ရောက်တတ်ရာရာတွေ ပြောရင်း လမ်းခွဲခဲ့ကြတဲ့နောက် ကျွန်မရဲ့ အပြန်လမ်းတလျောက်လုံး စပါယ်ပန်းနံ့တွေ လှိုင်လှိုင်ဝေနေခဲ့တယ် ကိုကို။ အိမ်ပြန်ရောက်တော့ အမှတ်မထင် လှမ်းဖွင့်လိုက်မိတဲ့ ရေဒီယိုလိုင်းတစ်ခုမှာ လာနေတဲ့ သီချင်းက ကိုကိုတခါက ခပ်တိုးတိုး ညည်းပြခဲ့ဖူးတဲ့၊ အဆိုတော် ဟဲလေး ဆိုထားတဲ့ သီချင်းတစ်ပုဒ်… သီချင်းနာမည်က ခိုနားရာ တဲ့။

… အို အချစ်လေးရာ နင်နဲ့ငါ မိုင်တွေအများကြီး ဝေးတဲ့အခါ
ရင်ထဲမှာ ဥာဏ်ထဲမှာ အချိန်မှန်သတိရနေပါ…
ကိုယ့်အနားကို လာဖို့ရာ ဘယ်အချိန်အတိအကျ မသိလို့ပါ…
ခိုနားရာ ဟိုအဝေးက စိတ်ချင်း ဆက်ပေးပါ… …

ချစ်စရာ သီချင်းလေးကို စိတ်ထဲကနေ ခပ်တိုးတိုး လိုက်ဆိုနေရင်း ခုလောက်ဆို ကိုကို ကျွန်မကိုလွမ်းနေရောပေါ့ လို့ တွေးမိတယ်။ ညက မှောင်မိုက်ပြီး တိတ်ဆိတ်နေတယ် ကိုကို။ ပြတင်းပေါက်ကနေ မော့ကြည့်တော့ ပိန်းပိတ်အောင် မှောင်နေတဲ့ ကောင်းကင်ကြီးက ကျွန်မကို ကြင်နာဟန် အပြည့်နဲ့ ငုံ့ကြည့်နေခဲ့တယ်။ ကြယ်ပွင့်လေး တစ်ပွင့်တစ်လေများ တွေ့လိမ့်နိုးနဲ့ လိုက်ရှာကြည့်ပေမဲ့ အဲ့ဒီညက ကြယ်လေးတွေ မရှိကြဘူး။ ကိုကို့ရဲ့ လှပတဲ့ ချစ်ခြင်းမေတ္တာထဲမှာ ကျွန်မ အကြိမ်ကြိမ် ကြွေကျခဲ့ဖူးသလို ကြယ်ကလေးတွေလည်း သူတို့ ချစ်တဲ့သူတွေနား ကြွေကျကုန်ကြပြီထင်ပါရဲ့။

* * * * * *

ဒီစာကိုရေးပြီး ရက်ပေါင်းများစွာ ကျွန်မ ဆက်မရေးနိုင်ပဲ တပိုင်းတစနဲ့ ရပ်ထားမိတယ်။ မနက်ကတော့ ကိုကို့ကို သတိရလွမ်းဆွတ်တဲ့စိတ်တွေနဲ့အတူ ရေးလက်စ စာကလေးကို ပြန်ဖတ်ဖြစ်တယ်။ မျှော်လင့်မထားတဲ့ ကြည်နူးဆွတ်ပျံ့မှုတချို့ကို ရလိုက်တဲ့အချိန်မှာ ကျွန်မ စာကို စိတ်လိုလက်ရ ဆက်ရေးနေမိတယ်။

ကိုကို့ကို ပြောပြရအုံးမယ်။ မမျှော်လင့်ပဲ ကျွန်မ အရင်တပတ်က ခရီးတိုလေးတစ်ခု သွားဖြစ်ခဲ့တယ်။ အဲဒီခရီးက အပြန်မှာ ကိုကို့အတွက် အမှတ်တရ လက်ဆောင် ပါလာခဲ့တယ်။ အဲဒါကတော့ ပုံသဏ္ဍာန်ရော အရွယ်အစားပါ တထပ်တည်း တူညီတဲ့ ကြည့်မှန်ကလေး နှစ်ချပ်ပါ။ အဲဒီ မှန်ကလေးတွေ ရောင်းတဲ့ဆိုင်မှာပြထားတဲ့ အကြီး အသေး၊ အ၀ိုင်း လေးထောင့်၊ ဘဲဥပုံ အစရှိတဲ့ မှန်ချပ်လေးတွေဟာ ထောင်ထားလို့ရတဲ့ ထောက် အမျိုးမျိုး၊ လက်ကိုင်ဒီဇိုင်း အမျိုးမျိုး၊ အရောင်စုံ ပုံသဏ္ဍာန်စုံ ဘောင်ကလေးတွေနဲ့ တချို့ဆို ကနုတ်ပန်းနွယ်လေးတွေ စီခြယ်လို့ အင်မတန်ကို ချစ်စရာကောင်းလှတယ်။ ကနုတ်ပန်းနွယ်ဆိုလို့ ကိုကို့ရဲ့ တချိန်က နွယ့်ကို တခါတလေ သတိရနေတုန်းပဲလားလို့ စိတ်ထဲကနေ ရန်လှမ်းတွေ့မိသေးတယ်။ ကျွန်မ အတော်လေး မိန်းမဆန်လာပြီနော် ကိုကို။ ကိုယ့်အတွေးနဲ့ကိုယ် သဘောကျလို့ ပြုံးရသေးတယ်။

အဲဒီဆိုင်မှာ မှန်ကလေးတစ်ခုချင်းစီကို ကျွန်မ အသေအချာ ကြည့်ပြီး အင်မတန် ကြည်လင်တဲ့၊ မှန်အ၀ိုင်းလေး နှစ်ချပ်ကို ရွေးချယ် ဝယ်ယူဖြစ်ခဲ့တယ်။ ကိုကိုနဲ့ ကျွန်မ နောက်တကြိမ် တွေ့ဖြစ်တဲ့အခါကျရင် အဲဒီ မှန်ကလေးကို အမှတ်တရ ပေးပါ့မယ်။ ကြည့်မှန်ချပ်တွေတိုင်းမှာ ပြင်းထန်တဲ့ အစွမ်းသတ္တိတွေကိုယ်စီ ရှိကြတယ် ကိုကို။ ပြီးတော့ သူတို့တွေကို မှန်မှန်ကန်ကန် နေရာချထားတတ်ဖို့လည်း လိုအပ်တယ်။ အဲဒီလို ထားတဲ့နေရာပေါ် မူတည်လို့ တန်ပြန်တတ်တဲ့ စွမ်းအားမျိုးတွေလည်း ရှိနေသေးတယ်။ အဲဒီ မှန်ချပ်လေးကို ကိုကို့ စာကြည့်စားပွဲပေါ်က ကျွန်မရဲ့ ဓါတ်ပုံဘေးမှာ ထောင်ထားလိုက်နော် ကိုကို။ ပြီးတော့ အဲဒီမှန်ကလေးကို နေ့စဉ် မပျက်မကွက် ကြည့်ရမယ်နော်။ ကိုကိုသိလား… လူတစ်ယောက်ဟာ အနည်းဆုံး တစ်နေ့ကို တစ်ကြိမ်တော့ မှန်ကြည့်ဖို့ လိုအပ်တယ်။ ကိုကို့စိတ်အတွေး ခံစားချက်၊ အကောင်း အဆိုးနဲ့ အနိမ့်အမြင့် အတက်အကျ၊ စိတ်အလိုကျခြင်း မကျခြင်း၊ စိတ်တိုခြင်း စိတ်ကြည်လင်ခြင်း စတာတွေကို အဲ့ဒီကြည့်မှန်ကလေးမှာ ပေါ်လာမဲ့ ကိုကို့မျက်နှာက အရှိကို အရှိအတိုင်း မကွယ်မဝှက်တမ်း ဖေါ်ပြပါလိမ့်မယ်။ နောက်ပြီး ကိုကို့အနားမှာ ကျွန်မ ရှိမနေနိုင်တဲ့အချိန်၊ ကိုကို ကျွန်မကို သတိရတဲ့အချိန်၊ အိပ်ရာက နိုးနိုးချင်း ဒါမှမဟုတ် ည အိပ်ရာဝင်ခါနီး... အဲဒီလို အချိန်မျိုးတွေမှာ မှန်ကလေးကို ကြည့်ဖြစ်အောင် ကြည့်ပါ။ ပြီးရင် ကျွန်မအကြောင်းကို နည်းနည်းလေးဖြစ်ဖြစ် တွေးပါ။ အနည်းဆုံးတော့ စိတ်ကြည်နူးချမ်းမြေ့မှု တစုံတရာကို ကိုကို ရနိုင်လိမ့်မယ်လို့ မျှော်လင့်ပါတယ်။

ကိုကို… ကျွန်မနဲ့ဝေးနေတဲ့အချိန်တွေမှာ သီချင်းနားထောင်ပါ။ စာဖတ်ပါ။ ရုပ်ရှင်ကြည့်ပါ။ လေချွန်ပါ။ ၀ိုင်အနီ သောက်ပါ။ သဘာဝကို ငေးမောပါ။ ဝမ်းသာပျော်ရွှင်စရာတွေကို ချစ်သူ ခင်သူတွေနဲ့ မျှဝေခံစားပါ။ စိတ်ထိခိုက် နာကျင်စရာတွေကို တွေ့ခဲ့ရင်တော့ စာရွက်လွတ်တစ်ရွက်ပေါ်မှာ တန်းစီပြီး ချရေးလိုက်ပါ။ ပြီးတော့ အဲဒီစာရွက်ကို မီးနဲ့ရှို့ပစ်လိုက်ပါ။ ကျွန်မကို သတိရလာတဲ့အချိန်မျိုးမှာ ဟိုးအဝေးကြီးမှာ မှုန်ပြပြ မြင်နေရတဲ့ တောင်တန်းတွေကို လှမ်းကြည့်ပါ၊ တဖက်တချက်မှာ သစ်ပင်စိမ်းစိမ်းတွေနဲ့ ကာရံထားတဲ့ လမ်းကွေးလေးမှာ လမ်းလျှောက်ပါ။ နေသာတဲ့နေ့တွေမှာ ကောင်းကင်ပေါ်မှာ ရွေ့လျားနေတဲ့ တိမ်လိပ်တွေကို လှမ်းကြည့်ပါ။ သူတို့က ကိုကို့ကို ကျွန်မအနား ရောက်လာအောင် တနည်းနည်းနဲ့ လမ်းပြခေါ်ငင်သွားပါလိမ့်မယ်။ ဒီကြားထဲမှာတော့ ကျွန်မတို့ တစ်ယောက်ကို တစ်ယောက် သတိရ လွမ်းဆွတ်ရင်း၊ အိပ်မက်တွေမက်ရင်း၊ ဘယ်တုန်းကမှ ပုံမှန်မဟုတ်ခဲ့တာတွေကို ပုံမှန်ဖြစ်အောင် ကြိုးစားနေထိုင်ရင်း၊ သိပ်များများစားစား မကျန်တော့တဲ့ ဘဝရဲ့ ကန့်သတ်ရက်စွဲတွေထဲမှာ နောက်ထပ်တစ်ကြိမ်တွေ့ခွင့်ရဖို့ မျှော်လင့် စောင့်ဆိုင်းရင်း အရင်လိုပဲ လမ်းဆက်လျှောက်ကြတာပေါ့ နော် ကိုကို။

သက်ဝေ
(၈ မေ ၂၀၁၅)

~ ၂၀၁၆ ဇူလိုင်လထုတ် Look Magazine တွင် ဖေါ်ပြပြီးဖြစ်သည်။