တပွင့်ပန်း

ကိုယ်ဟာ မိန်းကလေးတယောက် ဖြစ်ပေမယ့် တကယ်တော့ ပန်းပင်တွေ ပန်းပွင့်တွေနဲ့ နဲနဲမှ မနီးစပ်ပါဘူး။ ပန်းတွေကို စိတ်လဲ မဝင်စားသလို သိပ်လည်း မနှစ်သက်ခဲ့ပါဘူး။ သိပ်လှတဲ့ပန်းတွေ၊ သိပ်မွှေးတဲ့ပန်းတွေကိုတွေ့ရင်လဲ သာမန်ထက်ပိုပြီး ဘာမှ ထူးထူးခြားခြား မခံစားရပါဘူး။ ငယ်ငယ်ကတော့ ကျောင်းပိတ်ရက်ရှည် တခုမှာ အမတယောက်က ခေါ်လို့ (အဖေါ်ကောင်းလို့) ဂျပန်ပန်းအိုးထိုးနည်း အီကေဘားနားကို သင်တန်းတက်ခဲ့ဖူးတယ်။ သင်တန်းအပြီးမှာ ဘုရားပန်းအိုး နဲ့ အိမ်က စားပွဲလေးတွေပေါ်မှာ အလှပန်းအိုး သေးသေးကွေးကွေးလေးတွေကို နဲနဲ ချက်ကျလက်ကျ ထိုးတတ်လာပါတယ်။ ဒါထက်တော့ မပိုခဲ့ပါဘူး။

ဟိုတလောကတော့ သူများတွေရိုက်ထားတဲ့ ဓါတ်ပုံတွေကြည့်ရင်း ကိုယ်တိုင်လဲ ဓါတ်ပုံရိုက်ချင်စိတ် ဖြစ်လာတယ်။ သို့သော် ဓါတ်ပုံရိုက်ချင်စိတ် ပေါ်လာတဲ့အခါတိုင်းမှာ ကိုယ်ရိုက်ချင်တာတွေက ချစ်စရာ တိမ်တွေ များများပါတဲ့ ရှုမျှော်ခင်းတွေ၊ မျက်စေ့တဆုံး မြင်နေရတဲ့ မြက်ခင်းစိမ်းစိမ်းတွေနဲ့ သစ်ပင်အုပ်အုပ်တွေ၊ အသက်ဝဝရှုလို့ သိပ်ကောင်းတဲ့ ကွင်းပြင် ကျယ်ကျယ်တွေ၊ ပင်လယ်ပြင် ကျယ်ကျယ်ကြီးကို အနားသတ်ထားတဲ့ ဟိုးအဝေးကြီးက တောင်တန်းညိုညိုတွေ၊ သူတို့အနားကို သွားလိုက်တိုင်း ကိုယ့်ဆီကို အပြေးကလေး ရောက်လာတတ်ကြတဲ့ ရေလှိုင်းပြာပြာတွေ… အဲဒီလိုပုံမျိုးတွေကိုပါ။

ဒါပေမယ့် လောလောဆယ်မှာ အဲဒီလိုတွေရိုက်ဖို့ အတွက် အဲဒီလိုနေရာမျိုးတွေကို သွားဖို့ အခြေအနေကမပေး၊ အချိန်ကလဲ ရှိမနေသေးတာကြောင့် အလွယ်ဆုံး နဲ့ အနီးစပ်ဆုံး Object တွေကိုပဲ အရင်ရိုက်နေဖြစ်ပါတယ်။ အဲဒီလိုတွေ Object တွေ ထဲကမှ ကိုယ်အရင်က တခါမှ စေ့စေ့စပ်စပ် နီးနီးကပ်ကပ် မကြည့်ဖူးတဲ့ ပန်းလေးတွေကို အနီးကပ် ရိုက်ထားတယ်။ ဒီမှာ ကြည့်ပါအုံး...












အဲဒီပန်းလေးတွေက ပထမတခေါက်က မိုးဖျက်လို့ မရောက်ခဲ့ရတဲ့ Botanical Garden ကို နောက်တခေါက် ထပ်သွားတုန်းက ရိုက်ခဲ့တာပါ။ ဓါတ်ပုံပညာ ဆိုတာကို ထဲထဲဝင်ဝင် မလေ့လာရသေးခင်မှာ စိတ်ပါသလို ရိုက်ထားတဲ့ ပုံလေးတွေလဲဖြစ်ပါတယ်။ အဲဒီမှာ သိပ်လှတဲ့ ပန်းတွေ အများကြီးတွေ့ခဲ့ပေမယ့် စိတ်ထဲမှာ တွေးမိတာလေး တခုကြောင့် အခိုင်တခိုင်မှာ တပွင့်စီသာရှိနေတဲ့ ပန်းတွေကိုမှ ရွေးရိုက်ခဲ့မိတယ်…။ ရိုက်ပြီးတော့ ဓါတ်ပုံလေးတွေ တပုံစီအတွက် နာမည်ရွေးတာ မရလို့ တော်တော်နဲ့မတင်ဖြစ်ခဲ့ဘူး။ ဒီနေ့တော့ ပုံအားလုံးအတွက် “တပွင့်ပန်း” လို့ပဲ နာမည်လွယ်လွယ်ပေးပြီး တင်လိုက်ပါတယ်။ ဓါတ်ပုံလေးတွေလာကြည့်ရင်း စိတ်ကူးထဲမှာ ပေါ်လာတဲ့ နာမည်လေးများ တွေးမိရင် ပြောခဲ့ကြပါလို့…